بەوێنە: هەڵبژاردەی ئۆڵۆمپی عێراق لە شاری سلێمانییەوە خۆی بۆ پاڵەوانێتی ئاسیا ‌و ئۆڵۆمپیادی 2020 ئامادە دەكات

ناوخۆیی :: پێش 2 هەفتە ‌ :: 111‌ جار بینراوە
dwarozh


دواڕۆژ، ئەردەڵان محەمەد

 

بۆ ئەنجامدانی كەمپێكی مەشق‌و راهێنان ‌و دوو یاریی دۆستانە هەڵبژادەی ئۆڵۆمپی عێراق لەشاری سلێمانین و خۆیان بۆ پاڵەوانێتی ئاسیا ‌و ئۆڵۆمپیادی 2020 ئامادە دەکەن.

هەڵبژاردەكە لەئێستادا لە28یاریزان‌و ستافێكی راهێنەران پێكهاتووە لەهەردوو یاریگای نێودەوڵەتی سلێمانی‌و سیروانی نوێ‌ مەشقەكانیان لەدوو كاتی جیاوازدا ئەنجام دەدەن.

عەباس عوبێد یاریدەدەری راهێنەری هەڵبژاردەی ئۆڵۆمپی عێراق ئەوەی خستەروو: ئێمە لەدوای قۆناغی یەكەمی پاڵاوتنەكانی ئۆڵۆمپیادەوە هیچ مەشقێكمان لەماوەی چوار مانگی رابردوو ئەنجامنەداوە، بۆیە بەئەنجامدانی ئەم كەمپە لەشاری سلێمانی دەرفەتێكی گرنگە بۆ هەڵسەنگاندنی توانا‌و بەهرەی یاریزانان، تیپەكەمان بەسەر دوو بەش لەیاریزانان دابەشبووە، بەشێكیان یاریزانە بەئەزموونەكانن‌و بەشەكەیتریان یاریزانانی تازەپێگەیشتوون كە لەناو ئەوانیشدا یاریزانی بەهرەداری تازەمان بەدی كردووە.

وتیشی: پشت بەخوا كەمپی داهاتوومان لەوڵاتی بەحرێن دەبێت‌و یاریەكی دۆستانەش ئەنجام دەدەین لەسەر داوای یەكێتی تۆپی پێی ئەو وڵاتە.
عەباس ئاماژەی بەوەشدا: یاریە دۆستانەكان زۆر گرنگە، چونكە بەشێوەیەكی مەیدانی توانای یاریزانەكانمان بۆ دەردەكەوێت بەوەش دەتوانین  وێنەیەكی گشتی بۆ كۆی تیپەكە ببینین.

عوبێد راشیگەیاند: وەك ئامادەكاریەك بۆ ئۆڵَۆمپیادی ئاسیا كە بریارە سەرەتای مانگی ئەیلول لەوڵاتی تایلاند ئەنجام بدرێت تا ئەو كاتەش لەگەڵ یانەكان لەسەر خەت دەبین بۆ ئەوەی یاریزانان دەستنیشان بكەین‌و هەڵیان بژێرین بۆ ریزی هەڵبژاردەكە.

یاریدەدەرەكەی راهێنەری هەڵبژاردەی ئۆڵۆمپی عێراق باس لەوەشدەكات:  لەكۆتاییەكانی ئۆڵۆمپیاد دا ئامانجی گەورەمان لەبەرچاو گرتووە‌و هەوڵی بۆ دەدەین، ئەنجامی هەڵبژاردەكەش لەپاڵەوانێتیەكەدا وێنە‌و توانای راستەقینەی هەڵبژاردەكە نیشان دەدات.

لەلای خۆیەوە عەباس عەلی ئەندامی یەكێتی تۆپی پێی سلێمانی وتی: دوای ئاگاداركردنەوەمان لەلایەن یەكێتی تۆپی پێی عێراقەوە بۆ ئەنجامدانی ئەم كەمپە لەشاری سلێمانی ئێمەش سەرجەم ئیش‌و كارەكانی هاتنی وەفدەكەو مانەوەیان‌و یاریگامان بۆ دابین كردوون، هەرچەندە بریاربوو دوو یاری دۆستانەش ئەنجام بدەن، بەڵام بەهۆی ئامادەنەبوونی تیپەكانی شاری سلێمانی بەتایبەتی لاوانی یانە نایابەكان یاریە دۆستانەكان هەڵوەشانەوە.

ئەوەی تایبەت بێت بەیاریزانی كورد لەنێو هەڵبژاردەكەدا دوو یاریزانی کوردی تێدایەو یەکێکیان رێبین عومەرەو راهێنەری توانای جەستەیی هەڵبژاردەكەش سەردار محەمەدە كە كوردە.
بریارە دوای كەمپەكەی وڵاتی بەحرێن‌و یاریە دۆستانەكەیان 23 یاریزان بۆ پێكهاتەی كۆتای هەڵبژاردەكە بمێنێتەوە.


created by Avesta Group and powered by Microsoft Azure