بەوێنە:هەندرێن بردنەوەیەکی گرنگی بەدەستهێناو دێربی پێشمەرگەکان بە بردنەوەی پێشمەرگەی هەولێر بەکۆتاهات

ناوخۆیی :: 16/01/2020‌ :: 136‌ جار بینراوە
dwarozh


دواڕۆژ، ئاری عەبدوڵڵا

لە پەڕاوێزی یارییەکانی جەولەی دوانزەهەمی خولی نایابی کوردستان، یاریگەی یانەی وەرزشی هەندرێن لە شاری هەولێر بووە شانۆی بەیەکگەیشتنی هەردوو یانەی هەندرێن و دهۆک و یارییەکەش بە سوودی هەندرێنی خاوەن ماڵ بەکۆتاهات بە گۆڵێکی بێ وەڵام.

 هەندرێن لەم یارییەدا بە پلانی هێرشبردن یاری کرد بەڵام تا دوا خولەکەکانی گێمی یەکەم هەوڵەکانی بەرهەمی نەبوو، تا لە خولەکی ٤٤، (سۆران عەزیز) سپی پۆشەکانی هەندرێن بە گۆڵێک پێشخت کە بە شێوازێکی ئێجگار جوان بە دەبڵ کیک تۆماریکرد.
لە نیوەی دووەم گۆڕانکاری لە ئەنجامی یارییەکە رووی نەدا ئەگەرچی بە شێوەیەکی رێژەیی یانەی دهۆکی میوان باشتر دەرکەوت و زنجیرەیەک مەترسی لەسەر گۆڵەکەی تیپی خاوەن یاریگە دروستکرد.
هه‌ندرێن سێیەم سه‌ركه‌وتنی له‌م وه‌رزه‌ تۆمار كرد و ژماره‌ی خاڵه‌كانی گه‌یانده‌ ١٢ خاڵ، له‌ به‌رامبه‌ردا دهۆك به‌ كۆكردنه‌وه‌ی ١٥ خاڵ له‌ خانه‌ی چواره‌مه‌وه‌ بۆ خانه‌ی دوای خۆی دابه‌زی.
لە یاری داهاتوو کە کۆتا جەولەی قۆناغی یەکەمی خولەکە، هەندرێن لە شاری سلێمانی دەبێتە میوانی یانەی پێشمەرگەی سلێمانی و دهۆکیش هەر لە شاری هەولێر دەبێتە میوانی یانەی هەولێر لە کلاسیکۆی کوردستان.
لە یارییەکی دیکەی گرنگی ئەم گەڕە، لەسەر یاریگەی فەرماندەیی لە شارۆچکەی پیرمام لە کەشێکی ساردا، هەردوو پێشمەرگەکان بە یەکگەیشتن ، پێشمەرگەی هەولێر لەم یارییەدا توانی زاڵ بێت بەسەر پێشمەرگەی سلێمانی و یارییەکەی بە ئەنجامی (٢-١) گۆڵ بردەوە.
پێشمه‌رگه‌ی هه‌ولێر دوای دوو شكستی له‌سه‌ریه‌ك له‌ خولی نایابی كوردستان بە بردنەوە شادبوویەوە و گەڕایەوە پلەی دووەمی ریزبەندی.
یارییه‌كه‌ له‌ گێمی یه‌كه‌م به‌ یه‌كسانبوون به‌بێ گۆڵ كۆتایی هات.
له‌ خوله‌كی ٥٠ ـی گێمی دووه‌م عومه‌ر سه‌دام حسێن هێرشبه‌ری پێشمه‌رگه‌ی هه‌ولێر به‌ربه‌ستی یه‌كسانبوونی شكاند و گۆڵی پێشكه‌وتنی یانه‌كه‌ی تۆمار كرد.
خۆشییه‌كانی پێشمه‌رگهی هەولێر‌ زۆری نەخایاند، كاتێك (هیوا ره‌حیم) ئه‌ستێره‌ی پێشمه‌رگه‌ی سلێمانی له‌ خوله‌كی ٥٣ ئه‌نجامه‌كه‌ی یه‌كسان كرده‌وه‌.
پاشان (محەمەد ئیتۆ) ئه‌ستێره‌ی یانه‌ی پێشمه‌رگه‌ی هه‌ولێر به‌ گۆڵێكی مووشه‌كی له‌ دووره‌وه‌ گۆڵی پێشكه‌وتنی كورانی سه‌میر بابۆی تۆمار كرد و یارییه‌كه‌ش تا كۆتایی له‌ به‌رژه‌وه‌ندی تیپی خاوه‌ن یاریگه‌ كۆتایی هات.
پێشمه‌رگه‌ی هه‌ولێر به‌م سه‌ركه‌وتنه‌ ژماره‌ی خاڵه‌كانی گه‌یانده‌ ١٨ خاڵ و به‌شێوه‌یه‌كی كاتی له‌ خانه‌ی پێنجه‌مه‌وه‌ بۆ خانه‌ی دووه‌م هه‌ڵكشا، له‌ به‌رامبه‌ردا پێشمه‌رگه‌ی سلێمانی له‌ كۆی ١١ یاری تووشی شه‌شه‌مین شكست بوو ئه‌مه‌ش به‌رزترین رێژه‌ی دۆڕانە لە کۆی یانەکان.
ریزبەندی یانەکان بە شێوەیەکی کاتی بەمشێوەیە لێهات کە سبەی هەینیش دوو یاری ماوە بۆ کۆتاییهاتنی رکابەرییەکانی هەفتەی دوازدەهەمین:

١ ـ سیروانی نوێ  ١٩ خاڵ
٢ ـ پێشمەرگەی هەولێر  ١٨ خاڵ 
٣ ـ نەورۆز    ١٦ خاڵ
٤ ـ سۆران  ١٥ خاڵ
٥ ـ دهۆک   ١٥ خاڵ
٦ ـ برایەتی    ١٥ خاڵ
٧ ـ دەربەندیخان  ١٤ خاڵ
٨ ـ زێرەڤانی ١٤ خاڵ
٩ ـ زاخــــۆ  ١٤ خاڵ
١٠ ـ هەولێر  ١٣ خاڵ
١١ ـ هەندرێن   ١٢ خاڵ
١٢ ـ شێروانە     ٨ خاڵ
١٣.پێشمەرگەی سلێمانی ٧ خاڵ



created by Avesta Group and powered by Microsoft Azure