وێنە:ناوەندی وەرزش و لاوانی هەولێر خولی یۆگا بۆ ئافرەتان و وەرزشە جۆراوجۆرەکان بۆ لاوان دەکاتەوە

ناوخۆیی :: 11/01/2019‌ :: 163‌ جار بینراوە
dwarozh


تاگ :: گشتی

دواڕۆژ، ئاری عەبدوڵڵا
لە ژێر چاودێری و پاڵپشتی رێکخراوی یونسێفی جیهانی و بە هاوکاری رێکخراوی نێودەوڵەتی پاو (P.A.O)، ناوەندی وەرزش و لاوانی هەولێر بەردەوامە لە کردنەوەی خولی جۆراوجۆری وەرزشی بۆ گەنجان و ئافرەتان لە نوێترین چالاکیش هەڵسا بە کردنەوەی خولی راهێنانی وەرزشی یۆگا بۆ خانمان کە ئەمە جاری یەکەم بوو لە شاری هەولێر خولی لەمجۆرە بۆ ئافرەتان رێکبخرێت.
ناوەندی وەرزش و لاوانی هەولێر بە بەشداری دەیان ئافرەتی شاری هەولێر و دەورووبەری و بە هاوکاری رێکخراوی پاو و رێکخراوی یونسێف، هەڵستان بە کردنەوەی ئەم خولەی یۆگا بۆ خانمان کە ئامانج لێی ئاشناکردنی ئافرەتان بوو بەم وەرزشە.
ناوەندی وەرزش و لاوان جگە لە گرنگیدانی بە وەرزشی ئافرەتان، چەندین خولی جۆراوجۆری وەرزشی بۆ لاوان کردەوە لە یارییەکانی ؛ مشتەکۆڵە ، تایکواندۆ، بەرزکردنەوەی قورسایی و خولەکانی تۆپی پێی بچووککراوە و یاریگەی گەورە.
(ئەحمەد شکور) کە تازە بۆتە بەڕێوەبەری ناوەندی وەرزش و لاوانی هەولێر بە دواڕۆژی راگەیاند: "ساڵانە لە پڕۆژەی هاوبەشی نێوان بەڕێوەبەرایەتییەکەمان و رێکخراوی یونسێفی نێودەوڵەتی ئەوەیە کە سەدان چالاکی وەرزشی و هونەری و کەلتوری بۆ کوڕان و کچانی شاری هەولێر رێکبخەین و بە نیازین چوارچێوەی کارەکانمان فراوانتر بکەین و رۆڵی ژنان و کچان لە چالاکیەکان زیاتر بکەین"
ئەم بەرپرسەی ناوەندی وەرزش و لاوان ئاماژەی بەوەدا جگە لە فەرمانبەرانی خۆیان کە ئەزموونی زۆریان لە یارییە وەرزشییەکان هەیە، راهێنەرانی خۆبەخشیش لەم ناوەندە هەوڵدەدەن گەنج و لاوەکان سود لە ئەزموونەکانیان ببینن.


created by Avesta Group and powered by Microsoft Azure