هەڵمەتی سەوزكردنی ژینگەی هەڵەبجە راگەیەنرا

ژینگە :: 27/08/2019‌ :: 149‌ جار بینراوە
dwarozh


تاگ :: ژینگە

دواڕۆژ، عەلی حەمە سەعید


وەك دەربڕینی هاوخەمی بۆ سووتانی دارستانەكانی ئەمازۆن و هاوكات زیاتر سەوزكردنی ژینگە و سروشتی هەڵەبجە، هەڵمەتێك بۆ سەوزكردنی ژینگەی هەڵەبجە راگەیەنرا.


د. ئازاد مستەفا، بەڕێوەبەری گشتی تەندروستی هەڵەبجە ئەمڕِۆ سێشەممە 27ی ئابی 2019بە دواڕۆژی راگەیاند "وەك دەربڕینی هاوخەمییەك بۆ سووتانی دارستانەكانی ئەمازۆن كە ماوەی چەند رۆژێكە ئاگریان تێبەربووە، ئێمە ئەم بابەتەمان بە دەرفەت زانی كە لە هەڵەبجەوە هەڵمەتی سەوزكردنی شارەكەمان رابگەیەنین و ئەمڕۆش لەبەردەم نەخۆشخانەی بەركەوتوانی چەكی كیمیایی هەڵمەتێكی نەمام ناشتنمان دەستپێكرد".

ئاماژەی بەوەشكرد، هەڵمەتەكە بۆ ماوەی هەفتەیەك بەردەوامیی دەبێت و سەرجەم هاووڵاتیان و كارمەندانی تەندروستی و فەرمانبەرانی بەڕێوەبەرایەتییەكانی دیكەش دەتوانن بە ناشتنی نەمامێك لە هەر شوێنێكی هەڵەبجەدا بێت بەشداری بكەن لە سەوزكردنی ژینگە و سروشتی هەڵەبجە و پاكڕاگرتنی ژینگەی شارەكەمان.

بەڕێوەبەری تەندروستی هەڵەبجە ئەوەشی خستەڕوو، هەڵمەتەكەمان لە ئەمڕۆوە دەستپێكردووە و تا یەك هەفتە بەردەوامیی دەبێت، هەروەها ئەنجامدانی ئەم هەڵمەتە ژینگەییە گرنگی خۆی دەبێت لە زیاتر سەوزكردنی ژینگەی شارەكەمان و هەروەها بەخشینی سیمایەكی جوانتر بە سروشتی هەڵەبجە، بۆیە زۆر گرنگە هاووڵاتیان بە سەرجەم چین و توێژەكانەوە بەشداری ئەم هەڵمەتە بكەن.

پێداچوونەوە: ئارام غەفور 



created by Avesta Group and powered by Microsoft Azure