شانده‌كێ نۆژدارێن چه‌ندین وه‌لاتان دێ هاریكارییا ساخله‌مییا دهۆك كه‌ن

هەواڵ / کوردستان :: 07/04/2019‌ :: 137‌ جار بینراوە

دواڕۆژ، بورهان یه‌حیا

شانده‌كێ نۆژدارێن بیانى یێن چه‌ندین وه‌لاتان ب تایبه‌ت ئه‌مریكا ل پارێزگه‌ها دهۆكێنه بۆ هندێ چه‌ندین نیشته‌گه‌ریێن ‌ده‌گمه‌ن بێ به‌رامبه‌ر ئه‌نجام بده‌ن.


حه‌مزه‌ محه‌مه‌د عه‌لى به‌رپرسێ راگه‌هاندنا رێڤه‌به‌رییا گشتییا ساخله‌مییا پارێزگه‌ها دهۆك بۆ دواڕۆژ رۆهنكر: ئه‌ڤ گرۆپه‌ ب ناڤێ (مێد گلۆبێل مێشن) ژ 15 كه‌سان پێكهاتییه‌ و بۆ جارا ئێكێ هاتینه‌ بۆ هندێ ره‌وشا ساخله‌مییا ده‌ڤه‌رێ بزانن و دووڤدا بۆ وان رۆهن بیت كا دێ چه‌وا هاریكارییا كه‌رتێ ساخله‌میێ ل دهۆك كه‌ن و بۆ ئێكه‌م جار ب هه‌ماهه‌نگى دگه‌ل نۆژدارا كورد  د. فه‌ره‌شین سلێڤانه‌یى خه‌لكا دهۆك هاتینه‌ هه‌رێما كوردستانێ.

دیاركر: لێكتێگه‌هشتنه‌ك بۆ ده‌مێ ساله‌كێ مابه‌ینا ساخله‌مییا دهۆك و  ڤى شاندێ نۆژدارێن بیانى هاتییه‌ ئیمزا كرن‌ بۆ هندێ ئه‌و هاریكارییا ئاواره‌ و په‌نابه‌ر و خه‌لكێ خوجهێ ده‌ڤه‌رێ بكه‌ن و بۆ ئێكه‌م پێنگاڤ ل نه‌خۆشخانه‌یا ئازادى دێ سیسته‌مێ چاڤدێرییا چڕ دگه‌ل پێشوازییا هه‌وارهاتنێ پێشبێخین چونكو پێشتر گه‌له‌ك گازنده‌یێن خه‌لكى ل سه‌ر ڤان هه‌ر دوو جهان هه‌بووینه.‌ 

حه‌مزه‌ محه‌مه‌د عه‌لى گۆت: "بۆ قۆناغێن بهێت دێ گه‌له‌ك نۆژدارێن دى دگه‌ل دا هه‌بن ب تایبه‌ت نۆژدارێن نیشته‌گه‌ریێ  ب مه‌ره‌ما هندێ هنده‌ك نیشته‌گه‌ریێن ده‌گمه‌ن بۆ جارا ئێكێ ل سه‌ر ئاستێ هه‌رێم و ئیراقێ ل دهۆك ئه‌نجام بده‌ن".

پێداچوونه‌وه‌: ئیحسانی مه‌لا فوئاد



  • ڕۆژ
  • هەفتە
  • مانگ
created by Avesta Group and powered by Microsoft Azure