لە سەدا پەنجا

بۆچوون / بیروڕا :: 26/03/2019

شاخەوان عەلی 
دەڵێن خراپترین دەردی سیاسی ئەوەیە كە میلـلەت حەوسەڵەی حیزبەكانی نەمابێ‌. ئەگەر ئەم قسەیە بكەینە پێوەر، مەعنای وایە هەرێمەكەمان دكتۆر ئیزنی داوە و هی ئەوەیە مەلایەك بانگ بكەین یاسینی بخوێنێ‌. چونكە ئەو هەموو لێدوان و خوتبە و سندان و قوزەڵقورتە سیاسییە لە تەلەفزیۆن و رۆژنامەكاندا بێ‌ پەردە بڵاودەكرێنەوە كەچی خەڵكەكە مێشێ‌ میوانیان نییە..


رەنگە ناهەقیشیان نەبێ‌..بۆشایی نێوان جەماوەر و دەستەبژێرە سیاسییەكەی كورد سەعات بە سەعات قووڵتر و فراوانتر دەبێ‌.. لانی كەمی چاوەڕوانییەكەی میلـلەت نەهاتۆتە دی. متمانە بە كاربەدەست شتێكە نزیكی سفر.. باوەڕ بە قەول و بەڵێنەكان مایەی پێكەنینە.. هەوڵێكی خەمخۆرانە لەگۆڕێدا بەدی ناكرێ‌ بە ئاڕاستەی سەروەركردنی یاسا و هەنگاونان بەرەو دادی كۆمەڵایەتی..

رووخسارەكان هەمان رووخساری چارەكە سەدەیەك لەمەوپێش و هەزار پات دەبنەوە.. گومان عەسای دەستمانە بۆ رێكردن بەناو سامانە هەڵتۆقیوەكان و دۆسییە گومكراوەكان و شەڕە زەرەنگەرانەكەی نێوان لێپرسراوە جۆراوجۆرەكان.. ئەمانە هەموویان جارانیش هەبوون، بەڵام لەدوای رووخانی رژێمی بەعسەوە سەد بەرامبەر بوون.

پێ‌دەچێت بەغدا هەر لە بودجەدا سەدی حەڤدەی بۆ دانابین، ئەگینا ئەگەر گەندەڵی و پاشاگەردانی و بێ‌هیواییەكە حساب بكەی زۆر زیاترن لە سەدا پەنجاش.

created by Avesta Group and powered by Microsoft Azure