بەوێنە‌و ڤیدیۆ: لەشاری سلێمانی قۆناغی چوارەم‌و كۆتایی پاڵەوانێتی پایسكیلسواری یانەكانی عێراق دەستیپێكرد

ناوخۆیی :: 10/10/2019‌ :: 97‌ جار بینراوە
dwarozh


دواڕۆژ، ئەردەڵان محەمەد

لەشاری سلێمانی‌و لەسەر رێگای دووكانیان قۆناغی چوارەم‌و كۆتایی پاڵەوانێتیی پایسكیلسواری یانەكانی عێراق بۆ كچان‌و كوڕان دەستیپێكردو یانەكانی سەناعە‌و نەورۆز لەكوڕان‌و كچان توانییان لەئاستی پێشكەوتووان ببنە پاڵەوان.

بەسەرپەرشتی یەكێتی پایسكیلسواری عێراق‌و بەهاوكاری لقی سلێمانی یەكێتیەكە ، كێبڕكێكانی ئەم قۆناغە هاتە پارێزگای سلێمانی بۆ ئاستەكانی تازەپێگەیشتووان‌و لاوان‌و پێشكەوتووان  و دوای ئەوەی هەرسێ قۆناغی یەكەم‌و دووەم‌و سێیەم لەشارەكانی كەربەلا‌و دیوانییە‌و دهۆك ئەنجامدرا بوو.
لەئاستی پێشكەوتووان بۆ كڕران بۆ بڕینی 120كم كوڕانی سەناعە دوای ئاستێكی بەهێزو پڕ ماندوویەتی توانییان پێش ركابەرەكەیان یانەی كۆیە بكەوێت‌و ببنە پاڵەوان‌و پلەی دووەمیش بۆ یانەی كۆیە بوو.
لەئاستی پێشكەوتووانی كچان بۆ بڕینی 30كم وەك پیشەی هەمیشەییان كچانی یانەی نەورۆز باڵا دەستی خۆیان پیشانداو توانییان بەبێ‌ هیچ ركابەریەك نازناوەكە بەدەست بێنن.
 هەرچی كچانی برایەتی بوو پلەی دووەمیان بەدەستهێنا‌و پلەی سێیەمیش بۆ كچانی یانەی سەناعە بوو، هەرچەندە لەركابەریەكان كشانەوە بەهۆی كێشەیان لەگەڵ سەرۆكی یەكێتی پایسكیلسواری عێراق.
سیروان سامی راهێنەری كچانی یانەی نەورۆز ئەوەی خستەروو:" سوپاس بۆ خوا بۆ جارێكیتر توانییمان ببینە پاڵەوان‌و زۆر لەئاستی یاریزانەكانم دڵنیابووم كە ئەم نازناوە بەدەست دێنن، هەرچەندە بەهۆی پێكانەوە یاریزانێكم بێبەش بوو لەپاڵەوانێتیەكە.
وتیشی" لەئێستادا هەوڵەكانمان چڕ دەكەینەوە بۆ ئامادەكارییمان بۆ پاڵەوانێتی یانەكانی عەرەب‌و ئاسیا بۆ ئەوەی بتوانین ئەنجامێكی گەورە بەدەست بێنین، بۆیە زۆر گەشبینم بەئاستی یاریزانەكانم كە بتوانن جارێكیتر مێژوو بۆ خۆیان‌و یانەكەیان‌و شاری سلێمانی بنوسنەوە.
بڕیارە ركابەریەكانی ئەم پاڵەوانێتیە بۆ ماوەی سێ رۆژ بەردەوامی هەبێت لەپارێزگای سلێمانی بەدیاری كراوی لەسەر رێگای (دووكانیان –عەربەت).
یەكەم‌و دووەمی پاڵەوانێتیەكە لەكوڕان‌و كچان بەشداری هەردوو پاڵەوانێتی یانەكانی عەرەب‌و ئاسیا دەكەن وەك نوێنەری یانەكانی عێراق.


created by Avesta Group and powered by Microsoft Azure