هەردوو هەڵبژاردەی دێرینەكانی عێراق و كوردستان گۆنگرەیەكی رۆژنامەنوسییان ئەنجامدا

ناوخۆیی :: 10/06/2019‌ :: 147‌ جار بینراوە
dwarozh



دواڕۆژ،ئەردەڵان محەمەد


پێش رووبەڕووبونەوەی هەردوو هەڵبژاردەی دێرینەكانی كوردستان‌و عێراق بەبۆنەی وازهێنانی ئەحمەد سالار یاریزانی پێشووی یانەی سلێمانی، لەگۆنگرەیەكی رۆژنامەنوسیدا باس لەیاریەكە دەكەن.


ئەحمەد رازی یاریزانی هەڵبژاردەی دێرینەكانی عێراق لەپرسیارێكی پەیامنێری دواڕۆژ سەبارەت بەئەنجامدانی ئەم یاریە وتی: "خۆشحاڵم كە هاتومەتە شاری سلێمانی كە لەرووی رۆشنبیری‌و پێشكەوتنەوە بەرەو پێشچوونی زۆری بەخۆیەوە بینیوە، بۆیە داواكارم لەیانەكانی كوردستان‌و عێراق رێز لەكەسایەتی‌و یاریزانە بەناوبانگەكانی بگرن، هەروەها لەهەر شارێكیتری عێراق رێز لەكەسایەتی یاریزانەكانیان بگرن ئامادەم بۆ ئەنجامدانی ئەمجۆرە یارییانە.


وتیشی: لەراستیدا پێشتر رۆژی 14ی مانگ دەستنیشان كرابوو بۆ ئەنجامدانی ئەم یارییە، بەڵام بەهۆی هاوسەرگیری كچەكەمەوە یاریەكەمان بۆ رۆژی 10ی مانگ پێشخست‌و ئێستاش لەشاری سلێمانیم بۆ ئەنجامدانی ئەم یارییە.


لەلای خۆیەوە ئەحمەد سالار بەمشێوەیە وەڵامی پرسیارێكی دواڕۆژ دەداتەوە سەبارەت بەهەستی خۆیی بەئەنجامدانی ئەم یاریەو رایگەیاند:"هەستێكی خۆشم هەیە كە لەئێستادا لەگەڵ ئەم یاریزانانەی هەڵبژاردەی كوردستان یاری دەكەم‌و سەرسامم پێیان، دەمەوێت پەیامێكیش بنێرم بۆ یاریزانە دێرینەكانی شاری سلێمانی‌و سەرجەم پارێزگاكانی كوردستان، هەرچەندە یاریزانی زۆر بەتوانا هەیە، بەڵام من زیاتر ئەو یاریزانانەم هەڵبژارد كە لەسەردەم خۆمدا یاریم لەگەڵدا كردوون، بۆیە جارێكیتر داوای لێبوردن دەكەم لەو یاریزانانەی بانگێشتم نەكردوون.


ئەوەشی خستەروو: پەیامێكم هەیە بۆ یانەی سلێمانی زۆر زۆر سوپاسیان دەكەم وەك وەفایەك یاریگای سلێمانییان بۆ دابین كردین بۆ ئەنجامدانی ئەم یاریە دۆستانەیە، لەبەرئەوە هیوادارم نمونەیان زۆر بێت نەك تەنها بۆ ئەحمەد سالار، بەڵكو بۆ سەرجەم یاریزانانی دەرەوەی شاری سلێمانیش.


بریارە ئەمڕۆ دوو شەممە كاتژمێر 9ی شەو بەبۆنەی وازهێنانی ئەحمەد سالار یاریزانی پێشووی یانەی سلێمانی یاریەكی دۆستانە لەنێوان هەردوو هەڵبژاردەی دێرینەكانی كوردستان‌و عێراق لەیاریگای سلێمانی ئەنجام بدرێت.


created by Avesta Group and powered by Microsoft Azure