رۆبەرتۆ كارلۆس: چیرۆكی مناڵی لەگەڵ چەند راستیەكی ژیاننامەی كە وێنا ناكرێت

جیهان :: پێش 2 هەفتە ‌ :: 2872‌ جار بینراوە
dwarozh


دواڕۆژ سپۆرت

 

رۆبەرتۆ كارلۆس دا سێلڤا لە رۆژی 10 نیسانی 1973  لە گارسیا ، ساوپاولۆ لە برازیل لە خێزانێكی هەژار لەدایك بووە ، دایكی ڤییرا لۆسیا دا سیلڤا و باوكی ئۆسكار دا سیلڤایە  .  

 

 وەكو زۆرێك لە مناڵانی برازیل كەوتە دوای خۆشەویستی لەگەڵ  تۆپی پێی و هەر كات دەرفەتی هەبووە یاری تۆپی پێی دەكرد ،رۆبەرتۆ كارلۆس هەر لە تەمەی مناڵیەوە دەست بەكار كرد بۆ یارمەتیدانی خێزانەكەی لە كارگەیەكی چنین بە ناوی تۆرساو كاردیرۆ ، لە ساڵی 1988 كاركردن دێنێت و پەیوەندی  بە یانەی ( یونیان ساو جواو ) دەكات و بەردەوام دەبێت تا ساڵی 1992 و پەیوەندی  بە یانەی پاڵمیراسەوە دەكات و لێرەوە كاروانی ئەستیرەیی و ناوبانگی دەست پێدەكات .

لە ساڵی 1994 لەگەڵ یانەی پاڵمیراس خولی برازیلی بەدەستهێنا ، لە تەمەنی 19ساڵیدا بانگهێشتی هەڵبژادەی برازیل كرا بۆ پاڵاوتنەكانی ئۆڵۆمپیادی بەرشەلۆنە لە 1992.

رۆبەرتۆ كارلۆس بانگهێشتی هەڵبژاردەی برازیل كرا لە مۆندیالی ئەمریكا 1994، بەڵام لەم مۆندیالە لەسەر  كورسی یەدەگ بوو بە هۆی بوونی دوو ئەستیرە برانكۆ و لیوناردۆ كە لە هەمان پێگە یاریی دەكەن و (زاگالۆی راهێنەری ئەوسای برازیل ئەو  یاریزانە لا پەسەند تربوو ) ئەویش باڵی راستی سەربەستە ، لەگەڵ ئەوەشدا رۆبەرتۆ كارلۆس  دواتر توانی پێناسەی خۆی لەگەڵ هەڵبژاردەی سامبا دروست بكات ، ئەوەی جێ سەرنجە رۆبەرتۆ كارلۆس كاروانی وەرزشی خۆی لە تەمەنی 16 ساڵیدا  وەكو هێرشبەر دەست پێكرد (پێش ئەوەی(جواو كامبۆس ) ناسراو بە (باشیكو ) بیدۆزێتەوە و لە پێگەی لاکان دایبنێ تا وازهێنانی لەو شوێنە کە لای چەپ بوو یاری كرد )  ،  هەر بۆیە هەمیشە دەمانبینی هێرشبردن و گۆڵكردنی هەبووە سەرەڕای ئەوەی لە پێگەی بەرگریكار و باڵی چەپ یاری دەكرد .

 لە بەرامبەر ئەو ئاستە بەرزەی و چوونە پێشەوەی بۆ هێڵی هێرشبردن ، یانە ئەوروپیەكان دەستیان بە ركابەریكردن کرد  لە سەر ئەو یاریزانە لاوەی لای چەپ ، یانەی پاریس سان جێرمان 3ملیۆن دۆلاری تەرخان كرد بۆ كڕینی بەڵام لە كۆتاییدا چووە یانەی ئینتەر میلان لە بەرامبەر 7 ملیون دۆلار ، ئەزموونی كارلۆس لەگەل ئینتەر میلان دلخۆشكەر نەبوو بۆیە زیاتر لە جارێك ناڕەزای بوونی ئاشكرا كردووە لە راهێنەری ئەوسای یانەكە ( رووی هیدسۆن ) كە شوینی یاری كردنی گۆڕی و لە هێڵی ناوەڕاست داینا ئەو شوێنەش بە دڵی نەبوو . 

