dwarozh

زێدان، سێبەرە بەجێماوەكەی ئەنچلۆتی لە ڕیاڵ مه‌درید

بۆچوون / بیروڕا :: 10/05/2016


 زێدان... ئەو لاوە پرچ رەشەی لەسەرەتای ژیانی وه‌رزشیی و لاوێتییه‌وه‌ لەیانەی كانی فەرەنسییەوە دەستی بە یاری كردن كردوو و دواتر بەیەكێك لە ئەفسانەكانی پەنجا ساڵی رابردوو ئەژمار كرا، ناوبراو چەندین دەستكەوتی تاكەكەسی و گشتی له‌ لاكێشە سەوزەكەی تۆپی پێ بەدەست هێنا، بەكورێكی بێ دەنگ و كەمدو توڕه‌ لەناو هاورێكانیدا ناوی دەركردبو و ئه‌و خه‌سڵه‌ته‌ش لەئێستادا رەنگ دانەوەی لەسەر ژیانی هەیە. نامەوێت زۆر لەسەر ژیانی "زیزۆ"ی ڕاهێنه‌ر بدوێم و به‌ناو هه‌گبه‌ی زانیارییه‌کاندا گه‌ڕێک ده‌که‌م و لەبارەی ژیانی كارلۆ ئه‌نچلۆتییه‌وه‌ ده‌نوسم، دواتر مەبەستی مانشێتەكە ڕون ده‌که‌مه‌وه‌...

کارلۆ ئه‌نچلۆتی کێیه‌؟
ڕەنگە زۆربەمان بەخەیاڵماندا نەهاتبێت كە بزانین له‌ڕابردوودا ئەم که‌سایه‌تییه‌ سه‌رسپییه‌ كێ بووە، بەڵام دڵنیام زۆرینەمان ئاشناین بەوەی كە كارلیتۆ یەكێكە لەڕاهێنەره‌ نەرم و نیانەكانی دنیای ئێستای تۆپی پێ. هەرچەندە "کارلیتۆ" وەك زێدانی خوێندکاری ئەستێرەو پاڵەوانی یاریگاكان نەبووه‌، بەڵام له‌گه‌ڵ ئه‌وه‌شدا یەكێكه‌ لەناوە دیارەكان و له‌ده‌ره‌وه‌ی یاریگاوه‌ پێ بژاردەی ئەریگۆ ساكی و له‌ناو یاریگاشدا هاوشانی مارك فان باستن و فرانك ڕیكارد و ماڵدینی و دۆنادۆنی و چه‌ندان ئه‌فسانه‌ی تر یاری دەكرد، دواتریش ئەو یانەیە بووە هەوێنی ژیانی که‌سایه‌تییه‌ ئیتاڵییه‌که‌ "کارلیتۆ" وەك دەركەوتەی كاری راهێنەرایەتی. كارلۆ ئەنچلۆتی و ئاشنیایەتی لەگەڵ زێدان ئەو دەمانەی كە زێدان لاوێكی خوێنگەرم بوو و لەریزه‌کانی یانەی بۆردۆی فەرەنسی یاری دەكرد، هەمیشە ناوەندی یاریگاكانی بۆ خۆی قۆرخ دەكرد، ئەمەش وایکرد ئه‌نچلۆتی شەیدا و عاشقی بێت ته‌نانه‌ت ئه‌و کاته‌ش که‌ راهێنەری یانەی خانمەپیرەكە بوو! له‌م باره‌یه‌وه‌ كارلۆ دەڵێت: كاتێك راهێنانم بەیاریزانەكانم دەكرد هاوشانی دیشامپ و پیرلۆ و دایفیدز، زێدان بەڕۆحیەتێكی بەرزەوە مەشقەكانی ئەنجام دەدا و ئەوەیش وایلێدەكردم زیاتر لێی نزیك ببمەوە وەك چۆن ئەو لەمن ئاشق و شەیدا تر بوو. زێدان سێبەرە بەجێماوەكەی كارلیتۆ لە ڕیاڵ مه‌درید رەنگە ئێستا كەمێك لەمەبەستی مانشێتەكە تێبگەین، چونكە ژیانی ئەو دووانە ڕاماندەكێشێته‌ ناو چوارچێوه‌یه‌که‌وه‌ و نزیك ده‌بینه‌وه‌ لەوەی كە بۆچی زێدان سێبەری بەجێماوی كارلیتۆیە لە ڕیاڵ مه‌درید؟ مێژووی كار كردنی ئەم دوانەیه‌ لەساڵانی 1999 له‌ ڕیزه‌کانی بیانکۆنێرییه‌وه‌ دەستی پێكرد "یوڤانتۆس"، له‌و ساته‌وه‌ زێدان بۆته‌ خوێندكاری ئه‌نچلۆتی به‌هه‌مان شێوه‌ ئه‌نچلۆتیش بۆته‌ ئاوێنە بۆ زێدان و خۆی تیا دەبینێتەوە. كاتێك كارلۆ دەبێتە راهێنەری ڕیاڵ مه‌درید، لەڕووی دەستەواژە وەرزشیەکانه‌وه‌ دەستبەجێ زێدان دەكرێتە یاریدەدەری، بەڵام خۆی لەراستیدا زێدان دەبێتە خوێندكارێكی تەواو گوێرایەڵ، ئەمانە هەمووی لەپشت پەردە و دوور لە زوومی كامێراکان ڕووده‌ده‌ن و زۆرینه‌مان ئاگاداری ورده‌کاری و که‌والیسی رووداوه‌ نهێنییه‌کان نین و نازانیت زێدان به‌ چ شێوه‌یه‌ک کۆپی په‌یستی کاره‌کانی ده‌کات و وه‌ک چۆن وه‌ک یاریزان ئه‌زمونی لێوه‌رگرتووه‌، هه‌رواش ئه‌زمونی کاری ڕاهێنانی لێوه‌رده‌گرێت.

