dwarozh

راهێنەرو یاریزانە لاوەكان سەلماندیان كە كوڕی رۆژی تەنگانەن

بۆچوون / بیروڕا :: 03/01/2017

ئەگەر چی قەیرانی دارایی زۆرێك لە كەرت و سێكتەرەكانی ژیانی گرتۆتەوە و كاریگەری لەسەر بژێو و قوتی خەڵكی كوردستان هەبووە، وەرزشیش بەدەر نەبووە  لەم قەیرانە، بەڵام بەدیوێك خێری بۆ وەرزشوانە لاوەكان هەبووە كاتێك یانەكانی كوردستان بەهۆی ئەم قەیرانەوە زیاتر پشتیان بە یاریزانی خۆماڵی و لاو بەست و  ئەمەش بەهرەی هەندێك لە یاریزانەكانی دەرخست و یانەكانیان ناچاركرد بەجۆرێكی دیكە سەیری یاریزانانی خۆماڵی بكەن، تەنانەت ئەم یاریزانانە لە دوایدا ببنە یاریزانی سەرەكی یانەكانیان .
ئەم قەیرانە ئەو دەرفەتەی  بۆ یاریزانە لاوەكان ڕەخساند تا بیسەلمێنن كوری رۆژی تەنگانەن ،هاوشێوەی ئەو پەندەی دەڵێت "دووچاربوونی هەندێك كەس بە بەڵا بەخێر بۆ هەندێكی دیكە تەواو دەبێت" دەكرێت ئەم ئەزموونە بۆ ڕاهێنەرانیش بگوازرێتەوە و واز لە ئالۆگۆری ئەو پۆستانە بهێنین كە چەند ڕاهێنەرێك بەدەووری خولی كوردستان دەخولێنەوە .
بەنمونە ئەگەر ئەمساڵ ڕاهێنەرێك لە یانەیەكی شاری هەولێربێت ئەوا  سبەی لە یانەیەكی شاری سلێمانیە و كارگێری یانەكانیش تەنها چاویان ئەو ڕاهێنەرانە دەبینیێت كە سالانێكە پلانەكانیان لە خولی كوردستان ئاشكرابووە و هیچ گۆڕانكاریەكیشی بەسەر نەهاتووە  ،هاندەرانیش شارەزاییان لەسەر پلانەكان هەیە و دەزانن  ئەم ڕاهێنەرانە  بە چ پلانێك یاری دەكەن و شێوای یاریكردنیشیان دەزانن.


ئەمە جگە لەوەی لە یانەیەك شكستی هێناوە بۆچەند رۆژێكی دواتر لە یانەیكی تر كاری ڕاهێنەرایەتی پێ دەسپێردرێت بێ ئەوەی كارگێری یانەكان بیر لەوە بكەنەوە ئەم ڕاهێنەرە بەهۆی بێ ئەنجامی لەئەركەكەی دوورخراوەتەوە. پاشان ئایا دەبێت چی بۆ یانەكەی تۆ پێبێت لە كاتێكدا چەندین ڕاهێنەری لاوی بە توانا لە كوردستان بێ یانەیە و بە كۆمەلێك پلان دەخولێنەوە، هەروەك چەندین ڕاهێنەری ئەزموونداری  زۆرباشیش  هەن كە دەبێت سوود لە ئەزموونیان ببینین.
دەرفەت دان بەڕاهێنەری لاو لە كوردستان بۆتە سەركێشی و ژمارەی ئەو یانانەش كەمن كە دەتوانن ئەم بڕیارە بدەن، بەلام لە ئەوروپا ئەگەر سەیر بكەین ریال مەدرید بێ دوودڵی زیدان كردە ڕاهێنەر و ئەنجامەكانیشی  وەك كورد دەڵێت (هاوشێوەی مانگی چواردەیە و پێویستی بە پەنجەی دەست نیە)، هەمووان دەزانن پێش یانەی شاهانە یانەی بەرشلۆنە  دەرفەتی بە گواردیۆلادا و  دۆرتمۆندیش  ئەم دەرفەتەی بە یۆرگن كلۆپ بەخشی، لە كوردستانیش چەند نمونەیەكی زیندووی  كەم هەن ئەوانیش   سەركەوتووبوون .
لە ئێستادا لەم كوردستانە چەندین ڕاهێنەری لاوی بەتوانا بوونیان هەیە و بە ئاستی باشیشان دەتوانن گۆڕانكاری بەسەر ئاست و ئەنجامی یانەكان بهێنن و رووێكی دیكەی گەشیش بە تۆپی پێ ی كوردستان ببەخشن، لە هەمان كاتدا ئەم راهێنەرانە لە رێگایەكی ئەكادیمی دێنە ئەم گۆڕپانە .
ئەوەی سەرمان لێی دەرناچێت ئەوەیە  یانەكان ترسیان لە ڕاهێنەری لاو هەیە یان بڕیار بەدەستنین، یانیش بەگشتی یانەكان ترسیان لێنیشتوە و ناتوانن ئەم بریارە بدەن پشت بە ڕاهێنەری لاو یاخود ئەكادیمیی ببەستێت ، چونكە ئەوان تەنها ئەنجامیان دەوێت، باكیان بە پێشكەوتنی وەرزش نییە.
بڕواشمان وایە زۆربەی ڕاهێنەرە لاوەكان لەو ڕاهێنەرانە باشترن كە لە یانەیەكەوە بۆ یانەیەكی تر بە كۆمەڵێك شكستەوە ئالوگۆریان پێدەكرێت، نازانم ئەوانە گۆچانی سیحریان لە لایە بۆ ئەوەی بتوانن  بە چاوتروكانێك یانەكانی دیكە لە ئەنجامە خراپەكان رزگار بكەن لە كاتێكدا خۆیان لە خراپی كۆتایی بە ئەركەكانیان هێندراوە .


ئیتر با ئەم ڕاهێنەرانەش بیرێك بكەنەوە كە لەسەردەمی بێ ڕاهێنەری ئەوان پاڵەوان بوون ،بەلام ئێستا كۆمەلێك لاوی بەتوانا  دەیانەوێت بە زانستەكەیان خزمەتێك بە یانەكان و یاریزانانی كوردستان بكەن .
با ئەم پەندە كوردیەمان لەسەر جێ بەجێ نەبێت كەدەلێت :" كوێر تا ئەمرێ بەتامای دوو چاوی ساغە " ئێمەش تاكو كۆتایی چاومان لەوڕاهێنەرانە بێت .

created by Avesta Group and powered by Microsoft Azure