شەڕە بۆشەكانی پەرلەمان

بۆچوون / بیروڕا :: پێش 2 هەفتە

سەرچاوە: ئەلمەدا
وەرگێڕان: لوقمان محەمەد رەشید


گرنگ نییە كەسێك چەند جار شاكارەكەی ئیبن خەلدون-ی خوێندووەتەوە، ئەوەی كە ناوی ناوە (پێشەكی/المقدمە)، هەروەها گرنگیش نییە لە كوێیەوە دەست پێبكەین و چەند زانیاریمان لا كۆدەكاتەوە، چونكە كورتە و پوختەكەی ئەمەیە: كتێبێك بۆ هەموو سەردەمەكان!.

هیوادارم وەخت و كاتتان كە سیخناخە بە چاودێریكردنی شەڕەكەی نێوان عادل عەبدولمەهدی و حەیدەر عەبادی لەسەر كۆشكەكانی ناوچەی سەوز و تەماشاكردنی ڤیدیۆكانی شێخ حەسەن زاملی كە تووشی سەرئێشە بووە بەهۆی بینینی ئەو بابا نوئێل-ەی كە بەجلوبەرگە سوورەكەی و ریشە سپییەكەیەوە پێمان پێدەكەنێت، ئەوەیش جوانە كە زاملی ئاشكراكردووە بابا نوئێل-ی تاوانبار خوێنڕێژی و ریسوایی لەعێراقدا بڵاوكردووەتەوە، زاملی هەروەها پێیوایە مەسیحیەكانی عێراق دەیانەوێت دەوڵەتی (نەصرانی) لە عێراقدا دامەزرێنن و رێگریی بكەن لە شێخ زاملی بۆ ئەوەی بەردەوام نەبێت لە توێژینەوە ئەتۆمیەكانی، ئەگەر كاتتان هەبێت و ئەوانەی سەرەوە دەرفەتی ئەوەتان بۆ بهێڵێتەوە كە كتێبەكەی ئیبن خەلدوون بكەنەوە و لاپەڕەكانی هەڵدەنەوە رەنگە ئەوەتان بۆ دەركەوێت كە ئەركی كەسانی سیاسی ئەوەیە"گاڵتە بە خەڵكی نەكات و بەها و پیرۆزیەكانی نەخاتە ژێر ئارەزووی خۆی و چڵێسی و هەوەسەكانیەوە".

كاتێك ئیبن خەلدون (موقەدیمە)كەی نووسی، ویستوویەتی بەڕووی ئەو دواكەوتوویەدا بوەستێتەوە كە چواردەوری بەرپرس و كاربەدەستی تەنیوە. مەگەر هۆشداریی ئەوەی نەداوینەتێ‌ كە نالێوەشاوەیی و بێباكی و گرنگیپێنەدان لەلایەن كاربەدەستەوە، بەڵگەی هەرەسی وڵاتانە؟! باوەڕناكەم ئێوەیش لەگەڵمدا ناكۆك بن لەسەر ئەوەی بەشێك لە كێشەكانی ئەمڕۆمان هۆكارەكەی ئەو جەهل و نەزانییەیە كە لەمپەری بەردەم رێگەی بنیادنانی دەوڵەتی هاوچەرخە.

چی وامان لێدەكات ئەمە بكەین؟ وەڵامم ناوێت بەڵام داواتان لێدەكەم ئەوە بخوێننەوە كە ئەمڕۆ دەربارەی پرسی هێزەكانی ئەمریكا بڵاوكراوەتەوە، ئەوەتا لیجنەی ئاسایشی پەرلەمانە (لەسەرپێكەمان) پێمان دەڵێت كە ئێستا حەب-ی ئازایەتیی قووتداوە بۆیە بڕیاریداوە هێزە ئەمریكیەكان لە عێراق دەربكاتە دەرەوە و سزای ترەمپ-یش بدات بەوەی كە نەهێڵێت بێتە عێراقەوە! قسەیەكی خۆشە..

بەڵام ئەی بەڕێزینە، چی دەڵێن بەرامبەر هێزەكانی توركیا كە بە ئارەزووی خۆیان لە هەندێك ناوچەی عێراقدا دێن و دەچن و سوڵتان ئەردۆغان پێماندەڵێت هێزەكانی لەعێراق دەرناچن هەتا ئەركەكانیان جێبەجێ‌ نەكەن، كەچی تا ئەم چركەساتەیش ئەو ئەركانەمان پێناڵێت. دێتە بیرتان ئەوسا بەڕێز ئیبراهیم جەعفەری، كە لەمڕۆژانەدا وتارە سنسكریتییەكانی نەماوە، مژدەی كشانەوەی هێزەكانی توركیای لەخاكی عێراق پێداین، چونكە رێزی لە سەروەریی عێرق گرتووە!

بمبەخشن! كە ئەم چیرۆكەتان بیردەخەمەوە چونكە بۆ بەدبەختیی بیرەوەری و یادگەی خۆم ئەوەم بیركەوتەوە كە لیجنەی ئاسایشی پەرلەمانی ئەوكات پێیوتین كە رێككەوتنێك لەگەڵ توركیادا هەیە و رێگە بە سنووربەزاندنی هێزەكانی توركیا دەدات. بێگومان دوای چەند رۆژێك هەمان ئەو لیجنەیە پێمان دەڵێت كە هەڵە بووە چونكە رێككەوتنێك لەگەڵ ئەمریكادا هەیە و رێگە بە ترەمپ دەدات بەكەیفی خۆی بێت و بچێت وەك ئەو سەركردە (خۆشەویستانەی) تاران كە وادەزانن ئێمەیش پارێزگایەكی ئێرانین.

لێرەدا پرسیارەكە ئەمەیە: ئەگەر پەرلەمان جدییە لە كاری خۆیدا، بۆچی گفتوگۆی ئەو یاسایانە ناكات كە جێی بایەخ و گرنگیپێدانی هاووڵاتیی عێراقین، لەجیاتی ئەم شەڕ بەتاڵ و بۆشانە؟؟

created by Avesta Group and powered by Microsoft Azure