dwarozh

(كایەو سەبەتە) دوو زاراوەی وەرزشیی كوردی

بۆچوون / بیروڕا :: 29/12/2016

هەر میللەتێك شانازی بەزمانی خۆیەوە دەكاو هەوڵ ئەدا لەوشەی بیانی پاكی بكاتەوە، و لەزۆر وڵاتان زمان بەیاساو پارێزراوەو پێیان باش نیە وشەی بیانی بەكاربهێنن، ئێمەش كەدەزانین وشەیەك راست و ڕەوانە لەهەر بوارێك نابێ بوەستین هەتا (كۆڕی زانیاری كوردی) هەمان ڕاستیمان پێ رابگەیەنی، ڕۆشنبیری كوردیش كەدەوری خۆی دەبینێ و دەنوێنێ بەتایبەتی لەبارەی ڕێزمان و زمانەوانییەوە جێگای ڕێزە.
لەسەرەتاوە ئاماژەیەك پێویستە كەوا زۆر وشەی بیانی بەكاردێن لەبواری وەرزشی و بوارەكانی دی بەڵام ڕاستن و مەبەسەت دەگەینن وەك (فاوڵ و بەنەڵتی و ئۆف ساید...هتد) لێرە دەمەوێ باسی (٢) دوو وشە بكەم لەبواری وەرزشی كەوشەی كوردی نین و زۆریش بەكار دێن لەدەزگا ڕاگەیاندنەكانی وەرزشی و...هتد لەو كاتەی وشەی كوردی ڕێك لەجیاتیان دا هەیە یەكەمیان كەزۆر هەڵەیەو ناگونجێ لەگەڵ ئەو مەبەستەی كەبۆی بەكاردەهێنرێ وشەی (game) ی ئینگلیزیە كەئەو برایانەی بەكاری دەهێنن پێی دەڵێن (گێم) و مەبەستیشان (شوگ)ی عەرەبیە ئاشكرایە وشەی (game) (گێم) مانای یارییە بەكوردی و بەعەرەبیش مانای (لعب)یە؟ ئینگلیز بۆ خۆیان وشەی (game) لەجیاتی (شوگ) بەكار ناهێنن، بەڵكو بۆ نموونە لەتۆپی پێ لەجیاتی (شوگ) دەڵێن (first half) نیوەی یەكەم و یاخود (second half) نیوەی دووەم، عەرەیش ناڵێن (لعب)ە دەڵێن (شوگ) كوردیش لەكۆنەوە لەجیاتی (شوگ)  وشەی (یاری) بەكارهێناوە كەتەواو بەرامبەر وشەی (شوگ)ی عەرەبیەو لەئینگلیزیەكەشی ڕێك ترو چڕترەو لەهەندێگ لەفەرهەنگەكانیش باس كراوەو بۆ مانای تریش بەكاردێی بۆ نموونە:-
١- ئەو (كایە) باشمان یاری كرد، ئەم (كایە) باشتریش یاری دەكەین. ٢- ئەو (كایە) (١٠) خاڵیان وەرگرت ئەم كایە ناهێڵین (٦) شەش خاڵیش وەرگرن...هتد. ئیتر پێویستە ئەم ڕاستیە بزانین كەوا نە (كایە)و نە (شوگ) و نە (first half) مانایان (یاری و لعبەو گێم) نیە، بەڵكو هەرسێكیان ئەگەر پێناسەیان بكەین دەبینین (ماوەیەكی دیاری كراون لەیاری) چ بەكات یان بەخاڵ، وەك لەتۆپی پێی دیاریكراوە بە(٤٥) خولەك وە لەتۆپی بالەش بە(١٥) یان (٢٥) خاڵ...هتد بەڵام ئەگەر بمانەوێ (یاری و لعبەو گێم) پێناسەیان بكەین دەبینین بۆ نموونە یاری تۆپی پێ پێك هاتووە لەگۆڕەپانێكی لاكێشی گەورەو هێڵەكانی و دوو گۆڵ و دوو تیپ و ناوبژیوانی ناو گۆڕەپان و (٢) دووی سەرهێڵەكانی تەنیشت و یەك تۆپی پێ و...هتد. ئەمانە لەگەڵ ئەم هەموو یاسایانەی هەریەك لەمانە، هەموو ئەوانە پێیان دەوترێ (یاری و لعبە و گێم)ی تۆپی پێ.
وشەی دووەم هەروەها كەزۆر بەكاردێت وشەی (باسكە)یە كەبەمەبەستی برایان (Basket)ی ئینگلیزیە واتە (سەبەتە) عەرەبیش پێی دەڵێین (سلە) واتە (سەبەتە)، باشە ئێمەش بەكوردی بۆ پێی نەڵێین (سەبەتە)؟ لەدەرەوەی دەزگاكانی ڕۆشنبیری (tv – رادیۆ- ڕۆژنامە- گۆڤار...هتد) چەند كەسێك لەبرایان وشەی (گێم و باسكە) بەكاردەهێن بڵێین ئەوانە سەربەست و ئازادن، هەرچەندە ئەوانیش پێویستە ئەو هەڵەیە ڕاست بكەنەوە بەڵام باشترەو دەبێ لەدەزگاكانی فەرمی وشەی كوردی گونجاوو ڕاست بەكاربهێنرێ، دەشێ بڵێین خەڵك لەسەر ئەو (٢) دوو وشانە ڕانەهاتوونە، باشە ئێستا خەڵك چاك لەسەر وشەكانی (یاریزان و تیپ و گۆڕەپان...هتد) ڕاهاتوونە، كە جاران وشەكانی (لاعب و فریق و ساحە...هتد) بەكاردەهاتن ئیتر هەر لایەنێكی وەرزشی وشەی (كایەو سەبەتە) لەجیاتی (گێم و باسكە) بەكاربهێنێ هەڵەیەكی گەورە ڕاست دەكاتەوە هەروەها ئێمە هەموو دەزانین كە بەكارهێنانی وشەی كوردی راست و ڕەوان لەهەر بوارێك خزمەتی زمان و ڕۆشنبیری كوردییە.

created by Avesta Group and powered by Microsoft Azure