هاوڕێ‌ راستەقینەكانمان

بۆچوون / بیروڕا :: 21/05/2018

سەرچاوە: ئەلسەباح ئەلجەدید
وەرگێڕان: لوقمان محەمەد رەشید

پێش چەند رۆژێك لەمەوبەر، لەگەڵ كچە هاوڕێیەكی ئازیزمدا لە چێشتخانەیەكی خۆرهەڵاتی شێومان دەكرد و لەولایشمانەوە دوو كیژۆڵە چاویان بڕیبووە مۆبایلەكانیان و وێنەی خۆیان و ژەمە خۆراكەكەیان دەگرت بێ‌ ئەوەی هیچیان تاقە وشەیەك قسە لەگەڵ ئەویدییاندا بكات. بە نزیكەیی سەعاتێك لەوێ‌ ماینەوە، بە درێژایی هەموو ئەو كاتە دوو كچەكە وێنەیان دەگرت و بزەی دروستكراو و زەردەخەنەی درۆزنانەیان دەخستە سەر سیمای خۆیان. هەر خەریكی ئەمە بوون. بە هاوڕێكەمم وت: دڵنیام ئەم وێنانەیان دەخەنە فەیسبووك یان تویتەر بۆ ئەوەی هاوڕێ‌ گریمانەییەكان (بەناو هاوڕێ‌)كان سەرسامیی خۆیانیان بۆ بنووسن.

وەك رۆژانی سەردەمی ئێمە، ئەلبووم نەماوە تا وێنەكانی بۆ یادگاریی تێدا هەڵبگرین و بیانپارێزین. پەیوەندییە مرۆییەكان زۆر گۆڕاون، لەگەڵ ئەو پەیوەندییە كۆمەڵایەتیانەدا كە بێ‌ ئەوەی پێی بزانین ژیانی لێ‌ داگیركردووین و وای لێكردووین بایەخ بدەین بە بەسەربردنی كات لەگەڵ خۆماندا نەك لەگەڵ ئەوانەی خۆشماندەوێن، ئەمەیش لەبەرئەوەی جیهانی گریمانەیی بەلامانەوە گرنگترە لە جیهانە راستەقینەییەكە و هاوڕێی گریمانەیمان زۆر زیاتر بوون لە هاوڕێ‌ راستەقینەكانمان.

بە دەربڕینێكی روونتر، لەبیرمانچووە كە ئێمە مرۆڤین و دڵمان هەیە و هەستمان هەیە و سۆزمان هەیە، گۆڕدراوین بۆ ئامێرێكی بەرنامەڕێژكراوی وا كە كارلێكەكانمان لەڕێی تەكنۆلۆژیاوە زاڵ بووە بەسەر كارلێكە راستەقینە مرۆییەكانماندا و ژیانێكی گریمانەیی زاڵبووە بەسەر ژیانە راستەقینەكەماندا. شتێكی ناخۆشیش، ئەوەیە كە ئێمە پەی بە ئاستی كاریگەریی ئەم گۆڕانكارییە لە سەر دڵ و دەروونمان، نابەین.
 
پێشتر پەیوەندییە مرۆییەكان سادە و ساكار بوون، هاوڕێی كوڕ و كچمان هەبوو، ناسیاو و خزم، باوان و منداڵەكانیان، بەڵام ئێستا فەیسبووك و تویتەر و یوتیوب و لینكد و گوگڵ پڵەس و تەمبلر و ئینتستگرام و مای سپەیس-مان هەیە، ئەم ئامرازگەلە تەكنۆلۆژیانە جێگەی ئەوانی گرتووەتەوە و لەگەڵیشاندا بایەخی پەیوەندییە سروشتیەكانیشمان لەدەستداوە. 

ئایا زیادەڕۆیی دەكەم ئەگەر بڵێم ئێمە پێویستمان بەوەیە چۆنیەتی دۆزینەوەی جیاوازیی نێوان هاوڕێ‌ راستەقینەكان و هاوڕێ‌ گریمانەییەكان (بەناو هاوڕێكان) فێر ببین؟ جیاوازیی نێوان ئەو هاوڕێیانەمان بزانین كە خۆشیاندەوێین و بایەخ و گرنگیمان پێدەدەن لەگەڵ ئەو كەسانەی كە حەز دەكەن لەسەر لاپەڕەكانی ئەم ئامرازانە بەشداریمان بكەن؟ ئەی ئیتر ژیان چ مانایەكی هەیە بەبێ‌ هاوڕێیەتیی راستەقینە و راستگۆیی واتادار؟ ژیان چییە بەبێ‌ خۆشەویستی و هاوڕێی منداڵی كە لێیانەوە جوانیی خەڵك و جیهان و شتەكان ببینین؟
هاوڕێیەتیی راستەقینە لەوە زەحمەت و قورسترە كە پێناسە یان راڤە بكرێت. شتێكە لە قوتابخانەوە فێری نابین، بەڵام ئەگەر فێری مانای هاوڕێیەتی نەبین، وەك ئەوە وایە فێری هیچ شتێك نەبووبین.
 
هاوڕێیەتی ئەو ئاگرەیە كە لە ناخمانەوە هەڵدەگیرسێت و كڵپە دەكات و دەتەقێتەوە كاتێك بەو كەسانە دەگەین كە گرنگیمان پێدەدەن، ئەوانەی هەڵمانبژاردوون و هەڵیانبژاردووین تا هاوڕێی یەكتر بین و لە پێناویاندا بژین و لە پێناوماندا بژین.
 
هاوڕێیەتیی راستەقینە ئەو موگناتیسەیە كە كەسە راستگۆ و دڵسۆزەكان رادەكێشێت و دەیانخاتە دڵمانەوە. بۆ خۆشبەختی، هێشتا هاوڕێی باش ماون، ئەگەرچی وەك پارچەی ئەڵماسی خاو كەم و دەگمەنن. بەڵێ‌، فێری بەكارهێنانی تەكنۆلۆژیا دەبین بەڵام ناهێڵین تەكنۆلۆژیا بەكارمان بێنێت. 






created by Avesta Group and powered by Microsoft Azure