dwarozh

كێ میدیاكاری وەرزشی ساڵە؟!

بۆچوون / بیروڕا :: 03/01/2017

 پرسیارێكی ئاسان و وەڵامدانەوەیەكی قورس، چونكە تائێستاش پرۆسەیەكی فەڕمی وانەكراوە كە باشترین میدیاكاری وەرزشی ساڵی تێدا هەڵبژێردرێت، دەتوانین هۆكارەكەشی بكەین بە بەڵگەیەكی واقیعی، ئەویش نەبوونی دەزگایەك یاخود تۆڕێكی تایبەتمەنیدی میدیای وەرزشی سەربەخۆ و پڕۆفیشناڵ و ئەكادیمی، یان رێكخراوێكی تایبەتمەندی میدیایی وەرزشی كەبتوانێت ئەم پرۆسەیە بەڕێوەببات.

هەرچەندە لەوڵاتانی جیهاندا ئەم پرۆسەیەكاڵ بۆتەوە، كاركردن لەمیدیای وەرزشی لەجیهاندا بۆتە دوو كۆمەڵە، یەكەمیان چەند دەزگایەكی میدیای وەرزشی حكومی و ئەوانی تر هەمووی كۆمپانیای وەرزشی و میدیای وەرزشییە، بەڵام لەهەرێمی كوردستاندا حەوت بەشە ئەوانیش (حكومی، حزبی، ئەهلی، دەزگای وەرزشی، یەكێتییە وەرزشییەكان، یانەكان، سەربەخۆكان، ئەوانەی لەم حەوت بەشە كاردەكەن دەتوانن ساڵانە خەڵات بكرێن لەسەر ئاستی نێو كۆمپانیا یان شارەكەدا، بەڵام بەهۆی نەبوونی پرۆسەیەكی ئاوا ناچارین پشت بە پرۆسەی میدیاكارانی وەرزشی جیهانی و كیشوەریی ببەستین، باشترین و یاخود پیِشەنگی میدیاكارانی وەرزشی ساڵ لەوڵاتان بەمشێوەیەیه، كاری دەگمەن و ناوازە و مەترسیدار و هەڵماڵینی نهێنی گەندەڵیی زەبەلاح كە ببێتە مایەی چارەسەركردنی كێشەیەكی ئاڵۆز و ئەستەم، قازانج و سوودی بۆ گەڵ و وڵاتەكە بگەڕێتەوە، هەروەها بەرهەمهێنانی كارێكی قوڕس و ئەنجامدانی پرۆژەیەكی چاوەڕوان نەكراو و بەدەستهێنانی خەڵاتێكی دەرەوەی وڵات وەكو باشترین میدیاكاری وەرزشی لەپاڵەوانیەتییەك كەئەمەش دەبێتە پێوەرێك بۆ ئەوەی پاڵێوراوبێت لەوڵاتی خۆت. بەڵام دەپرسین لەكوردستاندا ئەم شێوە كارانەمان كردووە؟!، میدیاكاری وەرزشی ژاپۆنی ( هیرۆشی كاجاوا) لەتەمەنی (90) ساڵیدا كە ساڵی 2015 خەڵاتی تایبەتی فیفای وەرگرت، وڵاتی ژاپۆنی فێركرد چۆن تۆپی پێیان خۆش بوێت، سەرەڕای ئەمانەش لەوڵاتی خۆمان ساڵانە دیاردەی (دیاری پێدان و بڕوانامە، خەڵاتكردن، رێزلێنان) ئەنجامدەدرێن، بەڵام تەنها ناو و رازیكردن و ریكلامە، هیچ یاسا و پێوەرێكی ستاندەری تێدانییە. هەرچۆن بەپرسیار دەستم بەنووسینەكەم كرد، بەهەمان شێوەش كۆتایی پێدێنم و دەڵێم كێ میدیاكاری وەرزشی ساڵە؟!.

created by Avesta Group and powered by Microsoft Azure