بەوێنە:یانەی پێشمەرگەی سلێمانی پادشای پاڵەوانێتی گۆڕەپان‌و مەیدانی یانەكانی كوردستان بوو

ناوخۆیی :: پێش 1 هەفتە ‌ :: 159‌ جار بینراوە
dwarozh


دواڕۆژ، ئەردەڵان محەمەد


 لەشاری سلێمانی ‌و لەتراكەكانی یاریگای كۆلیجی وەرزشی زانكۆی سلێمانی پاڵەوانێتی گۆرەپان‌و مەیدانی یانەكانی كوردستان بۆ ئاستەكانی پێشكەوتووانی كوڕان‌و كچان‌و تازەپێگەیشتووانی كوران‌و كچان ئەنجامدرا.
لەپاڵەوانێتیەكەدا‌و  لەسەرجەم پارێزگاكانی كوردستان تەنها شەش یانە بەشدارییان كردبوو بۆ ماوەی دوو رۆژیش ركابەرییان بۆ 30یاری جیاواز بەردەوام بوو.

لەئاستی پێشكەوتووانی كوڕاندا پێشمەرگەی سلێمانی بە131خاڵ بووە پاڵەوان‌و یانەكانی خانەقین بە121خاڵ‌و شەقڵاوەش بە113خاڵ پلەكانی دووەم‌و سێیەمیان بەدەستهێنا.
لەپێشكەوتووانی كچانیشدا پێشمەرگەی سلێمانی توانی جامی یەكەم بەرز بكاتەوە بەكۆكردنەوەی 141خاڵ‌و سیروانی ركابەری بە139خاڵ پلەی دووەم‌و یانەی ئەفرۆدێتیش بە71خاڵ پلەی سێیەمی بەركەوت.

لەئاستی تازەپێگەیشتووانی كچاندا یانەی پێشمەرگەی سلێمانی ئاست بەرزی خۆی پیشانی سەرجەم یانەكانداو پلەی یەكەمی بەدەستهێنا بە 125خاڵ‌و شێروانەش بە100خاڵ بووە خاوەنی پلەی دووەم‌و بە96خاڵ یانەی شێخان پلەی سێیەمی مسۆگەر كرد.
لەتازەپێگەیشتووانی كوڕاندا یانەی سۆلاڤ نازناوەكەی لەچنگی پێشمەرگە دەرهێناو بەكۆكردنەوەی 119خاڵ بووە پاڵەوان‌و پلەی دووەمیش بۆ یانەی سەرچنار بوو بە 115خاڵ‌و پێشمەرگەی سلێمانیش پلەی سێیەمی بەدەستهێنا بە112خاڵ.
رزگار مەجید سكرتێری یەكێتی گۆرەپان‌و مەیدانی كوردستان ئەوەی خستەڕوو:" ئێمە بەبەردەوامی یانەكانمان ئاگادار كردووەتەوە كە لەمەشقەكانیان بەردەوام بن، بەڵام ساڵانی( 2013 -2014- 2015-2016-2017)هیچ پاڵەوانێتیەكمان ئەنجامنەدابوو، بەڵام سوپاس بۆ خوا ئەوەی جێگەی دڵخۆشیمان بوو ئاستی یاریزانەكان بوو كە ئاستی نەك لەجێگەی خۆیدا بوون، بەڵكو ئاستیان بەرزبووەتەوە هۆكارەكەشی بۆ بەشداریكردنیان دەگەڕێتەوە لەپاڵەوانێتیەكانی عێراق.
وتیشی:" سەرەڕای بەرزبوونەوەی ئاستی یاریزانان لەهەمان كاتدا زۆر لەیاریزانانی تازەپێگەیشتوو دەركەوتووە كە ئاستیان زۆر بەهێزە بەو هۆیەشەوە زۆرترین یاریزانانی كورد لەهەر چوار ئاستەكەدا لەریزی هەڵبژاردەی عێراقن، بەڵام نایشارمەوە كە بەئاشكرا ماندووبوونی زۆر بەیاریزانان‌و راهێنەرە كوردەكانەوە دیارە.
لەلای خۆیەوە زەردەشت رەفیق سەرپەرشتیاری گۆڕەپان‌و مەیدانی یانەی پێشمەرگەی سلێمانی ئەوەی ئاشكرا كرد:" سوپاس بۆ خوا یاریزانانی پێشمەرگە جارێكیتر سەلماندییان كە پاشای یاری گۆرەپان‌و مەیدانن لەسەر ئاستی كوردستان‌و عێراق بەتایبەتی بۆ كچان سەرەڕای بەدەستهێنانی پلەی یەكەم لەهەمان كاتیشدا یاریزانانمان توانییان چەند ژمارەیەكی پێوانەیی تۆماربكەن.
وتیشی:" لەسەر ئاستی تازەپێگەیشتووان بۆ كوڕان‌و كچان یاریزانانمان توانییان ئەنجامی دڵخۆشكەر بەدەست بێنن بەتایبەتی لەكوڕاندا كە لەئێستادا بەلایەن راهێنەركانمانەوە گرنگیەكی زیاترییان پێدەدەین. 
بەهۆی ئاست بەرزی یاریزانانی بەشداربوو لەپاڵەوانێتیەكەدا 13ژمارەی پێوانەیی لەكوڕان‌و كچاندا لەیارییە جیاوازەكاندا تۆمار كران.


created by Avesta Group and powered by Microsoft Azure