پیاوێک یەک ساڵ خۆراکی ماوەبەسەرچووی خوارد و ئەنجامەکەی بەم شێوەیە بوو

هەمەڕەنگ :: 19/06/2019‌ :: 6181‌ جار بینراوە
dwarozh


دواڕۆژ
ساڵی رابردوو سكۆت ناش كه‌ دامه‌زرێنه‌ری بازاڕێكی خۆراكی ئۆرگانییه‌ به‌ناوی مه‌مز ئۆرگانیك ماركێت بڕیارێكی سه‌یری دا. سكۆت ناش بڕیاری دا بۆ ماوه‌ی یه‌ك ساڵ خۆراكی ماوه‌ به‌سه‌رچوو بخوات و رۆژانه‌ كوپێك ماستی ده‌خوارد كه‌ چه‌ند مانگێك به‌سه‌ر ماوه‌كه‌یدا تێپه‌ڕیبوو، هه‌روه‌ها تۆرتیلای ده‌خوارد كه‌ ساڵێك به‌سه‌ر ماوه‌كه‌یدا تێپه‌ڕیبوو.

سكۆت ناش ئه‌م كاره‌ی بۆ ماوه‌ی ساڵێك ئه‌نجام دا و مه‌به‌ستی ئه‌وه‌ بوو بزانێت ئایا ماوه‌ی به‌سه‌رچوونی خۆراكه‌كان كاریگه‌ریی له‌سه‌ر راده‌ی ته‌ندروستییان هه‌یه‌ یان نا، و بۆی ده‌ركه‌وت كه‌ زۆربه‌ی جار مێژووی به‌سه‌رچوونی خۆراكه‌كه‌ مانای خراپبوونی ماده‌ خۆراكییه‌كه‌ نییه‌ له‌و مێژووه‌دا، به‌ڵكو ته‌نیا مانای ئه‌وه‌یه‌ كه‌ كۆمپانیاكه‌ پێی وایه‌ تا ئه‌و مێژووه‌ به‌رهه‌مه‌ خۆراكییه‌كه‌ باشترین شێوه‌ و سوودی خۆراكی هه‌یه‌.

به‌دڵنیاییه‌وه‌ خۆراكی وه‌ك گۆشتی خاو و شیری به‌سته‌ره‌ نه‌كراو و په‌نیره‌كان پێویسته‌ به‌ تازه‌یی بخورێن و پاش ماوه‌ی به‌سه‌رچوونیان نه‌خورێن، به‌ڵام زۆر خۆراكی تر هه‌ن كه‌ ته‌مه‌نیان زۆر درێژتره‌.

له‌ راپرسییه‌كدا له‌ ئه‌مریكا ده‌ركه‌وتووه‌ كه‌ 91%ی به‌كارهێنه‌ران كاتێك ماوه‌ی خۆراكێك به‌سه‌ر بچێت فڕێی ده‌ده‌ن و ئه‌وه‌ش واده‌كات خۆراكێكی زۆر به‌فیڕۆ بچێت. به‌ڵام ئه‌مه‌ جگه‌ له‌ زیانی دارایی زیان به‌ ژینگه‌ش ده‌گه‌یه‌نێت.

سكۆت ناش پاش ئه‌وه‌ی ساڵێك خۆراكی ماوه‌ به‌سه‌رچووی خوارد و تووشی هیچ زیانێكی ته‌ندروستی نه‌بوو، داوا ده‌كات له‌بری ئه‌وه‌ی (ماوه‌ی به‌سه‌رچوون) له‌سه‌ر خۆراك بنووسرێت، به‌ روونی كاتی تێكچوونی خۆراكه‌كه‌ بنووسرێت نه‌ك ئه‌و كاته‌ی كه‌ خۆراكه‌كه‌ ره‌نگه‌ ته‌نیا جوانی و تامه‌كه‌ی له‌ده‌ست بدات. به‌وه‌ش زۆرێك له‌و خۆراكه‌ی ئێستا فڕێ ده‌درێن ماوه‌یه‌كی زیاتر ده‌مێننه‌وه‌ و له‌و ماوه‌یه‌دا به‌كار ده‌هێنرێن، ئه‌مه‌ش بۆ ئابووری و ژینگه‌ به‌سووده‌.

و: س ر
پ: رێباز



created by Avesta Group and powered by Microsoft Azure