دواڕۆژ

تیمیکی ڕووسی سەر بە پەیمانگای کورشاتوڤ نهێنی ئەو تێکەڵە فیرعەونیەیان دۆزیەوە کە قژی مۆمیایەکی تەمەن 3 هەزار ساڵی بەتەواوەتی پاراستبوو.

زاناکان پشکنینیان بۆ سێ مۆمیای میسری کرد کە مێژووەکەیان دەگەڕێتەوە بۆ هەزار ساڵ پێش زاینی و ئەوەی سەیرە قژیان بەتەواوەتی پارێزرابوو، زاناکان بۆیان دەرکەوت تێکەڵەیەک لە چەوری گۆشتی مانگا و زەیتی گەرچەک و مۆمی هەنگوین و بنێشتی دار سنەوبەر و دڵۆپێک زەیتی فستقی بۆندار بۆ قژی مۆمیاکە بەکارهێنراوە.

هەروەها پسپۆران ئاماژەیان بەوەدا فیرعەونیەکان تێکەڵەی جیاوازیان بۆ مۆمیاکردنی مردووەکانیان بەکارهێناوە، یەکێکیان تایبەت بە لەش و ئەوەی تریان بۆ قژ و بۆ سەر.
پرۆسەی مۆمیاکردن لە میسری کۆندا بەشێوەیەک بووە ئەندامەکانی ناوەوەی تەرمەکەیان دەرهێناوە و دواتر بە تێکەڵەیەک خوێ لاشەکەیان وشککردووەتەوە، پاشان بە قوماشێکی تەڕکراو بە تێکەڵەیەکی ڕووەکی و زەیتیان دەبەستەوە.

وەرگێڕان:هیڤی فەرهاد