پێنجوێن.. به‌هۆى بارانى زۆر هۆشداری دەدرێتە جووتیاران

هەواڵ / ئابوری :: 28/03/2019‌ :: 850‌ جار بینراوە

دواڕۆژ، رێبین حەسەن

كەشناسی پێنجوێن، بڕی باران بارینی ئەمساڵ و پار ساڵی راگەیاند و جیاوازی نێوان ئەمساڵ و ساڵی رابردوو (715.8) ملیمەترە و ئەوەش رێژەیەكی زۆرە، هاوكات هۆشداریش دەدرێتە جووتیاران و داوایان لێدەكرێت، لەم ماوەیەدا، بەوریاییەوە كاری كشتوكاڵی خۆیان ئەنجام بدەن.


بەهادین حەسەن، لێپرسراوی كەشناسی پێنجوێن، (ئەمڕۆ پێنجشەممە 28ی ئازاری 2019) بەدواڕۆژی راگەیاند: لەماوەی 24 كاتژمێری رابردوودا، بڕی (8.3) ملم باران لەسنوورەكە باریوە و بەوەش كۆی گشتی بارانی ئەمساڵی گەیاندە (1559.8) ملم، لەكاتێكدا بارانی ساڵی رابردوو ئەمكاتانە تەنیا (844) ملم بووە.

وتیشی "جیاوازی رێژەی بارانی ئەمساڵ و پار ساڵ تا ئەم بەروارە بریتیە لە(715.8)".

هاوكات سەعید كەریم، ئەندازیاری كشتوكاڵی لەبەڕێوەبەرێتی كشتوكاڵی پێنجوێن، بۆ دواڕۆژ، وتی "ئەم شەپۆلی بارانبارین و سەرمایەی، كە روویكردۆتە سنووری پێنجوێن و دەوروبەری، كاریگەری لەسەر ئەو شەتڵانە دەبێت، كە جووتیاران تۆوەكانیان چاندووە، واتە زوو ناشتنی شەتڵ لەم وەرزەدا زیانی زیاترە لەقازانج، چونكە ئێستا زۆربەی جووتیارانی ناوچەكەمان، شەتڵی (كولەكە و تەماتە و شوتی و ببیبەر)یان چاندووە، ئەمەش زۆر مەترسیدارە".

روونیشیكردەوە " ئەم شەپۆلە  لەم ناوچەیە توندە، تەرزەبارینی ئەم ماوەیەی پێنجوێن، دەبێتە هۆی لەناوبردنی شەتڵەكان و ئەگەر شەتڵەكانیش لەناونەچن، ئەوا ئەمساڵ لە(90%)ی نەخۆشییە كەڕوییەكان زیادەبن، بەهۆی شێی زۆر و گەرمای كتوپڕوە، بەداخەوە جوتیار وا دەزانێت، ئەگەر شەتڵی تەماتەكەی لەسەرەتای مانگی بچێنێت، زوو بەرهەمی دەداتێ و دەیخاتە بازاڕەوە، بەڵام ئەوەی بیرچووە كە تەماتە بۆ ئەوەی پێبگات و سوور بێت پێویستی بەپلەی گەرمی (25 بۆ 30) دەبێت، ئەمەش هەر لەمانگی حوزەیراندا، پەیدا دەبێت".

وتیشی"باشترین كات سەرەتای مانگی نیسانە بۆ چاندنی شەتڵی تەماتە، ببیبەر، خەیار و كولەكە، بۆیه‌ ئه‌گه‌ر دوابخرێت كێشەی نییە".
پ: س.م



created by Avesta Group and powered by Microsoft Azure