واشنتن پۆست: سزا ئەمریکیەکانی سەر ئێران کاریگەری پێچەوانەی دەبێت

هەواڵ / جیهان :: 11/04/2019‌ :: 540‌ جار بینراوە

دواڕۆژ

رۆژنامەی واشنتن پۆست لە بابەتێکدا باسی لەوەکرد رەنگە هەڵمەتی سزا ئەمریکیەکانی سەر ئێران کاریگەری پێچەوانەی هەبێت، وەک ئاماژەیەک بۆ ئەوەی دانانی سوپای پاسدارانی ئێرانی لە لیستی تیرۆری ئەمریکا دەبوایە لاوازی بکردنایە، بەڵام چەندین شیکاری هەواڵگری ئەمریکی و ئەوروپی پێشبینی ئەوە ناکەن.


رۆژی دووشەممە 8ی نیسانی 2019، دۆناڵد ترەمپی سەرۆکی ئەمریکا ئاشکرایکرد، سوپای پاسدارانی ئێران دەکاتە لیستی ڕێکخراوە تیرۆرستیە بیانیەکان، ئەمەش دەبێتە یەکەمجار واشنتن بە شێوەیەکی فەرمی هێزی سەربازی دەوڵەتێکی دیکە بخاتە ریزی رێکخراوە تیرۆرستیەکانەوە.

دیڤید ئگناتیوس، نوسەرێکی ئەمریکیە و بۆ ڕۆژنامەکەی نوسی: هەڵمەتی دژایەتیکردنی سوپای پاسدارانی ئێران وادەکات قاسم سولەیمانی سەرۆک فەیلەقی قودس و هاوکارەکانی زیاتر کۆنتڕۆڵی باری ئابوری ئێران بکەن.

ئەم نوسەرە دەپرسێت: "ئایا پەستان خستەنەسەر ئێران بەشێکە لە ستراتیجیەکەی ترەمپ بۆ ئەوەی پاڵ بە ئێرانەوە بنێت گفتوگۆبکەن؟ ئەگەر وایە بۆچی ئەمریکا هیچ پەیوەندیەک بە تارانەوە ناکات".

دەشڵێت: "ئەگەر مەبەستی ترەمپ فشار خستنەسەر ئێرانە بۆ گۆڕینی سیاسەتە توندڕەوەکەی ئەوا واباشترە هەوڵبدات گروپە جیاوازەکان لەیەک جیابکاتەوە لەجیاتی ئەوەی پاڵیان پێوە بنێیت بچنە سوپای پاسدارانەوە".

بەپێی نوسەرەکە، ئەو سزایانەی ئەمریکا دژی ئیران بەکاریهێناوە پاش ئەوەی ترەمپ لە رێکەوتنامە ئەتۆمیەکەی پاشگەزبووەوە زۆر زیانی بە ئێران گەیاندووە و هەناردەکردنی نەوتی لە 2.5 ملیۆن بەرمیل لە ڕۆژێکدا بۆ 1.25 ملیۆن بەرمیل دابەزاندووە، هەروەها سندوقی نەختینەی نێودەوڵەتی پێشبینی دەکات پووکانەوەی ئابوری ئێران بگاتە 6% لەکاتێکدا ساڵی پێشوو 3.9% بووە.

وەرگێڕان: هێڤی فەرهاد
پ: ن.ر



  • ڕۆژ
  • هەفتە
  • مانگ
created by Avesta Group and powered by Microsoft Azure