بۆچى درۆ ده‌كه‌ین؟

بۆچوون / بیروڕا :: 5 رۆژ پێش ئێستا

سه‌رچاوه‌: ئه‌لحه‌یات
وه‌رگێڕان: لوقمان محه‌مه‌د ره‌شید

شه‌وى یادى 51ى (نسكۆ)ى 67، ئه‌حمه‌د سه‌عید كۆچى دوایى كرد، ئه‌و كارمه‌نده‌ى رادیۆ كه‌ گه‌وره‌ترین رۆڵى بینى له‌ دامه‌زراندنى (ده‌نگى عه‌ره‌ب-صوت العرب) باڵى میدیایى كاریگه‌رى ناسرییه‌كان و خاوه‌نى كاریگه‌ریى سه‌رسوڕهێن له‌ جیهانى عه‌ره‌بیدا. به‌رنامه‌ به‌ناوبانگه‌كه‌ى (درۆكان راستیه‌كان ئاشكرایان ده‌كه‌ن) كه‌ به‌ هاوبه‌شیى له‌گه‌ڵ محه‌مه‌د عروق-ى میدیاكاردا پێشكه‌شیان ده‌كرد، نزیك بوو له‌ (راستیه‌كان درۆكان ناشیرینیان ده‌كه‌ن). ترانزیستۆر، گه‌وره‌ى په‌خش و بڵاوكردنه‌وه‌ى شه‌سته‌كان به‌ هه‌موو عه‌ره‌بدا ده‌یوه‌شاند و په‌خشى ده‌كرد.

مردنى ئه‌حمه‌د سه‌عید له‌ یادى (نسكۆكه‌دا) ئاماژه‌گه‌لى ره‌مزیى زۆرى هه‌یه‌، ئه‌مه‌یش رێكه‌وتێكى سه‌یره‌، چونكه‌ ناوى ئه‌و له‌ دوو رۆژى یه‌كه‌مى جه‌نگى 67 دا په‌یوه‌ست بوو به‌ (سه‌ركه‌وتنه‌ شكۆداره‌كانى عه‌ره‌ب)ه‌وه‌. راسته‌ ئه‌و خۆى ئه‌و به‌یاننامه‌ سه‌ربازییانه‌ى نه‌ده‌نووسى كه‌ ده‌یخوێندنه‌وه‌، به‌ڵام تۆمارى ئه‌و و تۆمارى (صوت العرب)یش هاوشێوه‌ى ئه‌و به‌یاننامه‌ سه‌ربازیانه‌ بوون.

ئه‌حمه‌د سه‌عید فه‌رمانبه‌ر بوو، زۆر رێى تێده‌چێت په‌رۆشى رۆڵ-ه‌كه‌ى خۆى بووبێت، ئه‌وه‌ى ده‌رباره‌ى زانراوه‌ ئه‌وه‌یه‌ كه‌ ئاماده‌ بووه‌ هه‌موو شتێك بكات بۆئه‌وه‌ى خزمه‌تى مه‌سه‌له‌یه‌ك بكات كه‌ به‌لایه‌وه‌ راست و ره‌وا بووبێت. به‌ڵام چى بكرێت ئه‌گه‌ر ئه‌م مه‌سه‌له‌یه‌ ته‌نیا به‌ درۆكردن خزمه‌ت بكرێت؟ كه‌واته‌ درۆ ده‌كه‌ین. 

ئه‌حمه‌د سه‌عید ئه‌م دنیایه‌ى ئێمه‌ى به‌جێهێشت، به‌ڵام هێشتا ئه‌حمه‌د سه‌عید-ى تر ماوه‌ كه‌ به‌ زه‌حمه‌ت نه‌بێت نامرێت. خۆى له‌و پره‌نسیپ و بنه‌مایه‌دا به‌رجه‌سته‌ ده‌كات كه‌ خزمه‌تى مه‌سه‌له‌كه‌ به‌ درۆ ده‌كات و سه‌ره‌نجام به‌ به‌رده‌وامى و به‌ هه‌میشه‌یى شكست و دۆڕانه‌كه‌ ده‌گۆڕێت بۆ سه‌ركه‌وتن. ئه‌م ئه‌حمه‌د سه‌عید-ه‌ى كه‌ به‌ زه‌حمه‌ت نه‌بێت نامرێت، جارێكى تر له‌ به‌غدا بینیمانه‌وه‌ له‌گه‌ڵ ئه‌و (سه‌ركه‌وتن)انه‌ى كه‌ سه‌دام حسێن له‌ دژى ئه‌مریكیه‌كان به‌ده‌ستیده‌هێنان. دواى ماوه‌یه‌ك له‌ لوبنان بینیمانه‌وه‌ له‌گه‌ڵ (سه‌ركه‌وتنى خوایى) و كۆتاییهاتنى (سه‌رده‌مى دۆڕانه‌كان). بێگومان ئه‌وه‌یش له‌بیرناچێته‌وه‌ كه‌ میدیاى فه‌رمیى سوریا چۆن حافز ئه‌سه‌د-ى كرده‌ (پاڵه‌وانى جۆلان) كاتێك وه‌ك وه‌زیرى به‌رگریى سه‌رپه‌رشتیى له‌ده‌ستدانى جۆلان-ى ده‌كرد. ئه‌مانه‌ ره‌نگه‌ حاڵه‌ته‌ دیاره‌كان بن، ئه‌گه‌ر تاك و ته‌راكان-یش نه‌بن بۆ ئه‌و ئه‌حمه‌د سه‌عید-انه‌ى كه‌ له‌ جیهانى عه‌ره‌بیدان.

