بەكارهێنانی سەتڵی رەنگاوڕەنگ بۆ ماست قەدەغەكرا

هەواڵ / کوردستان :: 24/04/2019‌ :: 319‌ جار بینراوە
مه‌ترسى له‌سه‌ر ته‌ندروستى مرۆڤ هه‌یه‌

دواڕۆژ

لە سلێمانی بەكارهێنانی سەتڵی رەنگاوڕەنگ بۆ ماست و جۆرەكانی تری خواردن قەدەغەدەكرێت و قائیمقامی شارەكەش دەڵێت: مەبەست لە بڕیارەكە پاراستنی تەندروستی هاوڵاتیانە.

 
ئاوات محەمەد، قائیمقامی سلێمانی (ئەمڕۆ چوارشەممە 24ى نیسانى 2019) رایگەیاند: بەپێی ئەو توێژینەوە و بەدواداچوونانەی لەلایەن لیژنە پسپۆڕەكانەوە كراوە بەكارهێنانی سەتڵی رەنگاوڕەنگ بۆ ماست زیان بە تەندروستی مرۆڤ دەگەیەنێت و بەهۆی زیانە تەندروستیەكانیەوە بڕیاری قەدەغەكردنیان داوە.

وتیشى: "مەبەست لە بڕیارەكە پاراستنی تەندروستی هاوڵاتیانە و هەر فرۆشیارێك پابەندنەبێت رووبەڕووی سزای یاسایی دەكرێتەوە".

لێدوانه‌كه‌ى قائیمقام ئه‌مڕۆ له‌ په‌راوێزى كۆبونه‌وه‌یدا بوو له‌گه‌ڵ لەگەڵ لیژنە هاوبەشەكانی قائیمقامیەتی سلێمانی و لیژنەی تەندروستی سەر بە بەڕێوەبەرایەتی تەندروستی سلێمانی.

لاى خۆیه‌وه‌ لەشكر حەمید، سەرپەرشتیاری لیژنەكانی تەندروستی سەر بە بەڕێوەبەرایەتی تەندروستی سلێمانی رایگەیاند: بەكارهێنانی سەتڵی رەنگاوڕەنگ بۆ ماست و جۆرەكانی تری خواردن دەبێتە هۆی كارلێككردنی هەندێك مادەی زیانبەخش لەگەڵ ماستەكەدا كە ئەمەش زیان بە تەندروستی مرۆڤ دەگەیەنێت و دەبێتە هۆی توشبوون بە نەخۆشی شێرپەنجە.

ئاماژەی بۆ ئەوەشكرد: زۆربەی سەتڵە رەنگاوڕەنگەكان لە مەوادی دووبارە بەكارهاتوو دروستدەكرێت كە بەهیچ جۆرێك دروست نیە خواردنی تێیدا هەڵبگیرێت.

لەشكر حەمید دەشڵێت: سەتڵی سپی سادە بۆ ماست گونجاوە بەكاربهێندرێت و پێویستە لۆگۆیەكی سێ گۆشەی لەسەر بێت و تێیدا ئاماژە بە ژمارە "2 یان 4" كرابێت. ئاماژەی بۆ ئەوەشكرد بەكارهێنانی سەتڵەكانی "شوشە و فافۆن و گلی سورەوەكراو" بۆ ماست رێگەپێدراوە و هیچ گرفتێكی نیە.

هەروەها گۆران قادر، سەرۆكی لیژنە هاوبەشەكانی قائیمقامیەت رایگەیاند: دوای بڕیاری قەدەغەكردنی سەتڵی رەنگاوڕەنگ بۆ ماست و جۆرەكانی تری خواردن رێگە بەهیچ فرۆشگا و ماركێتێك نادەن ئەو جۆرە سەتڵانە بكاربهێنێت و لە هەر شوێنێك ببینرێت دەستی بەسەردا دەگیردرێت.

داڕشتنه‌وه‌: شیروان شه‌ریف 



  • ڕۆژ
  • هەفتە
  • مانگ
created by Avesta Group and powered by Microsoft Azure

بەپەلە