شێوازی خۆراكی منداڵ ره‌نگه‌ ئۆتیزم دیاری بكات

تەندروستی :: 12/07/2019‌ :: 1212‌ جار بینراوە
dwarozh


تاگ :: تەندروستی

دواڕۆژ


لێكۆڵینه‌وه‌یه‌كی نوێی ئه‌مریكی ده‌ریده‌خات كه‌ شێوازی نائاسایی خۆراكی منداڵ ده‌شێت نیشانه‌ بێت بۆ ئه‌گه‌ری ئۆتیزم. 

به‌پێی لێكۆڵینه‌وه‌كه‌، خواردنی نائاسایی منداڵ بۆ نمونه‌ خواردنی ته‌نیا ژماره‌یه‌كی زۆر كه‌م جۆری خۆراك، فره‌هه‌ستیاریی به‌رامبه‌ر خۆراك یان پله‌ی گه‌رمیی خۆراكه‌كه‌ و قوتدانی خۆراك پێش جوینی پێویست، ده‌شێت نیشانه‌ بن بۆ ئۆتیزم.

لێكۆڵینه‌وه‌كه‌ له‌سه‌ر ره‌فتاری 2 هه‌زار منداڵ ئه‌نجام درا و ده‌ركه‌وت چۆنێتیی خواردن له‌ 70%ی منداڵانی ئۆتیزمدا نائاساییه‌. ئه‌م حاڵه‌ته‌ نائاساییانه‌ له‌ منداڵی یه‌ك ساڵانه‌وه‌ كه‌ هێشتا ئۆتیزمیان تێدا ده‌ستنیشان نه‌كراوه‌ ده‌رده‌كه‌وێت. هه‌ر بۆیه‌ گرنگه‌ له‌و قۆناغه‌ سه‌ره‌تاییانه‌دا كه‌سانی پسپۆڕ له‌و شێوازه‌ نائاساییه‌ی خواردنی منداڵ ئاگادار بكرێنه‌وه‌.

زۆرێك له‌و منداڵانه‌ی ئۆتیزمیان هه‌بووه‌ ته‌نیا چه‌ند جۆرێكی كه‌م خۆراكیان خواردووه‌ كه‌ به‌رهه‌می دانه‌وێڵه‌ن له‌وانه‌ش پاستا و نان، چونكه‌ فره‌ هه‌ستیارن به‌رامبه‌ر خۆراكه‌كانی تر و خۆیانی لێ به‌دوور ده‌گرن.

به‌شێوه‌یه‌كی گشتی 1 منداڵ له‌ هه‌موو 160 منداڵێك شێوازێكی ئۆتیزمی تێدا ده‌رده‌كه‌وێت، به‌ وته‌ی پسپۆڕان، هه‌ندێك هۆكاری بۆماوه‌یی و ژینگه‌یی هه‌ن كه‌ ده‌بنه‌ هۆی ده‌ركه‌وتنی ئۆتیزم و هه‌تا زووتر ده‌ستنیشان بكرێت باشتر ده‌توانرێت مامه‌ڵه‌ی له‌گه‌ڵ بكرێت. هه‌رچه‌نده‌ له‌ خوار ته‌مه‌نی 12 مانگییه‌وه‌ ده‌ستنیشانكردنی ئۆتیزم كارێكی قورسه‌، به‌ڵام دواتر و له‌گه‌ڵ دواكه‌وتنی توانای زمانه‌وانی و كۆمه‌ڵایه‌تی و دووباره‌كردنه‌وه‌ حاڵه‌ته‌كه‌ ده‌ستنیشان ده‌كرێت.

و: س ر
پێداچونەوە: ئارام غەفور 

بڵاوکردنەوە: رێباز



created by Avesta Group and powered by Microsoft Azure