گروپێکى راستڕەو بە نیازه‌ جەنگى ناوخۆیی لە ئەڵمانیا بەرپابکات

هەواڵ / جیهان :: 29/04/2019‌ :: 151‌ جار بینراوە

تاگ :: جیهان

دواڕۆژ

رۆژنامەى Welt am Sonntag ئەڵمانى، ئاشکرایکرد: نوسینگەى فیدراڵى پاراستنى دەستوور (هەواڵگرى ناوخۆ) لە راپۆرتێکیدا ئاماژەى بە ئامادەکارییەکانى گروپێكی راستڕەوى توندڕەوەکان کردووە کە دیانەوێت جەنگێکى ناوخۆیی لە ئەڵمانیا بەرپابکات.


لەڕاپۆڕتەکەدا هاتووە: ژمارەیەک لە راستڕەوە توندڕەوەکان کە پشتگیرى لە توندوتیژى دەکەن لە ئەڵمانیا، لەسەر شێوەى تاک و گروپ چالاکییەکانیان لەماوەى مانگى رابردوودا زیادیکردووە و زۆربەیان لە ناو سوپا و پۆلیسى ئەڵمانیا کاردەکەن و تەمەنیان ٣٠ ساڵە.

ئەوەشى خستووه‌تەڕوو: ئەو توندڕەوانە ژمارەیان ٣٣ کەسە و لە رێگاى ئینتەرنێتەوە پەیوەندى بەیەکترییەوە دەکەن و ئێستا ڕاهێنان لەسەر بەکارهێنانى تەقەمەنى دەکەن، وەک هەوڵێک بۆ ئەنجامدانى کردەوەى تیرۆریستى و بەنیازن جەنگێکى ناوخۆیی لە ئەڵمانیا بەرپا بکەن، ئەمەش گرفتى بۆ هێزە ئەمنییەکان دروستکردووە، چونکە ناتوانرێت بەئاسانى دەستگیربکرێن، هۆکارەکەشى بۆ ئەوە دەگەڕێننەوە کە ئەو گروپە لە رێگاى ئینتەرنێت و تۆڕە کۆمەڵایەتییەکانەوە پەیوەندى بەیەکەوە دەکەن.

و: ئاکۆ زەنگەنە
پێداچوونه‌وه‌: ئیحسانی مه‌لا فوئاد

بڵاوکردنەوە: ک. س



created by Avesta Group and powered by Microsoft Azure