dwarozh

نهێنی ئاست بەرزی چێڵسی لەم وەرزە لەچیدایە؟

بۆچوون / بیروڕا :: 16/01/2017


وەرزی رابردوو یانەی چێڵسی لەگەڵ خۆسیە مۆرینهۆ هیچ دەستكەوتێكی بەدەست نەهێنا، دەستەی كارگێڕی یانەكە بۆندی لەگەڵ ئەنتۆنیۆ كۆنتی راهێنەری ئیتاڵی كرد، ئەو راهێنەرە هونەری مامەڵەكردنی لەگەڵ یاریزانان هەیە و توانی متمانە بۆ یانەكە بگەڕێنێتەوە، وا لە یاریزانەكان بكات یاری بەكۆمەڵیان خۆش بوێت، عەقلیەتی كۆنتی تا ڕادەیەك لە مۆرینهۆ و راهێنەرەكانی تر جیاوازترە، هەموو ئەو گۆڕانكارییانە كاریگەری كردە سەر لایەنی دەروونی و هونەری و مەعنوی یاریزانان.
-      چێڵسی بۆندی لەگەڵ نگولو كانتی ناوەراستكاری پێشووی یانەی لیستەر سیتی كرد، ئەو یاریزانە ئەركی بەرگری و هێرشبردن لەیەك كاتدا بە تەواوی جێبەجێ دەكات، لەگەڵ یاریزانەكانی تر وەكو ڤیكتۆر مۆسیس و ماركۆس ئەلۆنسۆی ئیسپانی باڵەكان و ناوەراستییان ئەكتیڤ كردووە، هەروەها یانەی بلوز بۆندی لەگەڵ داڤید لویز بەرگریكاری پاریس سان جێرمان كرد، ئەو یاریزانەی كە توانی قەرەبووی جۆن تێری بەزیادەوە بكات و لەگەڵ گاری كاهیل ئاستی بەرز پێشكەش دەكەن.
-      كۆنتی لەم وەرزەی پریمەرلیگ تا ئێستا بە تاكیتكی 3-4-3 یاری دەكات لەجیاتی تاكتیكی 4-2-3-1 كە پێشتر مۆرینهۆ پشتی پێ دەبەستا.
-      وەرزی رابردوو بەهۆی هەبونی كێشەی كەسی لەگەڵ مۆرینهۆ هەریەكە لە دیگۆ كۆستا و پیدرۆ رۆدرێگز و ئیدین هازارد ئاستیان وەكو پێویست نەبوو، بەڵام لەم وەرزەدا ئەو سێ یاریزانە لەژێر سەرپەرشتی كۆنتی بە ئاسودەیی یاری دەكەن.
-      پاش ئەوەی ریزی یانەی بارسێلۆنای جێهێشت و پەیوەندی بە چێڵسی كرد، ئاستی پیدرۆ رۆدرێگز دابەزی و پێگەی خۆی لە پێكهاتەی سەرەكی لەدەست دا، لەگەڵ هاتنی ئەنتۆنیۆ كۆنتی متمانە بۆ پیدرۆ گەڕایەوە بەتایبەتی لە تاكتیكی 3-4-3 ئەو یاریزانە ئێستا خۆی گونجاندووە و  بۆتە یاریزانی سەرەكی كۆنتی و لەزۆربەی یارییەكاندا گۆڵ تۆمار دەكات.
-      هەماهەنگی و لەیەكتر گەیشتن و جێبەجێكردنی رێنماییەكانی كۆنتی بەشێوەی دروست، ئاستی هونەری یانەكەی بەرز كردۆتەوە لەم وەرزەی پریمەرلیگ و بەدەستهێنانی بردنەوە لەدوای بردنەوە.

created by Avesta Group and powered by Microsoft Azure