بەوێنە:لەپاڵەوانێتی زۆرانبازی وڵاتانی عەرەب عێراق لە دوو ئاست بووە پاڵەوان

ناوخۆیی :: پێش 4 هەفتە ‌ :: 156‌ جار بینراوە
dwarozh


دواڕۆژ، ئەردەڵان محەمەد


لەشاری سلێمانی ركابەریەكانی یەكەمین پاڵەوانێتی زۆرانبازی لەسەر ئاستی وڵاتانی عەرەبی بەردەوامی هەیە‌و لەئاستی تازەپێگەیشتووانی كوڕاندا هەڵبژاردەی عێراق توانی ببێتە پاڵەوان لەیاری سەربەستدا و لەكچانیشدا دوای بردنەوەی لەركابەرە مەغریبیەكەی جامەكەی بەرز كردەوە.


لەژێر چاودێری وەزیری وەرزش‌و لاوانی عێراق و بەهاوكار یەكێتی زۆرانبازی عێراق و لقی سلێمانی یەكێتی زۆرانبازی وڵاتانی عەرەب، یەكەمین پاڵەوانێتی بۆ ئاستی هەڵبژاردەكان لەشاری سلێمانی و لەهۆڵی كۆلێجی پەروەردەی وەرزشی زانكۆی سلێمانی ئەنجام درا.
لەئاستی كچان دوای بردنەوەی لەركابەرە مەغریبیەكەی هەڵبژاردەی عێڕاق نازناوەكەی بەرز كردەوە، ئەوەش دوای كشانەوەی بەشێك لەهەڵبژاردە بەشداربووەكان.
نیهایەت زاهر راهێنەری هەڵبژاردەی كچانی عێڕاق رایگەیاند:" بۆ یەكەمجارە هەڵبژاردەی زۆرانبازی كچانی عێڕاق بەشداری پاڵەوانێـتی عەرەب دەكات، بۆیە دەتوانم بڵێم ئاستی هەڵبژاردەكەم لەیەكەم بەشداریكردنیدا زۆر بەهێزەو لەئاستی یاریزانانیش رازیم، لەبەرئەوە دەمانەوێت لەسەر بەدەستهێنانی ئەم نازناوانە بەردەوام بین لەپاڵەوانێتیەكانی ئاسیا‌و جیهانیش.
وتیشی:" من وەك راهێنەری هەڵبژاردەی عێڕاق ئامانجی گەورەترمان هەیە ئەویش بەدەستهێنانی ئەنجامی گەورەیە لەسەر ئاستی جیهان، هەروەها سەرخستنی یاریزانانمانە بۆ پاڵەوانێتی ئۆڵۆمپیادی تۆكیۆی 2020 لەژاپۆن.
لەپاڵەوانێتیەكە و لەئاستی تازەپێگەیشتووان یاریزانانی كورد رۆڵێكی گرنگیان بینی بۆ بەدەستهێنانی چەندین پلەی یەكەم و دووەم بەتایبەتی یاریزانانی شاری كەركوك.
رۆستەم ئاسۆ یاریزانی یانەی سەورەی شاری كەركوك و هەڵبژاردەی عێڕاق رایگەیاند:" هەستێكی زۆر خۆشم هەیە كە توانیم بگەم بەم ئاستە و پلەی یەكەم بەدەست بێنم، چونكە ماوەی ساڵ و نیوێكە ئامادەكاری بۆ ئەم پاڵەوانێتیە دەكەم، بۆیە جێی خۆیەتی سوپاسی راهێنەرەكانم بكەم كە هاوكارم بوون.
وتیشی:" دوای تەواوبوونی پاڵەوانێتی وڵاتانی عەرەب لەشاری سلێمانی پاڵەوانێتی وڵاتانی ئاسیا هەیە پشتیوان بەخوای گەورە خۆم ئامادە دەكەم بۆ ئەو پاڵەوانێتیە بۆ ئەوەی بەهەمان شێوە ئەنجامی گەورەتر لەو پاڵەوانێتیەش بەدەست بێنم.
پڵەوانێتیی زۆرانبازی وڵاتانی عەرەب بۆ یەكەمجارە لەهەرێمی كوردستان ئەنجام دەدرێت و بۆماوەی شەش رۆژ ركابەریەكانی لەشاری سلێمانی بەردەوامی دەبێت.


created by Avesta Group and powered by Microsoft Azure