dwarozh

به‌رشه‌لۆنه‌ چۆن كلاسیكۆی برده‌وه‌؟

بۆچوون / بیروڕا :: 24/12/2017


زیدان بۆ بردنه‌وه‌ و ده‌سته‌به‌ركردنی سێ‌ خاڵی یارییه‌كه‌، گرنگبوو به‌ (bbc) یاریی بكردایه‌، چونكه‌ هه‌میشه‌ ئه‌و سێ‌ یاریزانه‌ دووانیان به‌ باشی خوێندنه‌وه‌ بۆ باردۆخی یارییه‌كان ده‌كه‌ن و گۆڵكردنیش لایان ئاسانتره‌، لانیكه‌م ده‌توانن كه‌متر تۆپه‌كان به‌ هه‌ده‌ربده‌ن.
 له‌ به‌رامبه‌ردا ڤالڤێردی تیپه‌كه‌ی گوشارێكی زۆری له‌سه‌ربوو، ئه‌وه‌ش وایكردبوو تا ده‌رفه‌تی گونجاویان بۆ نه‌ڕه‌خسێت هێرش دروست نه‌كه‌ن، كه‌ ئه‌وه‌ش ئه‌مڕۆ خاڵی سه‌ركه‌وتنی ئه‌و تیپه‌بوو، هه‌روه‌ها یانه‌ی بلوگرانه‌ سوودی زۆریان له‌كه‌م ته‌ركیزی یاریزانه‌كانی ڕیاڵ و له‌ده‌ستدانی تۆپه‌كانی ناوچه‌ی سزا بینی، بێجگه‌ له‌وه‌ ناوه‌ڕاستكارانی به‌رشه‌لۆنە ده‌رچوون و یاریكردنیان سنوورداربوو، به‌ تایبه‌تی له‌ گێمی یه‌كه‌م ته‌نیا به‌ ڕێگای هاویشتنی تۆپی درێژ و به‌ چه‌ند پاسێكی كورت، له‌ چه‌ند جێگایه‌كی كه‌می یاریگا ده‌چوونه‌ سه‌ر تیپی ڕكابه‌ر. ده‌ستوری یاریكردنی یانه‌ی به‌ره‌شه‌لۆنه‌ له‌ (90) خوله‌كدا ته‌نیا هێرشبردنه‌، به‌ڵام جوڵه‌كانی ئه‌مرۆیان هێمن و داهێنانه‌بوو.

ڕامۆس و ڤاران هاوشێوه‌ی یارییه‌كانی پێشوو له‌ جێگای خۆیان نه‌ده‌مانه‌وه‌، یان كه‌متر چاودێری سوارێزیان ده‌كرد، كه‌ ئه‌وه‌ش وایكردبوو رۆبێرتۆ به‌ به‌رده‌وامی كۆمه‌كی سوارێز به‌ تۆپه‌ زه‌مینی و ئاسمانییه‌كان بكات، كه‌ ئه‌و یاریزانه‌ش تا هێنانی گۆڵی یه‌كه‌م به‌بێ‌ چاودێریكردن یاریی ده‌كرد، هه‌روه‌ها تا گۆڵی یه‌كه‌م راكیتیچ ته‌نیا تۆپه‌كانی ده‌خسته‌ لا ته‌نیشته‌كان، به‌ڵام كاتێك میسی به‌ ته‌نیا گه‌مارۆ درابوو، یاریزانه‌كانی به‌رشەلۆنە‌ سوودی زۆریان له‌و قه‌ره‌باڵغییه‌ی ده‌وری كێچه‌كه‌ ده‌بینی، به‌ تایبه‌تی گۆڵی یه‌كه‌م و گه‌یشتن به‌ ناوه‌ڕاستی یاریگا و بۆشایی زۆر، له‌ قوڵایی به‌رگری ریاڵ راستی بابه‌ته‌كه‌مان بۆ ده‌رده‌خات.

 پێكهاته‌ی یانه‌ی به‌رشه‌لۆنه‌ زیاتر رێكخرابوو له‌ چوارچێوه‌ی به‌رگریدا، هه‌روه‌ها پێكهاتبوو له‌ سێ‌ یاریزانی به‌جوڵه‌ی وه‌كو (ئینێستا، راكیتیچ، بۆسكێتس)...، هه‌روه‌ها پاولینهۆی راسپاردبوو له‌ پشتی میسی و سوارێزه‌وه‌ یاریی بكات، تا بتوانێت ده‌ست بخاته‌ نێو هه‌موو تۆپه‌كانی یانه‌ی ریاڵه‌وه‌، جگه‌ له‌مانه‌ رۆبێرتۆ ئه‌ركی ئاسانبوو، كه‌ زیاتر رۆڵی یاریزانی ناوچه‌یی ده‌بینی، یاخود ڤالڤێری له‌ گێمی یه‌كه‌م كاری له‌سه‌ر ئه‌وه‌ كردبوو به‌خێرایی تۆپه‌كان بخه‌نه‌ سه‌ر تیپی به‌رامبه‌ر و كه‌متر خۆیان به‌ نیوه‌ یاریگای ریاڵه‌وه‌ خه‌ریك بكه‌ن، به‌ڵام زێدان هه‌رسێ‌ یاریزان (مۆدریچ و كاسێمێرۆ و كۆڤاسیچی) راسپاردبوو یارمه‌تی هێڵی هێرشبردن بده‌ن، له‌كاتێكدا به‌هۆی رۆیشتنی كاسێمێرۆ بۆ پێشه‌وه‌ قوڵایی دڵی به‌رگری یانه‌ی مێره‌نگی به‌ بۆشی ده‌مایه‌وه‌، به‌ تایبه‌تی به‌هۆی لاوازی به‌رگری كارڤاخال و یارمه‌تینه‌دانی مارسیلۆوه‌، رووبه‌رێكی زۆر له‌ نێوان ڤاران و رامۆسدا هه‌بوو، كه‌ ئه‌وه‌ش وایكردبوو شێوه‌ی یاریی ریاڵ له‌ (4،3،3) بگۆڕێت بۆ پلانی دیكه‌.

ده‌ركردنی كارڤاخال هه‌موو ژماره‌كانی زیزۆی تێكدا، هه‌روه‌ها ئه‌و راهێنه‌ره‌ دره‌نگ ناچۆ و بەیڵی خسته‌ یاریگاوه‌، كه‌ گرنگبوو به‌ هاتنەدەرەوەی بنزیما هه‌ریه‌كه‌ له‌ بەیڵ و ئه‌سینسیۆ و رۆناڵدۆ سیانه‌ی پێشه‌وه‌یان پێكبهێنایه‌، یاخود یاریكردنی ناچۆ زیاتر بۆ پارسه‌نگی یاریی یانه‌كه‌بووایه‌، كه‌واته‌ گۆرانكارییه‌كانی زێدان دره‌نگ و هه‌ڵه‌بوو، له‌ به‌رامبه‌ردا راهێنه‌ری به‌رشه‌لۆنه‌ زیره‌كانه‌ گۆڕانكارییه‌كانی ئه‌نجامدا، كه‌ بۆ گۆڵكردن نه‌بوو، به‌ڵكو زیاتر بۆ پارستنی لایه‌نی جه‌سته‌ی یاریزانه‌كانبوو، كه‌ ئه‌وه‌ش پێمان ده‌ڵێت تا ئێستا قورسایی و خوێندنه‌وه‌ی راهێنه‌ره‌كه‌ی به‌رشه‌لۆنه‌ زیاتره‌ له‌وه‌ی ڕیاڵ مەدرید.

created by Avesta Group and powered by Microsoft Azure