"پارتی له‌ كابینه‌ی نوێی حکومەت به‌شداری به‌ كۆمه‌ڵی ئیسلامی ناكات"

هەواڵ / کوردستان :: 07/04/2019‌ :: 2997‌ جار بینراوە

دواڕۆژ، عیسا عه‌بدولقه‌هار

به‌رپرسێكی كۆمه‌ڵی ئیسلامی رایده‌گه‌یه‌نێت: تا پارتی به‌ڕه‌سمی داوایان لێنه‌كات بۆ به‌شداریكردنی حزبەكەی له‌ حكومه‌ت، ئه‌وان وه‌ڵامی پارتی ناده‌نه‌وه‌، به‌ڵام ئه‌ندامێكی سه‌ركردایه‌تی پارتی ده‌ڵێت: "پارتی له‌ هه‌ڵوێسته‌كانی پێشووی كۆمه‌ڵ نیگەرانە و نایه‌وێت له‌ كابینه‌ی نوێ به‌شداری پێبكات".


بۆ پێكهێنانی كابینه‌ی نۆیه‌می حكومه‌تی هه‌رێم، تائێستا پارتی رێككه‌وتنی له‌گه‌ڵ گۆڕان و یه‌كێتی كردووه ‌و سه‌ردانی پێكهاته‌كانی هه‌رێم و ئه‌و حزبانه‌شی كردووه‌ كه‌ به‌شداری حكومه‌ت ناكه‌ن، به‌ڵام بۆ به‌شداری كۆمه‌ڵ له‌ كابینه‌ی نوێ پارتی سه‌ردانی كۆمه‌ڵی نه‌كردووه‌.

شوان رابه‌ر، بڕیارده‌ری ئه‌نجومه‌نی سه‌ركردایه‌تی كۆمه‌ڵی ئیسلامی كوردستان به‌ دواڕۆژی راگه‌یاند: له‌ ئێستادا هیچ كۆبوونه‌وه‌یه‌ك له‌نێوان كۆمه‌ڵ و پارتی له‌ ئارادا نییه‌ كاتی هیچ كۆبوونه‌وه‌یه‌كیش دیارینه‌كراوه‌.

وتیشی: "كۆبوونه‌وه‌كان له‌نێوان هه‌ردوولا به‌كراوه‌یی ماونه‌ته‌وه ‌و هه‌ر كاتێك پارتی سه‌ردانی كۆمه‌ڵ بكات، به‌ڕه‌سمی داوای به‌شداریكردن له‌ كۆمه‌ڵ بكات، بەڕه‌سمی وه‌ڵامی پارتی ده‌دەنەوە‌".

دوای تێكچوونی په‌یوه‌ندییه‌كانی نێوان پارتی و كۆمه‌ڵ، ته‌نیا له‌ مانگی كانوونی دووه‌می 2019 كۆبوونه‌وه‌یه‌كی باڵا له‌نێوان ئەو دوو حیزبە ئه‌نجامدراوه‌، به‌ڵام بڕیارده‌ری كۆمه‌ڵ ده‌ڵێت: "كۆبوونه‌وه‌كانی پێشتر به‌ڕه‌سمی بۆ چاككردنی په‌یوه‌ندی هه‌ردوولا بوون و پرسی پێكهێنانی حكومه‌تیش به‌ڕه‌سمی له‌نێوان هه‌ردوولا یه‌كلا نه‌كراوه‌ته‌وه ‌و هه‌روا ماوه‌ته‌وه".

له‌باره‌ی به‌شداری كۆمه‌ڵی ئیسلامی له‌ كابینه‌ی نوێی حكومه‌تی هه‌رێم، ئه‌ندامێكی سه‌ركردایه‌تی پارتی به‌ دواڕۆژی راگه‌یاند: تا ئه‌مڕۆ بڕیاری پارتی به‌وشێوه‌یەیە‌ كه‌ به‌شداری به‌ كۆمه‌ڵی ئیسلامی كوردستان نه‌كرێت، چونكه‌ پارتی له‌ هه‌ڵوێسته‌كانی پێشووی كۆمه‌ڵ نیگه‌رانبووه‌.

ئه‌و ئه‌ندامه‌ی سه‌ركردایه‌تی پارتی، كه‌ نه‌یویست ناوی ئاشكرابكرێت، وتیشی: "پارتی نایه‌وێت هه‌مان هه‌ڵه‌كانی رابردوو دووباره‌ بكاته‌وه ‌و به‌شداری به‌ كۆمه‌ڵ بكات، به‌ڵام دواتر بۆ كۆكردنه‌وه‌ی ده‌نگ له‌ حكومه‌ت بكشێته‌وه‌".

كۆمه‌ڵی ئیسلامی كوردستان به‌ پۆستێكی وزاری و سه‌رۆك ده‌سته ‌و چه‌ند به‌ڕێوه‌به‌رێكی گشتی به‌شداری له‌ كابینه‌ی هه‌شته‌می حكومه‌تی هه‌رێم كرد، به‌ڵام لەڕۆژی‌ 20ی كانوونی یه‌كه‌می 2017 له‌ حكومه‌ت كشایه‌وه‌.


پێداچوونەوە: ئارام غەفور 



created by Avesta Group and powered by Microsoft Azure