ئایا جۆری خۆراك رۆڵی هەیە لە كێشەی عازەبە و زیپكەی رووخساردا؟ دكتۆر دواڕۆژ وه‌ڵامده‌داته‌وه‌

تەندروستی :: 21/09/2019‌ :: 338‌ جار بینراوە
dwarozh


دواڕۆژ

دروستبوونى زیپكه‌ له‌سه‌ر رووخسار له‌ ته‌مه‌نى هه‌رزه‌كاریدا، یه‌كێكه‌ له‌و كێشانه‌ى كه‌ رووبه‌ڕووى هه‌موو كه‌سێك به‌بێ جیاوازى ره‌گه‌ز ده‌بێته‌وه‌، هه‌ربۆیه‌ نه‌خۆشێك كه‌ به‌كارهێنه‌رى دكتۆر دواڕۆژه‌ له‌و باره‌یه‌وه‌ پرسیار ده‌كات.


نه‌خۆشه‌كه‌ به‌مشێوه‌یه‌ پرسیاره‌كه‌ ده‌كات
پرسیار: ئایا جۆری خۆراك رۆڵی هەیە لە كێشەی عازەبە و زیپكەی دەموچاودا؟

دكتۆر دواڕۆژ به‌مشێوه‌یه‌ وه‌ڵامده‌داته‌وه‌
لەناو هەرزەكار و گەنجاندا عازەبە و زیپكەی دەموچاو كێشەیەكی هێندە بەربڵاوە كە زیاتر 80%ی مرۆڤ لەو تەمەنەدا ئەزموونی دەكەن.

عازەبە كاتێك دەردەكەوێت كە رژێنە چەورییەكانی پێست بڕی زۆر چەوری بەرهەم بهێنێت لەڕێگەی كونیلەكانی پێستەوە. بەكارهێنانی كرێمیش بۆ چارەسەركردنی ئەو زیپكانە كێشەكە ئاڵۆزتر دەكات، چونكە كونیلەكان دەگرێت و چەورییەكان كۆدەبنەوە. لە ئەنجامدا بەكتریای پێست ئەو رژێنە وردانە تێك دەشكێنێت و دەبێتە هەوكردنیان و دەركەوتنی لیر و زیپكە.

تازەترین توێژینەوە دەریخستووە كە چاكتر لە بەكارهێنانی كرێم و مەرهەمی جۆراوجۆر بۆ چارەسەری ئەم كێشەیە پەیڕەوكردنی سیستمێكی خۆراكییە كە دەوڵەمەند بە زینك، چونكە ئەوانەی كە كێشەی عازەبەیان هەیە، دەركەوتووە رێژەی زینك لە جەستەیاندا كەمە، بۆیە دەبێت قەرەبووی ئەو كەمییە بكرێت.

زینك لە زۆر خۆراكدا هەیە بەڵام خۆراكە هەرە دەوڵەمەندەكان بریتین لە چەرەس، گۆشتی بێ‌ چەوری، مریشك، ماست، شیری بێ‌ چەوری و گوێچكە ماسی، هەروەها ڤیتامین A یارمەتیدەرە بۆ پارێزگاریكردن لە پێستێكی تەندروست. ئەم ڤیتامینە لە هێلكەدا زۆرە. جگە لەم دوانە توخمی بێتا كارۆتینیش زۆر گرنگە بۆ پێستێكی پاراو و شەوقدار. بێتا كارۆتین لە سەوزە تۆخەكاندا وەك سپێناغ و میوە پرتەقاڵییەكانی وەك گێزەر و پرتەقاڵ و قەیسی و مانگۆدا زۆرە. جگە لەم سێ‌ توخمە گرنگە پێویستە كەسانی تووشبوو بە عازەبە و زیپكەی دەموچاو بەكارهێنانی چەورییە ناتێرەكان و ڤیتامین B زیاد بكەن لە سیستمی خۆراكیاندا.

دكتۆر دواڕۆژ پڕۆژه‌یه‌كى هاوبه‌شى نێوان شارى پزیشكى فاروق و ده‌زگاى دواڕۆژه‌ بۆ رۆشنبیرى و راگه‌یاندن، تێیدا پزیشكانى پسپۆڕى شارى پزیشكى فاروق وه‌ڵامى پرسیاره‌ ته‌ندروستییه‌كانى هاووڵاتیان ده‌ده‌نه‌وه‌ و رێنموونیان ده‌كه‌ن بۆ چاره‌سه‌ركردنى كێشه‌ ته‌ندروستییه‌كانیان، تۆش ده‌توانتیت به‌ كلیك كردن لێره‌ پرسیاره‌ ته‌ندروستییه‌كانت ئاراسته‌ى دكتۆر دواڕۆژ بكه‌یت.


دا: ئا.ح

created by Avesta Group and powered by Microsoft Azure