پاش وەرزێكی سارد لەگەڵ ئینتەرمیلان ، رۆبەرتۆ كارلۆس پەیوەندی بە یانەی ریاڵ مەدرید كرد، گرێبستێكی واژوو كرد لەگەڵ ئەو یانەیە لە  ساڵی 2006 تەواو دەبوو ،  لە ئیسپانیا شنە بای سەركەوتن هەڵی كرد لە سەر كاروانی وەرزشیەكەی ،  لەگەڵ یانەی ریاڵ مەدرید چەندین نازناوی بەدەستهێنا ، هەروەها لەگەڵ هەڵبژاردەكەی دەركەوت و ئاستێكی نموونەیی پێشكەش كرد كە دیارترین و جوانترینیان گۆلە میژوویەكەی بوو  لە بەرامبەر هەڵبژاردەی فرەنسا كە لێدانێكی راستەخۆ بوو كە دووبارە كردنەوە قبول ناكات لە گۆڵی فابیان پارتێز گۆڵپارێزی  فرەنسای ئەوکات .

- لە ساڵی 2007 یانەی ریاڵ مەدرید جێدەهێڵێت و روودەكاتە فەنەر باخچەی توركی و بۆ ماوەی سێ وەرز لەگەڵ ئەو یانەیە لە خولی توركیا یاری دەكات 
-   لە 2010 روو دەكاتەوە برازیل بۆ ماوەی یەك وەرز لەگەڵ یانەی كۆرینشیانز یاری دەكات . 

-لە ساڵی 2011 روو دەكاتە خولی رووسیا و لە ریزی یانەی ئانجی  یاری دەكات و لە ماوەی یاریكردن لە خولی رووسی چەند جارێك رووبەرووی دۆخی رەگەز پەرستی بووەتەوە لە رێی هەڵدانی توێكڵی مۆز بەروویدا و لەو ساڵەدا واز لە یاری كردن دەهێنێت.

 

 پاش وازهێنانی روو دەكاتە راهێنان ، بووە  راهێنەری چەند یانەیەكی توركی  وەكو یانەی سیڤا سپۆر و یانەی ئەكهیسار سپۆر .

- لە ساڵی  2015 جارێكی تر دەگەرێتەوە یاریكردن  لە ریزی یانەی ( دلهی دیناموز وەكو یاریزان و راهێنەر)

 رۆبەرتۆ كارلۆس  لە ژیانی وەرزشی خۆێدا  573 یاری لە ریزی یانەكان كردووە و 125 گۆڵی تۆمار كردووە لە بەرامبەردا 125 یاری بۆ هەڵبژاردەی برازیل كردووەو 11 گۆڵی تۆمار كردووە .

ژیانی خێزانی 
رۆبەرتۆ كارلۆس  خاوەنی ٩ مناڵە، ئەم ژمارە گەورەیە  بە رێكەوت نەبووە ، چونكە كارلۆس هەر لە سەرەتاوە پلانی بۆ درووست كردنی خێزانێكی گەورە دانابوو تیایدا ئەندامەكانی یەكتریان خۆش بووێت و بتوانێت ئەوەی لە ناخیدا لە لایەن باوكیەوە چێنرابووە لە ناخی نەوەكانیدا بیچێنێت ، ژیانی هاوسەرگیری ئەو یاریزانە زوو دەستی پێكرد بە هاوسەر گیری كردن لەگەڵ كچە هاونیشتمانیەكەی ( ئەلیكساندرا بینهیرۆ ) بەڵام ئەو پرۆسەیان زۆر بەردەوام نەبوو، بڕیاریاندا لە یەكتر جیاببنەوە و لە ساڵی 2003گرێبەستێكیان واژوو كرد لە نێوانیاندا و تیایدا ئەو یاریزانە تێچووی هەر سێ كوڕەكەی لە خێزانی یەكەمی لە خۆ دەگرێت ، لە تەنیشت كەمتەرخەمی نەكردنی لەم رووەوە، بەڵام رۆبەرتۆ كارلۆس سوورە  لە سەر تەواوكردنی خێزانە گەورەكەی و چەندین جار هاوسەرگیری كرد تا بووە باوكی 9 مناڵ كە شانازییان پێوەدەكات و لە تەمەنی 44 ساڵیدا بوونی بە ( پاپیرە ) راگەیاند كاتێك كچە گەورەكەی ( جیوفانا دا سیلڤا ) یەكەم مناڵی بوو . 

 


created by Avesta Group and powered by Microsoft Azure