پڕۆژه‌ قانوونه‌ك دێ پارچه‌یێن ئه‌ردی و مووچه‌یه‌كێ ده‌ته‌ قوربانیێن ئێزدی

هەواڵ / ڕاپۆرت :: 14/04/2019‌ :: 213‌ جار بینراوە

تاگ :: داعش

دواڕۆژ، بورهان یه‌حیا

سه‌رۆكاتییا كۆمارا ئیراقی ب رێیا په‌ڕله‌مانێ ئیراقێ پڕۆژه‌ قانوونه‌ك بۆ پشته‌ڤانیكرنا قوربانیێن ئێزدی یێ نسه‌ر ده‌ستێ داعش پێشكێش كرییه‌ و تێدا دێ رزگاربوویی هێنه‌ خانه‌نشینكرن و مووچه‌یه‌كێ مه‌هانه‌ دگه‌ل پارچه‌یه‌كا ئه‌ردی وه‌رگرن و ده‌لیڤه‌یێن كاری بۆ هێنه‌ دیتن و جڤاتا رۆحانییا ئێزدییان ژی پشته‌ڤانیێ لێ دكه‌ت و دخوازیت په‌رله‌مان ب زووترین ده‌م په‌سه‌ند بكه‌ت.

سه‌رۆكاتییا كۆمارا ئیراقێ ب رێیا په‌ڕله‌مانێ ئیراقێ پڕۆژه‌ قانوونه‌ك پێشكێش كرییه‌ ب مه‌ره‌ما هندێ ئه‌و شوهیدێن ئێزدی یێن ده‌ستێ داعش هه‌مان ئیمتیازێن شه‌هیدێن سه‌نگه‌ر وه‌ربگرن و یێن ره‌ڤاندی و به‌رزه‌بوویی ژی هه‌مان ئیمتیازێن به‌رزه‌بوویێن ده‌ستێ داعش وه‌ربگرن و پێشتر ژی هه‌مان پڕۆژه‌ قانوون ب هه‌مان به‌ندان ل په‌ڕله‌مانێ كوردستانێ گه‌نگه‌شه‌ سه‌ر هاتییه‌كرن لێ هێشتا نه‌هاتییه‌ په‌سه‌ندكرن.

مووچه‌ و پارچه‌یێن ئه‌ردی بۆ قوربانیێن ئێزدی دێ هێنه‌ دابینكرن
شه‌مۆ قاسم به‌رپرسێ ره‌وشه‌نبیری و راگه‌هاندنا بنگه‌هێ لالش یێ ره‌وشه‌نبیری و جڤاكی بۆ دواڕۆژ رۆهنكر" ئه‌ڤ پڕۆژه‌ قانوونه‌ پێدڤییه‌كا مه‌زن بوویه‌ و جهێ دلخۆشیێ یه‌ و پێدڤییه‌ ژلایێ په‌ڕله‌مانێ ئیراقێ ره‌زامه‌ندی سه‌ر بهێته‌كرن و كار پێ بهێته‌كرن چونكو تێدا گه‌له‌ك پشته‌ڤانی ل قوربانیێن ئێزدی یێن ده‌ستێ داعش هاتییه‌كرن وه‌كو پێدانا مووچه‌یه‌كێ مه‌هانه‌ و پارچه‌یه‌كا ئه‌ردی و قه‌ره‌بووكرنا هه‌موو لایه‌نی یێن زیانڤێكه‌فتیێن ده‌ستێ داعش".