لەدوای بەجێهێشتنی تیمێكی پڕ لەكێشە له‌لایه‌ن خۆزێ مۆرینیۆی پورتوگالییه‌وه‌، دوانه‌ی ناوبراو خولی یانە پاڵەوانەكان بەدەست دەهێنن و هەرچەندە بەرهەمەكەیان زۆر زیاد نەبوو، بەڵام ئەوەی من مەبەستمە توانەوەی رۆحیەتیان بوو بەیەكدیدا به‌هۆی نازناوی ده‌یه‌می خولی یانه‌ پاڵه‌وانه‌کانه‌وه‌، دواتر بەهۆی بریارێكی تاك لایەنەی فلۆرنتینۆ پێرێزی سه‌رۆکی یانه‌ مه‌دریدییه‌که‌ كارلیتۆ ماڵئاوایی لە لالیگا کرد و زێدان وه‌ک سومبولی یانه‌که‌ دەمێنێتەوە، بەڵام لەتیمی كاستیای ڕیاڵ مه‌درید، ئیدی لێره‌وه‌ كار بۆ ئەوە دەكات كە خۆی بكاتە راهێنەرێكی دیار وەك چۆن پیپ گواردیۆلا لەقوتابخانەی لاماسیاوە به‌ره‌و لوتكە هه‌نگاوی نا. ئێستا دەبینین لەڕووی تاكتیك و پلانەكانی لەدەرەوە و ناوەوەی یاریگا كە چۆن زێدان درێژە پێدەری كارەكانی كارلۆ ئەنچلۆتیەو ئه‌گه‌ر به‌ وردی لێی بڕوانین ئه‌و ڕه‌نگدانه‌وه‌یه‌ به‌دی ده‌که‌ین ئه‌گه‌رچی که‌سێکیش زۆر شاره‌زا نه‌بێت هه‌ست به‌وه‌ ده‌کات. ئه‌قڵیه‌تی و شێوازی کاری یاریزانان ئه‌گه‌ر لەهەموو ڕووەكانەوە له‌ ڕیاڵی سه‌رده‌می مۆرینیۆ وردببینه‌وه‌(فشاری دەروونی – تاكتیك - لێدوانی یاریزان و راهێنەر -پەستانی دەرەوە و ناوەوەی یاریگا)، هەموو ئەم بەراوردانە لەهەڵوێستەكانی پیپی به‌رگریکاردا ده‌خوێنینه‌وه‌ كە ئەوكاتانە چ یاریزانێك بوو و لەسەردەمی كارلیتۆ چۆن بوو! دواتریش سەردەمی ڕافا بینیتێز و هەڵوەشاندنەوەی سەراپای پێكهاتەی ڕیاڵ مه‌درید، بەو پێوەرەی ڕامۆسی كاپتن دەڵێت: لەسەرەتای وەرزدا هەركەسێك بیوتایە ریاڵ مەدرید دەگاتە یاری كۆتایی خولی یانە پاڵەوانەكان، ئەوا بەگەمژە و نەزان ناودەبرا" وەك ئاماژەیەك بۆ ئاستی ئێستای ریاڵ مەدرید لەسەردەمی زێدان که‌ وا ده‌رده‌که‌وێت یاریزانانیش هه‌مان وێنه‌ی ئه‌نچلۆتی له‌ڕوخساری "زیزۆ"دا به‌دی بکه‌ن، له‌لایه‌ک پیپی له‌به‌رگریکارێکی توڕه‌ و سه‌رشێته‌وه‌ بۆته‌ یه‌کێک له‌ سه‌رکرده‌ ژیره‌کان و وته‌کانی ڕامۆسیش پیاچونه‌وه‌ و لێکدانه‌وه‌ی پیویست نییه‌ و خۆی دیاره‌ مه‌به‌ستی له‌ چییه‌ و ده‌یه‌وێت له‌ چ ژێده‌رێکی یانه‌که‌ی بدات ... مه‌به‌ستی ئیداره‌یه‌ و پێیان ده‌ڵێت: زێدان، ئه‌نچلۆتییه‌ و چاوتان لێیه‌ ئێمه‌ی گه‌ڕانده‌وه‌ بۆ چ دۆخ و سه‌رده‌مێک؟!. ئەگەر بێین لە تاكتیك و پلانی نێو یاریگای بروانین، دەتوانین بڵێن: هەمان شێوازە كە كارلیتۆ پیاده‌ی ده‌کرد، سەرەتا بەرگرییەكی تۆكمە و دواتر یاری كردن لەناوەند و باڵەكانەوە، بەكەمترین كات خۆ گەیاندنه‌ نیوه‌ یاریگای یانه‌ی ڕکابه‌ر و خۆ سەلماندن لەكاتی هێرشبردندا، جێبەجێ كردنی پلانی(4 -3 -3) له‌هێرشه‌کاندا و هاسه‌نگ کردنه‌وه‌ی جه‌مسه‌ره‌کان "ڕاست بۆ چه‌پ، پێشه‌وه‌ بۆ دواوه‌" و لەكاتی بەرگری و گەڕانەوەدا پلانی(4 -4 -2)، ئه‌وه‌یش نامۆ نییه‌ و بۆخۆی وه‌ڵامێکی ته‌واوه‌ که‌ هه‌ردوو ڕاهێنه‌ره‌که‌ هه‌ڵقوڵاوی هه‌مان بیرکردنه‌وه‌و فه‌لسه‌فه‌ن. لەكۆتاییدا ماوە بڵێم ئەوەی زێدان دەیكات لەڕیاڵ مه‌درید، هەمان سیناریۆیە که‌ ڕاهێنه‌ره‌ ئیتاڵییه‌که‌ دایڕشت، به‌ڵام به‌هۆی بڕیاری دوورخستنه‌وه‌یه‌وه‌ فریا نه‌که‌وت وه‌ک ده‌رهێنه‌ری سه‌رکه‌وتنه‌کان بۆ هانده‌رانی لۆس بلانکۆسی به‌رهه‌م بهێنێت، بۆیە دەتوانین بڵێن (زێدان سێبەری بەجێماو و درێژه‌ پێده‌ری‌ فه‌لسه‌فه‌ی کارلیتۆیه‌ لە ریاڵ مەدرید).

created by Avesta Group and powered by Microsoft Azure