خۆرئاوای تاك و خۆرئاوای دەوڵەت

بۆچوون / بیروڕا :: 26/02/2019

مێژووە خوێناوییەكەی خۆرئاوا دەرهەق بە میللەتانی تر لەسەردەمی پێش ئیمپریالیستیشەوە، هەتا رۆژی ئەمڕۆ كە بە قۆناغی پاش كۆلۆنیالیزم ناودەبرێ‌ مەسەلەیەكە پێویستە هەڵوەستەی لەسەر بكرێ‌، چونكە بە هیچ جۆرێك نایەتەوە لەگەڵ هەڵوێستی مرۆڤی خۆرئاوایی وەكو تاك .. لەوێ‌ گەندەڵكاریی و دەستدرێژیكردنە سەر مافی بەرامبەر دەگمەنن .. خێرخوازیی چاكەكاری و راستگۆیی كۆمەڵە خەسڵەتێكن كە لە خۆرئاوادا دەمێكە رەگ و ریشەیان داكوتاوە.


سەیرە .. خۆرئاوا لەسەر ئاستی تاك نموونەی ئینساندۆستی و كرانەوە و ئاشتیخوازییە، كەچی لەسەر ئاستی دەوڵەت داگیركەر و خوێنمژ و كودەتاچی و خوڵقێنەر و داڵدەری داعشە و بەرگری دەكات لە رژێمە دیكتاتۆرە كۆنەپەرستەكان.
ئەمە خۆی جەوهەری پرسیارێكە: ئایا ئەو مرۆڤە ئەوروپایی یان ئەمریكییەی كە كە دەچێتە ئەفریقا بۆ رزگاركردنی منداڵان لە برسێتی و نەخۆشی و ئاسەوارەكانی شەڕ، هیچ جیاوازییەكی هەیە لەگەڵ ئەو هاونیشتمانییەیدا كە نەخشە جەهەنمییەكان بۆ وڵاتانی جیهانی سێ‌یەم دادەڕێژێ‌؟ ئایا یەكەمیان ویژدانی هەیە و دووەمیان بێ‌ ویژدانە؟ بەراست ویژدان یەعنی چی؟
وردبوونەوەی قووڵ لە مەسەلەكە بۆمان دەسەلمێنێت كە ویژدان دیاردەیەكە پەیوەستە بە تاكەوە. واتە كە تەنیا خۆی دەبێ‌ و دەیەوێت كارێك بكات پرسیار لە خۆی دەكات ئایا ئەو كارە باشە یان خراپە، بەڵام كە تێكەڵی كۆمەڵێك دەبێت ئیش و كاریان وێرانكاری و ئازاردانی خەڵكانی ترە، ویژدانی كاڵ دەبێتەوە و رێگرێك نامێنێ‌ لێپرسینەوەی لەگەڵ بكات لەسەر رەفتار و هەڵوێستەكانی.


created by Avesta Group and powered by Microsoft Azure