مه‌ پێخۆش نینه‌ هه‌ڤڕكییا سیاسی سه‌ر ڤی پڕۆژه‌ قانوونێ هه‌بیت
پتری (6417) وه‌لاتیێن ئێزدی ژ هه‌ر دوو ره‌گه‌زان ره‌ڤاندن و هه‌تا نوكه‌ پتری 3400 ژێ هاتینه‌ رزگاركرن و نێزیكی 3000 ژی چاره‌نڤیسێ وان دیار نینه‌، شه‌مۆ قاسم خویاكر" مه‌ پێخۆش نینه‌ لسه‌ر ڤی پڕۆژه‌ یاسای هه‌ڤڕكییا حزبی بهێته‌كرن و هه‌ر لایه‌نه‌ك بێژیت ئه‌ڤه‌ پڕۆژه‌یێ مه‌ یه‌ و یێ دی بێژیت پێشتر ئه‌ڤ پڕۆژه‌ هاتییه‌ پێشكێشكرن، چونكو پڕۆژه‌یه‌كه‌ بۆ خزمه‌تكرنا ئێزدییان كو بووینه‌ قوربانیێن ده‌ستێ داعش و ب ڤی ره‌نگی به‌شه‌ك ژ خه‌مێن كه‌سوكارێن وان سڤك ببیت".

جڤاتا رۆحانیێن ئێزدی پشته‌ڤانیێ ل ڤی پڕۆژه‌ی دكه‌ت
جڤاتا رۆحانییا ئێزدییان د به‌یاننماه‌یه‌كێ دا پشته‌ڤانیێ ل ڤێ پێنگاڤێ دكه‌ت و دبێژیت" ئه‌ڤه‌ پێنگاڤه‌كا زۆر باش بۆ كێمكرنا برینێن كه‌سوكارێن قوربانیێن ده‌ستێ داعشه‌ و پێدڤییه‌ هه‌موو  لایه‌نێن په‌یوه‌ندیدار دگه‌ل په‌ڕله‌مانتارێن ئیراقێ ب له‌ز خواندنێن جودا بۆ بهێنه‌كرن و كار بۆ په‌سه‌ندكرنا وێ بهێته‌كرن و ئه‌ڤه‌ دێ پالده‌ره‌ك بیت بۆ پتر به‌لاڤكرنا ئاشتی و پێكڤه‌ژیانێ".

دیاركر" لایه‌نێن په‌یوه‌ندیدار چ ل هه‌رێمێ و چ ل ئیراقێ ڤێت كار بۆ دووباره‌ ڤه‌گه‌راندنا ره‌ڤاندیێن ئێزدی یێن ل ده‌ستێن داعش وه‌ك ژن و زارۆیان بكه‌ن و چاره‌نڤیسێن یێن مایی بهێنه‌ دیاركرن".

ئاماژه‌كرییه‌" حوكمه‌تا ئیراقێ ڤێت هه‌موو ئاسانكاری و هه‌ماهه‌نگی و بزاڤان بۆ دووباره‌ ڤه‌گه‌راندنا ئاواره‌یان بۆ جهێن خۆ بكه‌ت داكو دووباره‌ بشێن ده‌ست ب ژیانا خۆ یا ئاسایی بكه‌ن".

رێڤه‌به‌رییا كاروبارێن رزگاربوویێن ده‌ستێ داعش دێ هێته‌ دامه‌زراندن
د ڤێ پڕۆژه‌ قانوونێ دا كوب ۆ په‌ڕله‌مانێ ئیراقێ هاتییه‌ هنارتن داخواز هاتییه‌كرن رێڤه‌به‌رییا كاروبارێن رزگاربوویێن ده‌ستێ داعش ل نه‌ینه‌وا بهێته‌ دامه‌زراندن و هه‌موو ئامار و هوورده‌كاریێن وان كۆم بكه‌ت و كار بۆ پشته‌ڤانیكرن و ئاكنجیكرنا وان ل جهێن گونجایی بكه‌ت و ده‌لیڤه‌یێن كاری بۆ بهێنه‌ دیتن بۆ هندێ ژئالیێ جڤاكی و ئابووری ڤه‌ سه‌ربه‌خۆ ببن و سه‌نته‌رێن تایبه‌تمه‌ند بۆ بهێنه‌ ڤه‌كرن ب مه‌ره‌ما هندێ ژئالیێ ساخله‌می، جڤاكی و پیشه‌یی ڤه‌ پشته‌ڤانیێ لێ بكه‌ن".

