كوڕی مەسئولەكان

بۆچوون / بیروڕا :: 17/02/2019

نووسینی: عەبدولمونعیم ئەلئەعسەم
سەرچاوە: ئەلسەباح ئەلجەدید
وەرگێڕانی: د. شێركۆ عەبدوڵـڵا

هەر كات و لە هەر شوێنێك باس لە سەرپێچی كوڕی مەسئولە گەورەكان و دەسەڵاتدارە گەورەكان بكرێ‌، یەكسەر یەكێكت لێ‌ پەیدا ئەبێ‌ كە دەڵێ‌:"وریابە... ئەوە فایلێكی هەستیارە"، یان ئامۆژگارییەكی فێڵاویت گوێ‌ لێ‌ ئەبێ‌: چی ئەڵێ‌ی بیڵێ‌، بەس وریابە ناوی كەس نەبەی. وەزعەكەش وەكو خۆی دەمێنێتەوە، وەزعی پڕ بوونی جامی غەزەب و ناڕەزایی لەو چیرۆك و رووداوانەی كە باس لە كوڕ و كوڕەزاكانی كاربەدەست و سیاسییەكانی ریزی پێشەوەی بەڕێوەبردنی وڵات دەكەن و سیاسەت و رەوشت و پێوەرەكانی نیشتمانی و خواپەرستییان گەندەڵ كرد و سامانی گشتی وڵاتیان تەخشان و پەخشان كرد، هەموویشی بە ئامۆژگاری و چاودێری و پارێزگاری باووباپیرانیان.

ئێمە دەڵێین ئەگەر لەو هەموو چیرۆكانەی بڵاودەكرێنەوە تەنیا چارەكێكیشی راست بێ‌ ، هێشتا بەسە بۆ وێناكردنی وێنەیەكی ترسناكی وڵات لەسەر دەستی ئەم لێپرسراوانە، یان ئەوەی كوڕانی میراتگری ستەمكار و گەندەڵەكان ئامادە دەكەن بۆ قۆناغی دوای بەشبەشێنە.
چیرۆكی یەزیدی كوڕی مەعاویە پێمان دەڵێت پێویستە لە پەندە دووپاتكراوەكەی مێژوو وردببینەوە كە دەڵێت گەندەڵ و ستەمكاران ئەولادی وەكو خۆیان دەخەنەوە لەجل و بەرگ و رابواردن و زەوتكردنی سامانی وڵات و كوشت و بڕی خەڵك و خۆجیاكردنەوەیان لە تێكڕای خەڵكەكە.

نەك هەر ئەوە بەڵكو ئەمانە هەر لە مناڵییەوە فێری قسەی نەرم و سەوز و سوور و بەڵێنی بێزاركەر دەبن كە هێندە سواون مرۆڤ لێ‌یان بێزار دەبێ‌ و دڵیان پێ‌ی تێكەڵ دێ‌.
یەكەمین كێشە لەم مەسەلەیەدا ئەوەیە كە پەیوەست بوونی ئەولاد بە دەسەڵات و تەماعكاریی باوكیانەوە بەشێكە لە كولتووری خێڵ كە وەكو دەستووری وڵاتی لێ‌ هاتووە. بگرە هەندێ‌ جاران كوڕانی كاربەدەستان زۆر لە باوكیان خراپتر دەردەچن و خەڵكەكە وایان لێ‌ دێت بڵێن سەد رەحمەت لە كفن دز.

كێشەی دووەم ئەوەیە قەدەر وای كردووە، ئێمە، رۆڵەكانی ئەم سەردەمەی عێراق هەم ببینە شایەتی ئەم سەردەمە بێ‌ رەوشتە و هەم ببینە قوربانییەكانیشی. 

created by Avesta Group and powered by Microsoft Azure