بەرگری شارستانی کەرکوک: لافاو لەهیچ ناوچەیەک دروستنەبوە

هەواڵ / کوردستان :: 25/03/2019‌ :: 71‌ جار بینراوە

دواڕۆژ، عیماد جەباری


بەرپرسێكی بەرگری شارستانی پارێزگای كەركوك رایدەگەیەنێت: لافاو لەشارەكە دروستنەبووە و ئەوەی هەبووە تەنیا كۆبوونەوەی ئاو بووە لەشوێنێكی دیاریكراودا و ئەویش چارەسەر بووە.

قەیس عەبدولرەزاق، بەرپرسی بەشی راگەیاندن و پەیوەندییەکانی بەرگری شارستانی كەركوك بەدواڕۆژی وت: "تاوەکو ئێستا لەهیچ شوێنێکی کەرکوک لافاو دروستنەبووە و تەنیا بەهۆی ئاوی باراناوەوە شەقامی بەردەم فەرماندەیی پۆلیسی کەرکوک ئاستەنگی بۆ شۆفێران دروستکردبوو ئەویش لەلایەن تیمەکانی ئاوەڕۆوە چارەسەرکراوە".

وتیشی: "بەرگری شارستانی ئەرکی فریاکەوتن و رزگارکردنی هاووڵاتیانی لەئەستۆدایە لەحاڵەتە نەخوازراوەکاندا و سەرجەم کارمەندان گەڕاونەتەوە سەر ئەرکەکانیان و لەئامادەباشیداین بەوردی چاودێری ناوچەکان دەکەین تاوەکو مەترسییەکە نامێنێت".

ئەماژەی بۆ ئەوەشکرد: کە بەشێک لەشەقامەکان زۆرجار بەهۆی باران و داخستنی ئاوەڕۆکانیان ئاستەنگی بۆ هاووڵاتیان دروستدەکات کە ئەوانیش شەقامی ئیسکان، نەفەقەکان و شەقامی یاریگای کەرکوک، شەقامەکانی نزیک قەڵا و چەند شوێنێکی دیکەیە کە تاوەکو ئێستا هیچ حاڵەتێک تۆمارنەکراوە.

پێداچوونەوە: ئارام غەفور



  • ڕۆژ
  • هەفتە
  • مانگ
created by Avesta Group and powered by Microsoft Azure

بەپەلە