تێرێزامەى گلۆپى سەوزى بۆ كۆمپانیای هواوى هەڵکرد

هەواڵ / جیهان :: 25/04/2019‌ :: 597‌ جار بینراوە

تاگ :: جیهان

دواڕۆژ

تێرێزا مه‌ى سەرۆک وەزیرانى بریتانیا، گلۆپى سەوزى بۆ کۆمپانیاى هواوى چینى هەڵکرد، تاوه‌کو بەشدار بێت لە دروستکردنى تۆڕى نەوەى پێنجەم کە بە (5G) ناسراوە.


لەوبارەیەوە رۆژنامەى (دەیلى تەلەگراف)ی بریتانى ئاشکرایکرد: کە رۆژى سێشەممەى رابوردوو ئەنجومەنى ئاسایشى نەتەوەیی کە (تێرێزا مەى) سەرۆکایەتى دەکات، رەزامەندى نیشانداوە، تاوه‌کو ئەو کۆمپانیا چینییە بە شێوەیەکى سنوردار بەشدارى بکات لە بونیادنانى ژێرخانى گەیه‌نەرە هەواییەکانى ئەو تۆڕە پێشکەوتووە.

وەرگرتنى ئەو بڕیارەش دواى ئەو مەترسی و هۆشدارییانە دێت کە هەندێک لە وەزیرەکانى مەى خستبوویانەڕوو، وەک ساجید جاوید وەزیرى ناوخۆ و جێرمى هانت وەزیرى دەرەوە، گاڤن ولیامسۆن وەزیرى بەرگرى و لییام فۆکس وەزیرى بازرگانى و بینى مۆردۆنت وەزیرى گەشه‌پێدانى نێودەوڵەتى.

لاى خۆشییەوە کۆمپانیاى هواوى لە بەیاننامەیەکدا رایگه‌یاند: خۆشحاڵین کە حکومەتى بریتانیا رەزامەندى نیشانداوە، تاوه‌کو کۆمپانیاکەمان بەشدارى بکات لە بونیادنانى تۆڕى نەوەى پێنجەم لە وڵاتەکەیان.

ئەمەش لەکاتێکدایە کە پێشتر ویلایەتە یەکگرتووەکانى ئەمریکا، بەکارهێنانى تۆڕى پێنجەمى ئەو کۆمپانیا چینییەى لەسەر خاکى وڵاتەکەى قەدەغە کردبوو .

و: ئاکۆ زەنگەنە
پێداچوونه‌وه‌: ئیحسانی مه‌لا فوئاد



created by Avesta Group and powered by Microsoft Azure