ویستی ئاهەنگی هاوسەرگیریەکەی لەسەر دیجلە بکات، بەڵام دەستگیرانەکەی لێ برد

هەواڵ / عێراق :: 26/03/2019‌ :: 2274‌ جار بینراوە
عه‌لى له‌كاتى به‌خاكسپاردنى زوحا

تاگ :: عێراق

دواڕۆژ

"ویستی ئاهەنگی هاوسەرگیریەکەی لەسەر رووباری دیجلە بکات، بەڵام دەستگیرانەکەی لێبرد و خەونی هاوسەرگیریکردنی بۆ هەتاهەتایە کۆتایی پێهێنا" ئەمە چیرۆکی عەلی جبوری ئەو گەنجە موسڵاویەیە، کە لە رووداوەکەی یەکەمین رۆژی نەورۆزی سەر رووباری دیجلە دەستگیرانەکەی لەدەستدا.


پێنجشه‌ممه‌ى رابردوو 21ی ئازار به‌له‌مێكى گه‌شتیاریى له‌ روباری دیجله‌ ژێرئاوکەوت و به‌هۆیه‌وه‌ 100 هاووڵاتی و گه‌شتیارى شارەکە گیانیان له‌ده‌ستدا و زیاتر له‌ 50ى تریش له‌ ریزى بێسه‌روشوێنبواندان.

یەكێک لە قوربانییانى رووداوه‌كه‌ کچە خوێندکارێکە بەناوی (زوحا)، کە لە دوایین قۆناغی خوێندنی زانکۆیدا بووە و بە ئومێدی ئەوەی لە چەند مانگی داهاتوودا خوێندن تەواوبکات و ئاهەنگی هاوسەرگیریەکەی لەگەڵ (عەلی جبوری) خۆشه‌ویست و ده‌ستگیرانیدا سازبکات.

رووداوه‌كه‌ گیانى زوحا-ى برد، عه‌لى-یشى خستووه‌ته‌ دۆخێكى ده‌روونى دژواره‌وه‌.

یەكێک لە هاوڕێکانی عەلی بۆ دواڕۆژ ئاشکرایکرد: عەلی لە دۆخێکی دەرونی خراپدایە، و شۆک بووە و توانای گێڕانەوەی ئەو کارەساتەی نییە و خۆی لە قسەکردن بەدووردەگرێت، بۆیە من چیرۆکە کارەساتبارەکەتان بۆ دەگێڕمەوە.

ئەو هاوڕێیەی عەلی وتى: "ئەو دوو گەنجە ماوەی حەوت ساڵ بوو لە پەیوەندی خۆشەویستیدا بوون پێش دەستبەسەرداگرتنی موسڵ لەلایەن داعشەوە بەنیازی هاوسەرگیری بوون، بەڵام بەهۆی ئەوەی ماڵی عەلی ئاوارەبوون و ماڵی زوحاش لە موسڵ گیریانخواردبوو، ئەو هاوسەرگیرییە نەکرا، بەڵام بەنهێنی پەیوەندییان هەر مابوو".

باسی لەوەشکرد: دوای رزگارکردنی موسڵ ماڵی عەلی جارێکی دیکە گەڕانەوە موسڵ، بەڵام عەلی دەیویست ده‌زگیرانه‌كه‌ى خوێندنەکەی تەواوبکات کە ماوەی چەند ساڵێک بوو دابڕابوو پاشان ئاهەنگی هاوسەرگیریەکەیان سازبکەن.

ئەو دوو خۆشەویستە دەیانویست ئاهەنگەکەیان لەسەر رووباری دیجلە بکەن بێ ئاگابوون لەوەی دیجلە بەیەکجاری لەیەکیان جیادەکاتەوە.

لەو رووداوەدا زوحا گیانی لەدەستدا و عەلیش بەدەستەکانی خۆی ناشتی، وێنەی ساتی ناشتنەکەشی بووە باسی میدیا و تۆڕە کۆمەڵایەتیەکان.

ئا: ئەڤین



created by Avesta Group and powered by Microsoft Azure