پارێزه‌رێك: بەشێك لە دادوەران بەهەڵە خوێندنەوە بۆ سزای ناپاكی هاوسه‌رى دەكەن

هەواڵ / کوردستان :: 12/04/2019‌ :: 899‌ جار بینراوە
بە بەڵگەی سەلمێنەر دەسەلمێندرێت

دواڕۆژ، پشتیوان جەمال

بەپێی یاسای سزادانی عێراقی، ئەگەر ژن یان پیاو ناپاكی هاوسەری بكەن و دانی پێدابنێن سزاكەیان بەندكردنە لە دوو تا پێنج ساڵ، پارێزەرێکیش دەڵێت: "لە دادگاکانی هەرێم پشت بە کورتەنامە دەبەسترێت وەکو بەڵگەی ناپاکی".


ئاسۆ هاشم، پارێزەری راوێژكار (ئەمڕۆ هه‌ینى 12ى نیسانی 2019) بە دواڕۆژی راگەیاند: سزای ناپاكی تائێستاش بەشێك لە دادوەرەكان بەهەڵە خوێندنەوەی بۆ دەكەن، بۆ نموونە ژن یان پیاوێك كاتێك لەلایەن هاوسەرەكەیەوە لەسەر كورتەنامەیەك سكاڵای لەسەر تۆماردەكرێت یان لەسەر نامەیەكی خۆشەویستی، هەندێك دادوەر دەستبەجێ بەپێی ماددەی 377 تۆمەتباریان دەكات، لەكاتێكدا ئەو ماددەیە دەڵێت (دەبێت ئەو دوو كەسە شاهیدی ئەو ناپاكییە بن كە ئەو ژنە یان ئەو پیاوە كردوویەتی) و ئیسپاتكردنی ناپاكی زۆر زەحمەتە.

وتیشی: "ماددەی 402 لە یاسای سزادانی عێراقی هەیە كە پەیوەستە بەئابڕووبردن و لەكەداركردنی كەسایەتی، پێویستە دادوەر ئەم ماددەیە بۆ ناپاكی هاوسەری بەكاربێنن ئەوەش بە بەڵگەی سەلمێنەر دەسەلمێندرێت، نەك كورتەنامەیەك، كە ئێستا بەشێك لە دادوەرەكان ئەو ماددەیە بەكاردێنن".

بەوتەی ئەو پارێزەرە راوێژكارە: ئەگەر ژن یان پیاوەكە دان بەوەدا بنێت كە ناپاكی كردووە سزاكەی بەندكردنە لە دوو تا پێنج ساڵ.

ناوبراو جەختیكردەوە: ئێستا لە دادگای تەممیزی عێراق بڕیاردەرچووە دادوەری باری كەسێتی نابێت نامەی تۆڕە كۆمەڵایەتییەكان وەكو بەڵگە بۆ ناپاكی هاوسەریی وەربگیرێت.

پ: ن.ر



  • ڕۆژ
  • هەفتە
  • مانگ
created by Avesta Group and powered by Microsoft Azure