به‌ڵام بۆچى ئه‌م هه‌موو درۆیه‌ كراونه‌ته‌ مه‌رج بۆ خزمه‌تكردنى مه‌سه‌له‌كه‌؟ ئایا ناكرێت بگۆڕدرێن به‌ مه‌سه‌له‌گه‌لێكى واى كه‌ به‌ هه‌ندێك راستى یاخود هه‌ندێك راستگۆیى خزمه‌ت بكرێن؟ پاشان بۆچى ئه‌و درۆیه‌ به‌درۆبخرێته‌وه‌ كه‌ كه‌س بڕواى پێناكات، ئه‌مه‌ له‌كاتێكدا كه‌ واپێویست ده‌كات هه‌موان بڕواى پێبكه‌ن؟
 سه‌رچاوه‌ى یه‌كه‌مى درۆ ئه‌وه‌یه‌ سوودمه‌نده‌كانى ئه‌و مه‌سه‌لانه‌ شتێك ده‌كه‌ن كه‌ ناكرێت. جه‌نگێك به‌رپا ده‌كه‌ن كه‌ ناكرێن. سته‌م له‌ گه‌لانێك ده‌كه‌ن و تاڵانیان ده‌كه‌ن به‌جۆرێك كه‌ درۆ ببێته‌ پێویستییه‌ك بۆ پاساوى كارى گه‌وره‌كان. به‌ زۆرى زۆردارى و به‌ناوى مه‌سه‌له‌كانیانه‌وه‌ (نوێنه‌رایه‌تى) ئه‌و گه‌لانه‌ ده‌كه‌ن. له‌ كۆتاییشدا له‌ جه‌نگه‌كانیاندا ده‌دۆڕێن، دۆڕانێكى ده‌نگده‌ره‌وه‌.
 كه‌واته‌ ئاخۆ ئه‌و قسه‌یه‌ زیاده‌ڕه‌ویى تێدایه‌ كه‌ ده‌ڵێت ئه‌و مه‌سه‌لانه‌ى كه‌ بوار ده‌درێت ئه‌مه‌یان به‌ناوه‌وه‌ بكرێت، ده‌بێت بكشێنرێنه‌وه‌ و ده‌ستاوده‌ستیان پێنه‌كرێت. چونكه‌ بڕوبیانووى ئه‌و مه‌سه‌لانه‌ به‌م شێوه‌یه‌ جارێك و دووجار نه‌بووه‌. ئه‌وه‌ تاقه‌ شتێكه‌ كه‌ رووده‌دات.
له‌ڕاستیدا ئه‌و مه‌سه‌لانه‌ى كه‌ هه‌موو شتێك له‌ پێناویدا رێگه‌پێدراوه‌، مه‌سه‌له‌گه‌لێكى مردوون و هیچیان به‌ زیندوێتى نامێنێته‌وه‌ مه‌گه‌ر درۆكردن به‌ناویانه‌وه‌ و پاشان ده‌مارگیریى به‌ لاشه‌ هه‌لاهه‌لاكه‌یه‌وه‌.

شتێكى ترى ناكۆك و ناجۆر ئه‌وه‌یه‌ كه‌ گرنگ نییه‌ خه‌ڵكى له‌ ناخى خۆیاندا بڕوا به‌ درۆ بكه‌ن. خه‌ڵكیى ده‌سته‌مۆ و كۆیله‌كراو و نه‌گونجاو ناتوانن هیچ شتێك بكه‌ن، ئیتر بڕوا به‌ درۆكه‌ بكه‌ن یان بڕواى پێنه‌كه‌ن. هه‌ر داواى ئه‌وه‌یان لێده‌كرێت كه‌ به‌جۆرێك ره‌فتار بكه‌ن (وه‌ك ئه‌وه‌ى) بڕوایان كردبێت. واتا له‌گه‌ڵ درۆدا بێنه‌وه‌ و خۆیان بگونجێنن به‌ گوێره‌ى ئه‌وه‌ى كه‌ خاتوو لیزا ویدین-ى توێژه‌رى ئه‌مریكى ناوى ناوه‌ (وه‌ك ئه‌وه‌ى). گرنگ ئه‌وه‌یه‌ به‌ ئاشكرا درۆكه‌ به‌درۆنه‌خه‌نه‌وه‌ و بوارى پێبده‌ن كه‌ به‌بێ گرفت بڕوات بۆ پاڵپشتى و به‌هێزبوونى لایه‌نگره‌كانى و شوێنكه‌وتوو و په‌یڕه‌وكه‌رانى ئه‌م چه‌كه‌ كاریگه‌ر و نیشانپێكه‌. 
به‌ڵام وه‌ختێك كاره‌كه‌ ئاشكرا ده‌بێت و رژێمى به‌رهه‌مهێنه‌رى درۆ به‌ ته‌واوى هه‌ره‌س دێنێت و كۆتایى دێت، رۆشنبیرییه‌كى درۆزن بۆ فریاكه‌وتنمان هه‌ڵده‌كاته‌وه‌ و دوژمنه‌كان و پیلانگێڕییه‌كان تۆمه‌تبار ده‌كه‌ن و خۆیان به‌ قوربانیى ده‌زانن. ئه‌مه‌ له‌ چاوه‌ڕوانیى گه‌ڕ و خولێكى تازه‌ى درۆكردندا كه‌ نه‌وه‌كان ده‌ستى پێده‌كه‌ن وه‌ك چۆن باوكى ئه‌مان بۆ باوكى خۆیانیان كردووه‌. 

created by Avesta Group and powered by Microsoft Azure