سلێمانی شوێنی بەرهەمهێنانی جگەرە بۆ بەرهەمهێنانی كەلتور دەگۆڕێت

هەواڵ / ڕاپۆرت :: 04/04/2019‌ :: 287‌ جار بینراوە
دیزانى پڕۆژه‌كه‌

دواڕۆژ، راپۆرتی پشتیوان جەمال

دوای چاوەڕوانییەكی زۆری رۆشنبیر و هونەرمەندان، كارەكانی ناوەندی بەرهەمهێنانی كلتور لە سلێمانی دەستپێدەكات و بڕیارە هەموو بەشەكانی هونەر لەخۆبگرێت.


كارگەی جگەرەی سلێمانی كە رووبەڕی 25 دۆنمە، تەمەنی زیاتر لە 50 ساڵە و دەكەوێتە سەنتەری سلێمانی و سەر شەقامی سالم كە بەشێكی گرنگی مێژووی شارەكەیە، ماوەی نزیكەی حەوت ساڵە رێكخراوێك بە رێككەوتن لەگەڵ حكومەتی هەرێم هەستاوە بەگۆڕینی ئەو شوێنە بۆ ناوەندێكی كلتوری.

ئەمڕۆ 4ی نیسانی 2019 بەئامادەبوونی خالید دۆسكی، وەزیری رۆشنبیری و لاوان و ژمارەیەك بەرپرس و هونەرمەندان، لەنێو كارگەی جگەرەی سلێمانی مەراسیمی دەستكردن بە كارەكانی ئەو شارە كلتوورییە راگەیەندرا.

سلێمانی ساڵی 2011 بە بڕیاری پەرلەمانی كوردستان وەكو پایتەختی رۆشنبیری ناسێنرا و ئێستاش ساڵانە چالاكی جۆراوجۆر لەم شارەدا بەڕێوەدەچێت.

خالید دۆسكی، وەزیری رۆشنبیری و لاوانی حكومەتی هەرێم بە دواڕۆژی راگەیاند: ئەو پڕۆژەیە یەكێكە لە پڕۆژە گرنگ و ستراتیژییەكان بۆ سلێمانی، لەبری ئەوەی پێشتر كە جگەرەی بەرهەمدەهێنا و كارگەكەش لەكاركەوتبوو، توانرا لەگەڵ ئەو رێكخراوە شوێنەكە بۆ بەرهەمهێنانی كلتور بەكاربهێنرێت، ئەوەش هەوڵێكە بۆ پێكەوەنانی ژێرخانی كلتور و رۆشنبیری و پێگەیاندنی كادیر.

دۆسكی ئاشكرایكرد: وەكو وەزارەتەكەیان لەئێستادا بڕی چوار ملیار دیناریان بۆ كارەكانی ئەو پڕۆژەیە دابینكردووە و لەكاتی پەسەندكردنی بودجەش هەوڵدەدەن بودجەیەكی تایبەتتری بۆ تەرخان بكەن، سندوقێكیش دانراوە بۆ داهاتی پڕۆژەكە و هەوڵدەدەن خۆژێن بێت، داوای لە خاوەنكارەكانیش كرد هاوكاری پڕۆژەكە بن.

بابەكر دڕەیی، بەڕێوەبەری گشتی رۆشنبیری و هونەری سلێمانی هیوادارە ئەم شوێنە بۆ هیچ كارێكی دیكە تەرخان نەكرێت، بەڵكو وەك شوێنێكی كلتوری بمێنێتەوە و بۆ دواڕۆژ وتی :"ترسم ئەوەیە لەو كەسانەی تەماعیان لەم شوێنەدا هەیە، هەندێك سەرمایەدار بەحیزبی و ناحیزبییەوە كە چاویان بڕیوەتە ئەم شوێنە دەیانەوێت بۆ بەرژەوەندی خۆیان داگیریبكەن، هیوادارم ئەو ترسەم ناڕەوا بێت و ئەم شوێنە بۆ سلێمانی بمێنێتەوە".

خەبات كەریم، سەرۆكی رێكخراوی كلتور و گەشەپێدانی بەردەوام، كە ماوەی حەوت ساڵە لەم پڕۆژەیەدا كاردەكەن، بۆ دواڕۆژی روونكردەوە: هەوڵدەدەن ئەم شوێنە لە كارگەی جگەرەوە بكەنە كارگەی بەرهەمهێنانی كلتور تا شوێنەكەش بپارێزرێت، لەم شوێنەشدا هەموو كایەكانی هونەر و كلتوری تێدا جێدەبێتەوە لە بەشی سینەما و شانۆ و موزیك و پیشانگە، رێستۆرانت و وەرزش.

خەبات نەیتوانی كاتی تەواوكردنی ئەو پڕۆژەیە دیاری بكات و وتی: "ناتوانین بۆ تەواوكردنی پڕۆژەكە باسی ساڵ بكەین، چونكە ئێرە دەبێتە شوێێكی كلتوری و پەیوەندی بە بودجەوە هەیە، راستە چوار ملیار دینار دابینكراوە، بەڵام زۆر كەمە، چونكە پڕۆژەكە گەورەیە".

تەرخانكردنی ئەو شوێنە بۆ ناوەندی كلتوری سلێمانی كە پێشتر كارگەی جگەرە بووە وەكو شوێنێكی پیشەسازی، سەبارەت بەوەی لابردنی ئەو كارگەیە زیان بەكەرتی پیشەسازی ناگەیەنێت، خەبات روونیكردەوە: هەموو كارگەكان لەدەرەوەی شارن و ناوشار پێویستی بەكلتورە.

هونەرمەند گەزیزە عومەر-يش بە دواڕۆژی وت: كردنی ئەم شوێنە بە ناوەندێكی كلتوری هەواڵێكی دڵخۆشكەرە و دەبوو زووتر بكرێت تا ببێتە سیمای شارستانی سلێمانی و كوردستان، بەڵام ئەوەی گرنگە ناوی كارگەكە بمێنێتەوە، چونكە ئەو ناوە بەشێكە لە مێژووی شارەكە، جگە لەوەش گرنگی بە ئەرشیفی شارەكە بدرێت تا كاریگەری بۆ نەوەكانی داهاتوو ببێت، دوای تەواوبوونی ئەم پڕۆژەیە سیستەمێكی بەڕێوەبردنی باشی بۆ دابنرێت تا هەموان بتوانن سوودی لێوەربگرن. 


پێداچوونەوە: ئارام غەفور 



  • ڕۆژ
  • هەفتە
  • مانگ
created by Avesta Group and powered by Microsoft Azure