بۆچوونی یه‌كێتی له‌باره‌ى كاندیدكردنه‌وه‌ی ئاشتی هه‌ورامی بۆ پۆستەکەی

هەواڵ / کوردستان :: 18/04/2019‌ :: 3026‌ جار بینراوە

دواڕۆژ، پشتیوان جەمال

سەرچاوەیەك لە مەكتەبی سیاسی یەكێتی نیشتمانیی كوردستان رایدەگەیەنێت، تائێستا قسەیان لەسەر كاندیدكردنەوەی ئاشتی هەورامی بۆ وەزیری سامانە سروشتییەكان نەكردووە، دەڵێت: "پێمانباشە تێبینی دەربارەی كاندیدەكانمان بەیەكدی بڵێین".


سەرچاوەیەك لە مەكتەبی سیاسی یەكێتی نیشتمانی كوردستان ئەمڕۆ 18ی نیسانی 2019 بەدواڕۆژی راگەیاند: ئەگەر ئێمە و پارتی هەر تێبینییەكمان لەسەر وەزیرەكانی یەكدی هەبێت باسی دەكەین، به‌ڵام تائێستا لەمەكتەبی سیاسی و سەركردایەتی قسەیەكی دیاریكراومان لەسەر كاندیدكردنەوەی ئاشتی هەورامی بۆ وەزیری سامانە سروشتییەكان نەكردووە، بەڵام كە بابەتەكە هاتە سەر مەسەلەی كاندیدەكان، بەدڵنیاییەوە هەردوولا قسەمان لەسەر كاندیدەكانمان دەبێت".

ئەو سەرچاوەیەی یەكێتی وتیشی: "لەكابینەكانی پێشوودا لەگەڵ پارتی تێبینیمان لەسەر كاندیدەكانی یەكدی هەبووەو بۆ ئەمجارەش پێمانباشە تێبینی دەربارەی كاندیدەكانمان بەیەكدی بڵێین".

هاوكات زیاد جەبار، پەرلەمانتاری یەكێتی لە پەرلەمانی كوردستان بەدواڕۆژی راگەیاند: هەركەسێك دەبێتە وەزیری سامانە سروشتییەكان دیارە ئەوە لەبەركەوتەی پارتییە و خۆیان ئازادن، بەڵام ئەوەی هەیە و لەملاولاوە دەیبیستین ئاڕاستەكە بەوەیە كەمترین لەوانەی لەحكومەتی پێشوو هەبوون بەشدارببنەوە، بەڵام ئیدی ئەوە پەیوەندی بە پارتییەوە هەیە و ئێمە تێبینیمان نییە".

بەپێی زانیارییەكانی دواڕۆژ كە لەچەند سەرچاوەیەكەوە وەریگرتووه‌، پارتی ئەمجارەش ئاشتی هەورامی بۆ وەزیری سامانە سروشتییەكان كاندید دەكاتەوە.

پێداچوونەوە: ئارام غەفور
بڵاوكردنه‌وه‌: ئیحسانی مه‌لا فوئاد



  • ڕۆژ
  • هەفتە
  • مانگ
created by Avesta Group and powered by Microsoft Azure