بالەی پێشمەرگەكانی سلێمانی لەراماڵینی یانەكانی خولی بژاردەی عێراق بەردەوامە

ناوخۆیی :: 15/03/2019‌ :: 129‌ جار بینراوە
dwarozh


دوارۆژ، ئەردەڵان محەمەد


كێبركێكانی خولی بژاردەی بالەی یانەكانی عێراق بەردەوامە‌و پێشمەرگەكانی سلێمانیش لەسەر بردنەوەكانیان بەردەوامن و لەهۆڵی تایبەت بەخۆی لە شاری سلێمانی پێشمەرگەی سلێمانی رووبەروی یانەی حەبانیە بوەوەو لە ئەنجامدا توانی بە سێ کۆمەڵەی بێوەڵام یاریەکە بباتەوە.

هەرچەندە دەبوایە ئەم یاریە لەشاری حەبانییە ئەنجام بدرایە، بەڵام بەهۆی نەبوونی یاریگا یانەی حەبانییە بریاردرا هەردوو یاری چوون‌و هاتن لەشاری سلێمانی ئەنجام بدرێت.
یاریەكە بۆ كوڕانی پێشمەرگە گرنگ بوو بۆ ئەوەی لەركابەری یانەكانی پێشەوەی ریزبەندی دوور نەكەوێتەوە، بۆیە هەر لەسەرەتای یاریەكەوە بەبەهێزی دەركەوتن‌و توانییان یاریەكە بەسێ كۆمەڵەی بێ‌ بەرامبەر بەسودی خۆیان كۆتایی پێ بێنن.
خاڵی كۆمەڵەكان بریتی بوون لە(25-19) (25-13) (25-21).
سەڵاح كانەبی راهێنەری بالەی پێشمەرگەی سلێمانی ئەوەی بەدواڕۆژ راگەیاند: "سوپاس بۆ خوا توانیمان ئەم سەركەوتنە گرنگە بەدەست بێنین بۆ ئێمە زۆر گرنگ بوو، چونكە بردنەوەكەمان زیاتر هانمان دەدا بۆ بەردەوام بوون لەسەر بردنەوەكانمان، لەبەرئەوەی لەم هەفتەیەدا سێ یاری گرنگمان لەبەردەمدایە.
وتیشی: بردنەوەمان لەیانەی گازی باشور پاڵەوانی وەرزی رابردوو لەدەرەوەی یاریگای خۆمان بۆ ئێمە بووە پاڵپشتیەكی بەهێز بۆ بەردەوام بون لەسەر پیشاندانی ئاستی بەرزمان، بۆیە زۆر متمانەم بەیاریزانەكانم هەیە بۆ بەردەوام بوون لەسەر ئەم ئاستە بەرزەمان.
یانەی پێشمەرگەی سلێمانی تائێستا پێنج یاری ئەنجامداوە‌و خاوەنی چوار بردنەوە‌و دۆراندنێكە‌و سێ یاری كەمتر لەیانەكانیتری خولەكە ئەنجامداوە بەهۆی بەشداریكردنی سێ یاریزانی لەگەڵ یانەی گازی باشور لەپاڵەوانێتیی یانەكانی وڵاتانی عەرەب.
یاریەكانی خولی بژاردەی بالەی یانەكانی عێراق بەبەشداری هەشت یانە بەشێوازی چوون‌و هاتن بەرێوەدەچێت‌و هەردوو یانەی پێشمەرگەی سلێمانی‌و هەولێریش وەك دوو یانەی نوێنەری یانەكانی كوردستان لەخولەكەدا بەشدارن.


created by Avesta Group and powered by Microsoft Azure