dwarozh

قەیرانی پسپۆر ومیدیای وەرزشی!

بۆچوون / بیروڕا :: 10/08/2016


لە ئاهەنگی كردنەوەی ئۆلۆمپیادی ریۆ دی جانیرۆی بەرازیلی 2016 زیاتر لە 200 وڵات بەشدارییان كرد، ئاڵای  یەك وڵاتی بەشدار بوو بە یاریزانێكی تۆپی پێ نەدرا،مانای ئەوەنیە لەبەهای تۆپی پێ كەم بكرێتەوە  و یاخود تۆپی پێ لە ئۆلۆمپیاد پشت گوێ خراوە،نەخێر بەڵكو  وەرزش بەمانا راستی ویەكسانیەكەی ئۆلۆمپیادە،چونكە هەموو وەرزشەكانی ئۆلۆمپیاد، جگە لەوەرزشەكانی دەرەوەی ئۆلۆمپیاد نەبێت لەیەك ئاستدا گرنگیان پێدەدرێت وبینەر وهەواداری خۆی هەیە.
با لە بەرازیل بگەڕێینەوە كوردستانی خۆمان،بۆ نێو  كەناڵە لۆكەڵیەكانی خۆمان،چونكە كەناڵەكانی ئاسمانی كوردی خۆمان بۆیان نیە یارییەكان بگوازنەوە،هۆكارەكەش دیارە و مافی گواستنەوەی یارییەكان بڕە پارەیەكی زۆر دەوێت ئێمەش تووشی قەیرانی گواستنەوەی یارییەكانیش بووینە،راستە هەندێك كەناڵی ئاسمانی هەواڵ و راستەوخۆی هەندێك یاخود بەشێك لەهەواڵەكانی ئۆلۆمپیاد دەكات بەڵام بەبەردەوامی نیە،بۆیە كەناڵە لۆكەڵییەكان دەبێت بزانن وەرزشی راستەقینە تەنها وەرزشێكی دیاریكراونیە،راستە تۆپی پێ پێشەنگە،بەڵام ئۆلۆمپیاد ئاسانترین و روونترین بەڵگەیە كە وەرزش هەمووی بەسوود و دڵرفێن وخۆش وكات بەسەربردن و گیانی وەرزشییەو هەروەها تێكڕایی وەرزشەكان هەوادار وهاندەر وبینەری خۆی هەیە،بێگومان جۆری وەرزشەكانیش رێژەی بینەری جیاوازە.
ئەوەی مەبەست وجێگای هەڵوەستەیە،لەگەڵ دەست پێكردنی ئۆلۆمپیادی ریۆ دی جانیرۆ ی بەرازیل من پێشبینم دەكرد لە بری كۆمێنتارێك یان شرۆڤەكارێك  (30) جۆر لەم بەرێزانە بێنە سەرشاشەی تیڤییەكان وهەر بەرێزێك بەجۆر وپسپۆڕی و زانستی وەرزشییەكەی شرۆڤە و کۆمێنتاری بكات لەسەر یارییەكانی ئۆلۆمپیاد،كەچی دوو دیمەنی سەردەمی ساڵانی نۆهەدەكانم بینی!،واتە لای ئێمە هیچ پێشكەوتن ودەكرێ بڵێین ژیان نەگۆڕاوە،ئەویش كەناڵەكان فیشە بۆ فیشە،واتە لەسەر زمانەكانی عەرەبی وئینگلیزی وزمانەكانی تر یارییەكانیان دەگواستەوە و دەشنووسن  راستەوخۆ!
دیمەنی دووەم  ئەو بەرێزانەی لە یۆرۆی فەرنسا وكۆپا ئەمەریكا بینیمان كە كاری شرۆڤەكاری و كۆمێنتاری وەرزشییان دەكرد وون بوونە! من ناڵێم هەموویان،هۆكارەكەی زۆربەداخەوە كەدەیڵێم وساڵانێكە باسمان كردووە ولە چەندین وەشان ورەخنەو ستوون وبابەتی میدیای وەرزشی جۆراوجۆرمان نووسیومانەو وباسكراوە،تا ئێستا لە وڵاتی من تۆپی پێ باوك سالاری  و بێ ركابەرە، بۆیە تەنها شرۆڤە وكۆمێنتاری وەرزشی بۆ تۆپی پێ دەكرێت،گەر وانیە بۆچی كەناڵەكان ئێمەی كورد چەندین كەسمان هەیە بڕوانامەی دكتۆر وماچستێر  وبروانامەی تریان هەیە،هەروەها چەندین میدیاكاری وەرزشی باشمان هەیەبۆچی بانگهێشتیان ناكەن هەر كەس وبەگوێرەی پسپۆڕی خۆی شرۆڤە وكۆمێنتاری خۆی بكات،یاخود دید وبۆچوونی خۆی پێشكەش بكات،بۆیە دەبێت دان بە راستیەك دابنێین كە ئێمە قەیرانی پسپۆڕی ومیدیاكاری وەرزشی ودەزكای میدیای وەرزشیمان هەیە،ئومێد دەكەم ئۆلۆمپیادی ریۆ دی جانیرۆ دواین قەیران بێت بۆ هەموومان وبەخۆمان دابچینەوە،رووەو ئەكادیمی وپرۆفیشناڵی و پسپۆڕی هەنگاو بنێین،هەروەها واز لە هاورێیەتی وخزم وخزمانێ و مەزاجی كەسێتی بێنین،كام شایستە و شارەزا و ژیر و بەتوانایە ئەوانن ببن بە خاوەن ماڵ و بینەر وبیسەر و خوێنەری وەرزشی كوردی چێژ و سوودیان لێ وەرگرن.

created by Avesta Group and powered by Microsoft Azure