dwarozh

سەیر و سەمەرەكانی جامی كەنداوی عەرەبی

بۆچوون / بیروڕا :: 04/01/2018

جامی كەنداوی عەرەبی بۆ تۆپی پێ‌، بیرۆكەی وڵاتی بەحرەین ‌و ساڵی 1970 یەكەم خولی لەوڵاتەكەی خۆیدا بە بەشداریی چوار وڵاتی كەنداو ئەنجامدا ‌و وڵاتی كوەیت بووە پاڵەوانی خولەكە ‌و بڕیاریشیاندا ئەم خولە بەردەوام بێت.

لەگەڵ ئەو ئیمكانیاتە تەكنیكی ‌و ئیعلامی ‌و كارگێڕییە باشانەی ئەم وڵاتانەی كەنداو بۆیان فەراهەمكراوە ‌و دوای 48 ساڵ لە بەردەوامی ئەم خولە، كەچی هێشتا لەئاستی پێویستدا نین ‌و خولەكان ساڵ بەساڵ ئاستیان لە رووی هونەری ‌و رێكخستن ‌و تەنانەت راگەیاندنیشەوە بەرەو دواوە دەڕوات ‌و نەیانتوانیوە سوود لە هەڵەكانیان وەربگرن ‌و رێكخستنێكی تۆكمەی بۆ دابنێن.

ئەوەتا ساڵی 1970 كە یەكەم خول بووە ‌و بڕیاریانداوە كە دوو ساڵا جارێك بكرێت، تا ساڵی 1976 بە رێكوپێكی دوو ساڵ دوو ساڵ بەردەوام بووە، دواتر بووە بە سێ‌ ساڵ، واتە لە ساڵی 1979 ‌و 1982 دا خولەكە ئەنجامدراوە، دواتر بووەتەوە بە دوو ساڵ 1984 تا 1998 دوو ساڵ دوو ساڵ بەڕێوەچووە، دواتر بووە بە چوار ساڵ واتە ساڵی 2002 ئەنجامدراوە، دوای ئەمەش بووە بە ساڵانە 2003 ‌و 2004 بە دوای یەكدا كراوە، پاشان بۆتەوە بە سێ‌ ساڵ 2007 كراوە، ئینجا بۆتەوە بە دوو ساڵ 2009، دواتر بۆتەوە بەساڵانە 2010یش كراوە، ئینجا بووەتەوە بە سێ‌ ساڵ 2013 ئەنجامدراوە ‌و پاشان بۆتەوە بە ساڵانە 2014 كراوە، ئینجا بووەتەوە بە سێ‌ ساڵ 2017 كە ئێستا لە كوەیت بەڕێوەدەچێت ‌و تەنها یاریی كۆتایی ماوە.

سیستمی بەڕێوەچوونی ئەم خولە لەسەرەتادا (دەوری) بووە ‌و لە ساڵی 2004دا سیستمی یارییەكان بووە بە دوو كۆمەڵە، ئیتر نازانم گرنگیی رێكنەخستنی ئەمە لەچیدایە، ئەگەر بڵێین ساڵانی حەفتاكان بارودۆخی ئەو وڵاتانە خراپ بووە كە واش نییە، ئەی بۆ لە ساڵانی دوو هەزارەكاندا هەر بەهەمان ناڕێكوپێكییە.

ئەمە جگە لەوەی هەر ساڵە ‌و ژمارەی وڵاتە بەشداربووەكان جیاواز بووە، ساڵێك چوار بووە ‌و دواتر بووە بە پێنج ‌و دواتر بووە بە هەر حەوت وڵاتەكەی كەنداو ‌و ساڵێك كوەیت ‌و ساڵێكی تر سعودیە ‌و عیراق بەهۆكاری جیاجیا پاشەكشەیان لە خولەكە كردووە ‌و ساڵی 1992 عێراقیان بەهۆی شەڕی كەنداوەوە، لە خولەكە دەركردووە ‌و ساڵی 2003 وڵاتی یەمەن كە ناكەوێتە سەر ناوچەی كەنداوی عەرەبی، بەشدارییان پێكردووە ‌و ساڵی 2004 عێراق گەڕاوەتەوە ناو خولەكە. لە هەمووی خۆشتر تا ئێستا شەش جار دیزاینی (جامەکە)گۆڕانكاریی بەسەر هاتووە ‌و هەر  وڵاتێك كە خولەكەی تیاكرابێت، بە هەوەسی خۆی دیزاینی بۆ كردووە.

من لە ساڵی 1984 ەوە سەیری ئەم خولە دەكەم ئەویش بە بەردەوامی نا، بەڵام ئەتوانم بڵێم زۆرێك لە یارییەكانیم بینیوە، ئەمساڵیش كە سەیری یارییەكانیم كرد وام ئەزانی هەر ساڵی 1984ە. سیستمی (پێوەی نێ‌-مەلعەبەكەیە) لە ئاستی یاریكەرەكاندا بەردەوام بوو، واتە ئاست ‌و تەكنیكی یاریكەرەكان هەمان ئاست ‌و تەكنیكی ساڵی 84 ە، ئەمە جگە لەوەی تا ئێستا لە تیپی تۆپێ‌ پێی ئەم وڵاتانەدا یاریكەری بەرگریی (ماڵی گۆڵ)یان لێدەدا ‌و لەم خولەی ئەمساڵدا وەك ئەوەی باوە بەدی ناكرێت كە لۆگۆی خولەكە لەسەر درێسەكانیان هەبێت، نەك هەر ئەوە، بەڵكو هەر تیپێك بەویستی خۆی درێسەكانی پۆشیوە كە هەمووی دوو رەنگە (سپی ‌و سور) ئەمە جگە لەوەی تیپ هەیە ناوی یاریكەرەكە لە پشتی درێسەكەی نوسراوە، تیپیش هەیە ناوی وڵاتەكەی نوسیوە ‌و تیپی تریش هەیە هەر هیچی لێنەنووسیوە.

لەگەڵا ئەو ماكینە ئیعلامییە زەبەلاحانەی ئەو وڵاتانەی كەنداو هەیانە، كەچی ژمارەی جەماوەری یارییەكانی ئەم خولە لە تەماشاكەرانی دوو تیپی میلـلی خۆمان تێپەڕ ناكات، ئەوەش بە درێژایی ئەو خولانەی من بینیومە.

هیوادارم رێكخەرانی ئەم خولە بیرێك لە رێكخستنێكی تۆكمە ‌و باشی بكەنەوە ‌و هەوڵبدەن لەو ئاستەی ئێستا ‌و رابردوو هەیبووە بەرزتری بكەنەوە، ئەگەرنا رایبگرن ‌و كۆتایی بەم خولە بهێنن كە بەداخەوە ئەم خولەیان بۆ ئاستی تیپی تازەپێگەیشتوانیش كردۆتەوە.

created by Avesta Group and powered by Microsoft Azure