كاپتنه‌ كورده‌كه‌ دوو ساڵی تریش له‌پێناو سیپاهان ده‌جه‌نگێت

کوردە پیشەگەرەکان :: 11/06/2019‌ :: 189‌ جار بینراوە
dwarozh


تاگ :: گشتی

دوارۆژ سپۆرت
ئا: سه‌نگه‌ر زرار

پاش سه‌ركردایه‌تییه‌كی سه‌ركه‌وتوو له‌یه‌كه‌م ساڵی یاریكردنی له‌گه‌ڵ یانه‌كه‌دا، یانه‌ی سیپاهان ئه‌سفه‌هان-ی خاوه‌ن پله‌ی دووه‌می خولی پیشه‌گه‌رانی تۆپی پێی یانه‌كانی ئێران (پڕۆ لیگ)ی وه‌رزی 2018-2019، بۆندی كاپتنه‌ كورده‌كه‌ی بۆ ماوه‌ی 2 ساڵی تر درێژكرده‌وه‌.
له‌گه‌ڵ كردنه‌وه‌ی بازاڕی هاوینه‌ی كڕین و فرۆشتن و هاتن و چوونی یاریزانان له‌نێوان یانه‌كان (میركاتۆ)دا، یانه‌ی سیپاهان ئه‌سفه‌هان-ی ئێرانی پێشنیازی نوێكردنه‌وه‌ی بۆنده‌كه‌ی خسته‌ به‌رده‌م مه‌هدی كیانی ناوه‌ڕاستكاری كوردی له‌ك و كاپتنی یانه‌كه‌یان و دواجاریش پاش گفتوگۆكردن له‌گه‌ڵ یاریزانی ناوبراودا، هه‌ردوولا گه‌یشتنه‌ رێككه‌وتن كه‌ ئه‌م یاریزانه‌ بۆ ماوه‌ی 2 ساڵی تر یاری له‌یانه‌ی سیپاهان-دا بكات و بۆ ئه‌م مه‌به‌سته‌ش (ئه‌مڕۆ سێشه‌ممه‌ 11ی حوزه‌یرانی 2019) بۆنده‌ نوێیه‌كه‌ به‌شێوه‌یه‌كی فه‌رمیی واژووكرا و دواتر یانه‌ی سیپاهان-یش له‌پێگه‌ی تایبه‌تی خۆی له‌ئینته‌رنێت هه‌واڵه‌كه‌ی بڵاوكرده‌وه‌.
 نوێكردنه‌وه‌ی بۆندی مه‌هدی كیانی یاریزانی به‌ئه‌زموونی كورد كه‌ ته‌مه‌نی 32 ساڵه‌، پاش ئه‌وه‌ هات كه‌ له‌یه‌كه‌م ساڵی یاری كردنی له‌گه‌ڵ یانه‌كه‌دا توانی له‌كۆی 30 یاری خولی پیشه‌گه‌رانی تۆپی پێی یانه‌كانی ئێران (پڕۆ لیگ)ی وه‌رزی 2018-2019دا له‌ 29 یاریدا 2610 خوله‌ك به‌شداربێت و جگه‌ له‌وه‌ی كاپتنی یانه‌كه‌ بوو، توانی ئاستێكی به‌رزیش به‌درێسی ژماره‌ 6 پێشكه‌ش بكات و یارمه‌تی یانه‌كه‌ بدات له‌به‌ده‌ستهێنانی پله‌ی دووه‌می پڕۆ لیگ و سه‌ركه‌وتنی راسته‌وخۆیان بۆ قۆناغی گروپه‌كانی خولی تۆپی پێی جامی یانه‌ پاڵه‌وانه‌كانی ئاسیای ساڵی 2019دا.
شایه‌نی باسه‌ مه‌هدی كیانی ناوه‌ڕاستكاری به‌ئه‌زموونی كوردی له‌ك كه‌ له‌شاری نهاوه‌ند له‌دایكبووه‌، له‌ژیانی یاری كردنیدا وه‌رزی 2005-2006 بۆ یانه‌ی سه‌با باتری قم و ساڵانی 2008 تا 2015 بۆ یانه‌ی تراكتۆرسازی ته‌برێز و وه‌رزی 2015-2016 بۆ یانه‌ی ماشێن سازی ته‌برێز و ساڵانی 2016 تا 2018 بۆ یانه‌ی تراكتۆرسازی ته‌برێز و وه‌رزی 2018-2019 بۆ یانه‌ی سیپاهان ئه‌سفه‌هان یاری كردووه‌.
