گەڕانەوەی ئەمریكییەكان بۆ سوریا

بۆچوون / بیروڕا :: 08/01/2019

سەرچاوە: ئەلشەرق ئەلئەوسەت 
دۆناڵد ترەمپ سەرۆكی ئەمریكا پەشیمان بووەوە لە پاشەكشەكردن لە سوریا چونكە هێزە ناوچەییەكان نەیانتوانی وەك پرۆژەیەكی ئاشتی بۆ ئەوێ‌ تەماشای بكەن، بەڵكو وا مامەڵەیان لەگەڵدا كرد كە ئەمە پاشەكشەی هێزێكی شكستخواردووە. عێراق كە هاوپەیمانی واشنتۆنە سەرلێشێوانی لێ‌ دەركەوت و ملیدا بۆ گوشارەكانی تاران. توركیا بەپەلە كۆمەڵێك سازشی بۆ ئێران و روسیا كرد. هێزەكانی سوریای دیموكراتیش كە لەسەر واشنتۆن حسابن، بەرەو لای دیمەشق و تاران دایانشكاندەوە. ئێرانیش هەناردە سەربازەكانی زیاتر كرد بۆ بەرەی جەنگ.
لەڕووی دیپلۆماسیەوە، وڵاتانی ناوچەكە ئەم پاشەكشەكردنەی ئەمریكایان بە قۆناغێكی نوێ‌ حساب كرد كە ئێران و توركیا تێیدا باڵادەست دەبن و هەنگاوەكان بۆ دامەزراندنی هاوپەیمانێتیەكی ناوچەیی لەنێوان ئێران و قەتەر و توركیادا دەستی پێكرد. كۆمكاری عەرەبی و وڵاتانی ناوچەكە هەوڵیاندا پەیوەندیی لەگەڵ رژێمی دیمەشقدا دروست بكەنەوە بێ‌ ئەوەی هیچ نیازپاكییەك نیشان بدات بەرامبەر ملیۆنەها سوریی ئاوارە و پەنابەر، بەڵكو لە جاران خراپتر كەوتە راونان و تۆڵە لێسەندنەوەیان.
هەموو ئەم شتانە لەسەر تویتێكی سەرۆك ترەمپ دروست بوون كە لە ئەكاونتەكەی خۆیدا لە تویتەر ئاشكرای كرد بڕیاریداوە هێزەكانی لە سوریا بكشێنێتەوە لەبەر ئەوەی گوایە شەڕی داعش كۆتایی هاتووە و ئیتر پێویست ناكات لەسەر خاكی سوریا بمێننەوە.
ئەنجامەكان پێچەوانە و كارەساتبار بوون، لەبەر ئەوە ترەمپ پاشەكشەی كرد و سیاسەتی پاشەكشەی هێواشی گرتەبەر كە زیاتر لەوە دەچێت جێگۆڕكێی هێزەكانی بێت.
شەڕەكان لە سوریادان، بەڵام جەنگە راستەقینەكە لەگەڵ ئێراندایە كە دیمەشقی كردووەتە جومگەی سەرەكیی سیاسەتەكانی و لەو رێگەیەوە حوكمی لوبنان و عێراق دەكات و هەڕەشەیش دروشت دەكات بۆ سەر ئوردن و ئیسرائیل و هاوسەنگییەكی تازە و ترسناك لە ناوچەكەدا دەسەپێنێت.
شتە چاوەڕوانكراوەكە ئەوەبوو وەزیرەكانی ترەمپ زمانێكی بەهێز و توندیان بەكارهێنا بۆ قەرەبووكردنەوەی زمانە دۆڕاوەكەی پێشووتری پاشەكشێ‌. راوێژكاری ئاسایشی نەتەوەیی ئەمریكا هۆشداریی دا بە توركەكان لەوەی كە هێزەكانی وڵاتەكەی لە سوریا ناكشێنەوە ئەگەر توركیا بەڵێن نەدات كە هیچ هەنگاوێك لە سوریادا نانێت بەبێ‌ رەزامەندیی واشنتۆن و هەروەها ئاگاداری كردنەوە كە نابێ‌ جەنگاوەرە كوردەكان بكات بە ئامانج. ئەمە شێوازێك بوو كە ئەنقەرە بە سووكایەتی پێكردن حسابی كرد بەڵام نیوێرا تەحەدای بكات.
جا ئەگەر توركیا ملكەچ بێت و بەڵێن بدات هێرش نەكاتە سەر كوردەكان، ئەی ئاخۆ واشنتۆن چی دەكات لەو میلیشیا زۆرەی كە ئێرانیەكان بردوویانن بۆ سەپاندی هاوكێشەی گوشار خستنە سەر ئیسرائیل؟
ئەمە وام لێدەكات گومانم هەبێت لە كشانەوەی ئەمریكا لە سوریا پێش ئەوەی سیاسەتێكی جیاواز نەگرێتە بەر لەبەرامبەر ئێران و توركیا.
بە كورتیەكەی هێشتا كاتی ئاشتی نەهاتووە لە سوریا.
رژێمی دیمەشق چەند بەڵێن بدات ناتوانێ‌ ئێران لەكۆڵ بكاتەوە. بۆ ئەوەی ددانی پێدا بنێن بەڵێن دەدات كە داوا لە تاران دەكات لەماوەی ساڵێك یان دوو ساڵدا هێزەكانی بكێشێنێتەوە لە سوریا، بەڵام ئەو بەڵێنانە هیچ نرخێكیان نابێ‌.  هێزەكانی ئێران هەتا هەست نەكەن زۆر دەكەوێت لەسەریان، لە سوریا و ناوچەكە ناكشێنەوە. ئەمەیش تەنیا بە بەرزكردنەوەی ئاستی رووبەڕووبوونەوەكان دەكرێت لەگەڵ ئێراندا نەك بە هەڵاتنی سەربازیی ئەمریكا لە سوریا و كردنەوەی باڵیۆزخانە عەرەبییەكان لە دیمەشق.

created by Avesta Group and powered by Microsoft Azure