بەفەرمی سێ یاریزانی پێشمەرگەی سلێمانی بوونە یاریزانی سەرەكی هەڵبژاردەی بالەی لاوانی عێراق

ناوخۆیی :: پێش 4 هەفتە ‌ :: 109‌ جار بینراوە
dwarozh


تاگ :: گشتی


دواڕۆژ، ئەردەڵان محەمەد
دوای زیاتر لەدوو هەفتە تاقیكردنەوەی یاریزانانی لاوانی یانەكانی عێراق لەشاری بەغدا بۆ گەیشتنی یاریزانان بەریزی هەڵبژاردەی لاوانی عێراق ،دواجار سێ یاریزانی یانەی پێشمەرگەی سلێمانی بوونە یاریزانی سەرەكی هەڵبژاردەكە.

هەر یەك لەهاومەند فەتاح‌و عەبدوڵڵا كەریم‌و محەمەد كەریم یاریزانانی یانەی پێشمەرگەی سلێمانی، دوای تاقیكردنەوەیان لەلایەن راهێنەری هەڵبژاردەی لاوانی عێراقەوە "عەلا خەڵەف" توانییان متمانەی راهێنەركەیان بەدەست بێنن‌و بەفەرمی بوونە یاریزانی هەڵبژاردەی لاوانی عێراق بۆ بەشداریكردن لەپاڵاوتنی هەڵبژاردەكانی ئاسیا بۆ گەیشتن بەپاڵەوانێتی وڵاتانی ئاسیا.

هاومەند فەتاح لەشاری بەغداوە ئەوەی بەدواڕۆژ راگەیاند:" لەراستید گەیشتن بەریزی هەڵبژاردەكانی عێراق بەلای ئێمەی یاریزانانی كوردەوە زۆر خۆشە، بەڵام لەهەمان كاتدا قورسیشە كە بتوانین پارێزگاری لەمانەوەت بكەیت، لەبەرئەوە ئێمە لەم ماوەیەدا سودێكی زۆرمان بینی لەمەشقەكان ناسینی یاریزانەكانیتری هەڵبژاردەی لاوانی عێراق.
هاومەندی ئەوەشی خستەروو: رۆژ بەرۆژ ئاستمان بەرەو پێشچووە لەمەشقەكانمان پێمانەوە دیارە بەتایبەتی لەرووی تەكتیكەوە كە لەیانەی پێشمەرگەی سلێمانی زۆر گرنگیان پێداوین، ئێستاش بەردەوامین لەمەشقەكانمان، لەبەرئەوە پێویستە یاریزانانی كورد زیاتر خۆیان ماندوو بكەن لەمەشقەكانیان بۆ ئەوەی بگەن بەهەڵبژاردەكانی عێراق، چونكە ئاستی یاریزانانی كورد هیچی لەئاستی یاریزانانی عەرەب كەمترنیە.

بریارە كۆتایی ئەم مانگە لەوڵاتی بەحرێن پاڵاوتنی وڵاتانی ئاسیا بۆ گەیشتن بەپاڵەوانێتیی ئاسیا دەست پێبكات‌و مانگی 9ی ئەمساڵیش كێبركێكانی پاڵەوانێتی بالەی وڵاتانی ئاسیا لەوڵاتی میانمار بەرێوەدەچێت.


created by Avesta Group and powered by Microsoft Azure