بیۆگرافیا
-ناو: مه‌هدی كیانی.
-ساڵڕۆژی له‌دایكبوون: 10-1-1987.
-شوێنی له‌دایكبوون: ناوچه‌ی مالوسان-ی شاری نهاوه‌ند.
-به‌ڕه‌چه‌ڵه‌ك كوردی له‌ك-ه‌.
-باری كۆمه‌ڵایه‌تی: خێزانداره‌. 
-باڵا: 174 سم.
-كێش: 78 كگم.
-یانه‌: سیپاهان ئه‌سفه‌هان.
-هێڵی یاری كردن: ناوه‌ند.
-به‌پێی راستی یاری ده‌كات.
-ژماره‌ی درێس: 6.
-كاپتنی سه‌ره‌كی یانه‌كه‌یه‌.
-یه‌كه‌م یانه‌: وه‌رزی 2005 تا 2006 بۆ یانه‌ی سه‌با باتری (سه‌بای قم) یاری كردووه‌.
-ساڵانی 2008 تا 2015 له‌گه‌ڵ یانه‌ی تراكتۆرسازی ته‌برێز 164 یاری و 4 گۆڵ و 1 ئه‌سێست له‌خولی پیشه‌گه‌ران و 4 یاری له‌خولی جامی یانه‌كانی ئێران و 15 یاری و 1 گۆڵ له‌خولی جامی یانه‌ پاڵه‌وانه‌كانی ئاسیا.
-وه‌رزی 2015-2016 له‌گه‌ڵ یانه‌ی ماشێن ته‌برێز 14 یاری و 1 گۆڵ له‌خولی پیشه‌گه‌ران و 1 یاری له‌خولی جامی یانه‌كانی ئێران.
-ساڵانی 2016 تا 2018 له‌گه‌ڵ یانه‌ی تراكتۆرسازی ته‌برێز 64 یاری و 4 گۆڵ و 1 ئه‌سێست له‌خولی پیشه‌گه‌ران و 4 یاری له‌خولی جامی یانه‌كانی ئێران و 13 یاری له‌خولی جامی یانه‌ پاڵه‌وانه‌كانی ئاسیا.
-وه‌رزی 2018-2019 له‌گه‌ڵ یانه‌ی سیپاهان ئه‌سفه‌هان  29 یاری له‌خولی پیشه‌گه‌رانی یانه‌كانی ئێران.
*دیارترین ده‌ستكه‌وته‌ به‌كۆمه‌ڵه‌كانی له‌گه‌ڵ یانه‌ی تراكتۆرسازی ته‌برێز:
-وه‌رزی 2008-2009: پاڵه‌وانی خولی پله‌ یه‌كی یانه‌كان ئێران.
-وه‌رزی 2013-2014: پاڵه‌وانی خولی جامی یانه‌كانی ئێران.
-وه‌رزی 2016-2017: پله‌ی دووه‌می خولی جامی یانه‌كانی ئێران.
-وه‌رزه‌كانی 2011-2012، 2012-2013، 2015-2016: پله‌ی دووه‌می خولی پیشه‌گه‌رانی یانه‌كانی ئێران.
-وه‌رزی 2016-2017: پله‌ی سێیه‌می خولی جامی یانه‌كانی ئێران.
-ساڵانی 2014 و 2017 پاڵه‌وانی خولی جامی شوهه‌دا.
*دیارترین ده‌ستكه‌وته‌ به‌كۆمه‌ڵه‌كانی له‌گه‌ڵ یانه‌ی سیپاهان ئه‌سفه‌هان:
-وه‌رزه‌كانی 2018-2019 پله‌ی دووه‌می خولی پیشه‌گه‌رانی یانه‌كانی ئێران.

 


created by Avesta Group and powered by Microsoft Azure