بۆ یەكەمجار لە سلێمانی خولێكی راهێنان بۆ ناوبژیوانانی تۆپی سەرمێزی عێراق كرایەوە

ناوخۆیی :: 5 رۆژ پێش ئێستا‌ :: 76‌ جار بینراوە
dwarozh


دواڕۆژ، ئەردەڵان محەمەد


بەمەبەستی زیاتر گرنگیدان بەتواناكانی ناوبژیوانانی تۆپی سەرمێزی عێراق‌و ئاگاداربوون لەو گۆرانكارییانەی لەیاسای یاریەكەدا روویداوە لە شاری سلێمانی خولێك بۆ ناوبژیوانانی تۆپی سەرمێزی عێراق كرایەوە.

خولەكە بەسەرپەرشتی لیژنە كاتییەكەی یەكێتی تۆپی سەرمێزی عێراق‌و ناوبژیوانی نێودەوڵەتی "محەمەد بسیۆنی" سەرۆكی ناوبژیوانانی كیشوەری ئەفریقا‌و جێگری سەرۆكی ناوبژیوانانی وڵاتانی عەرەب وانەكانی دەوتەوە كە خۆی لەو گۆرانكارییانە دەبینییەوە كە لەیاسای یاریەكەدا روویداوە.
محەمەد بسیۆنی وانەبێژی خولەكە ئەوەی خستەروو: خۆشحاڵین كە لەعێراقین بەتایبەتی لەشاری سلێمانی كە شەشەمجارە سەردانی ئەم وڵاتە دەكەم، هەرچەندە پێشتر بریاربوو سەردانی وڵاتی هندستان بكەم بۆ كردنەوەی ئەم خولە، بەڵام بەباشمزانی جارێكیتر سەردانی عێراق بكەمەوە.
وتیشی: هاتنمان بۆ عێراق بۆ ئەوەیە بتوانین ئاستی ناوبژیوانانی تۆپی سەرمێزی عێراق زیاتر پێش بخەین بەتایبەتی لەو گۆرانكارییانە ئاگادارییان بكەینەوە كە لەیاسای یاریەكەدا روویداوە لەسەر ئاستی جیهان‌و پێیان بگەیەنین.
محەمە بسیۆنی ئاماژەی بەوەشدا: ئێمە ئامادەی یارییەكانی پاڵەوانێتی عێراق بووین‌و ئاستی ناوبژیوانانیش بەهێزە بەتایبەتی بوونی سێ ناوبژیوانی ئافرەت جێگەی دڵخۆشییە، بۆیە هیوادارم ناوبژیوانانی عێراق بتوانن بۆ ساڵی 2020 ببنە نوێنەری وڵاتەكەیان لەپاڵەوانێتیەكانی جیهان‌و ئۆڵۆمپیاد‌و كیشوەری ئاسیا، چونكە ناوبژیوانانی عێراق زیاتر پێویستیان بەهاوكاری‌و پاڵپشتیە، لەبەرئەوەی ئاستیان وردە وردە بەرەو پێش دەچێت.
لەشاری سلێمانی قۆناغی دووەمی خولی تۆپی سەرمێزی یانەكانی عێراق بەردەوامی هەیە‌و بریارە ماوەی سێ رۆژیش ركابەریەكان بەردەوامی هەبێت.


created by Avesta Group and powered by Microsoft Azure