رزگاربوویی دێ هێنه‌ خانه‌نشینكرن و ده‌لیڤه‌یێن كار بۆ هێنه‌ دیتن
د ڤێ پڕۆژه‌ قانوونێ دا زێده‌تر هاتییه‌" پێدڤییه‌ هه‌موو ئاسانكاری بۆ وان زارۆیێن ژ ڤان ژنێن رزگاربوویی هاتینه‌ سه‌ر دونیایێ بهێته‌كرن و ئه‌وێن رزگاربوویی ژی ب گۆره‌ی قانوونا خانه‌نشینیێ سه‌ره‌ده‌ری دگه‌ل بهێته‌كرن و ب مووچه‌یه‌كێ كو كێمتر نه‌بیت ژ كێمترین كۆژمه‌یێ دیاركری خانه‌نشین ببن ئه‌وژی ب گۆره‌ی قانوونا هه‌ڤگرتی یا ژماره‌ (9) سالا 2014ێ و پارچه‌یێن ئه‌ردی پێ بهێنه‌دان یان خانیێن بێ به‌رامبه‌ر بۆ بهێنه‌ كرین و به‌رهه‌ڤكرن".

رۆژا 3/8 بۆ هه‌ر ساله‌كێ دێ بیته‌ رۆژه‌كا مللی
ئه‌ڤ پڕۆژه‌ قانوونه‌ دێ خه‌مه‌كا مه‌زن یا ئێزدییان سڤك كه‌ت ئه‌گه‌ر بهێت و ل په‌ڕله‌مانێ ئیراقێ په‌سه‌ند ببیت چونكو تێدا هاتییه‌" پێدڤییه‌ سالانه‌ (3/8) ببیته‌ رۆژه‌كا مللی ل گشت ئیراقێ و تایبه‌ت بیت ب تاوان و جینۆسایدا ئێزدییان سه‌ر ده‌ستێ داعش و راگه‌هاندن ب هه‌موو جۆرێن خۆ ڤه‌ به‌رنامه‌یێن تایبه‌ت سه‌ر په‌خش بكه‌ن و لایه‌نێن میری ژی كار بۆ بیرئانینا ڤێ كاره‌ساتێ بكه‌ن".

تۆمه‌تبار ب چ ره‌نگه‌كی ژ لێبۆرینان مفادار بان دێ هێنه‌ دادگه‌هكرن
ئه‌و كه‌سێن ده‌ست د ڤێ كاره‌ساتێ دا هه‌بوویه‌ د ڤێ پڕۆژه‌ قانوونێ دا دێ هه‌مبه‌ر یاسایێ بن ب ڤی ره‌نگی" هه‌موو ئه‌و چه‌كدارێن داعش و كه‌سانێن ده‌ست دگه‌ل ڤێ كاره‌ساتێ دا هه‌بووینه‌ نابیت ب چ ره‌نگه‌كی به‌ر ب لێبۆرینا تایبه‌ت و گشتی بكه‌ڤن و دادگه‌هـ و هێزێن ئێمناهیێ كار بۆ ده‌سته‌سه‌ركرن و دادگه‌هكرنا تۆمه‌تباران و هه‌موو ئه‌و كه‌سێن ده‌ست د ڤێ كاره‌ساتێ دا هه‌بووینه‌ بكه‌ت و كار بۆ ناساندنا ئه‌ڤێ كاره‌ساتێ وه‌كو جینۆساید ل ناڤه‌ندێن نێڤده‌وله‌تی بكه‌ت".

چه‌كدارێن داعش ل 3/8/2014 شنگال كونترل كرن و پتری (6417) وه‌لاتیێن ئێزدی ژ هه‌ر دوو ره‌گه‌زان ره‌ڤاندن و هه‌تا نوكه‌ پتری 3400 ژێ هاتینه‌ رزگاركرن و نێزیكی 3000 ژی چاره‌نڤیسێ وان دیار نینه‌ و ب به‌رده‌وامی كار بۆ رزگاركرنا یێن مایی دهێته‌كرن.



  • ڕۆژ
  • هەفتە
  • مانگ
created by Avesta Group and powered by Microsoft Azure