بەوێنە: لە سلێمانی پاڵەوانێتی تۆپی سەرمێزی یانەكانی عێراق دەستی پێكرد

ناوخۆیی :: 11/07/2019‌ :: 129‌ جار بینراوە
dwarozh


دواڕۆژ، ئەردەڵان محەمەد


دواجار كێبڕكێكانی قۆناغی دووەمی پاڵەوانێتی تۆپی سەرمێزی یانەكانی عێراق لەشاری سلێمانی دەستی پێكرد‌و لەیەكەم رۆژیدا یانەكانی پێشەوەی ریزبەندی بەسەركەوتن دەستیان بەیاری كرد.
بەسەرپەرشتی یەكێتیە كاتیەكەی تۆپی سەرمێزی عێراق‌و بەهاوكاری لقی سلێمانی یەكێتیەكە‌و بەبەشداری 16یانەی كوران‌و پێنج یانەی كچان پاڵەوانێتیەكە لەهۆڵی یانەی سلێمانی دەستی پێكرد.
عومەر ئەحمەد سەرپەرشتیاری گشتی پاڵەوانێتیەكە ئەوەی بەدواڕۆژ راگەیاند: دوای تەواوبوونی یاریەكانی قۆناغی یەكەم بڕیاردرا ركابەریەكانی قۆناغی دووەم لەشاری سلێمانی ئەنجام بدرێت، چونكە شاری سلێمانی هەموو كات پێشەنگ بووە لەبەرێوەبردنی پاڵەوانێتیەكانی عێراق، هەروەها بۆتە قوتابخانەیەك بۆ دروستكردنی یاری تۆپی سەرمێز.

عومەر ئاماژەی بەوەدا: بەدڵنیاییەوە دواكەوتنی هەڵبژاردنی دەستەیەكی نوێ بۆ یەكێتی تۆپی سەرمێزی عێراق كاریگەری زۆری كردۆتە سەر ئاستی تۆپی سەرمێزی عێراق هۆكارەكەشی دەگەرێتەوە بۆ بوونی كێشە لەناو ئەندامانی یەكێتی تۆپی سەرمێزی عێراق، هەروەها بوونی باڵ باڵێن لەناو یەكێتیەكە بەتەواوی كاریگەری كردۆتە سەر ئاستی یاری تۆپی سەرمێز.
لەیەكەم رۆژی پاڵەوانێتیەكەدا هەریەك لەیانەكانی سلێمانی‌و جەیش كە لەقۆناغی یەكەمدا هیچ یاریەكیان نەدۆڕاندبوو بەسەركەوتن دەستیان بەیاری كرد.
بریارە دوای تەواوبوونی یاریەكانی پاڵەوانێتیی عێراق یەكەم‌و دووەم‌و سێیەمی خولی عێراق دەبنە نوێنەری یانەكانی عێراق لەپاڵەوانێتیی یانەكانی عەرەب كە لەوڵاتی مەغریب لەمانگی 9 ئەنجام دەدرێت.


created by Avesta Group and powered by Microsoft Azure