پۆلیسى سلێمانى: سەرۆکی باندی دزییەکەی نەخۆشخانەی شار دەستگیرنەکراوە

هەواڵ / کوردستان :: 24/03/2019‌ :: 4831‌ جار بینراوە
پۆلیسى سلێمانى ورده‌كارى ئاشكراده‌كات

دواڕۆژ، هۆگر کەمال

بەڕێوەبەری راگەیاندنی پۆلیسی سلێمانی رایدەگەیەنێت: تاوەکو ئێستا سەرۆکی باندی دزییەکەی نەخۆشخانەی شار دەستگیرنەکراوە و لە هەوڵی دەستگیرکردنیدان.


نەقیب سەرکەوت ئەحمەد، به‌ڕێوه‌به‌رى راگه‌یاندن و په‌یوه‌ندییه‌كانى پۆلیسى سلێمانی (ئەمڕۆ یەکشەممە 24ی ئازاری 2019) تایبه‌ت به‌ دواڕۆژى راگه‌یاند: لەکاتی لێکۆڵینەوەدا دەرکەوتووە تاوەکو ئێستا سەرۆکی باندی دزییەکەی مووچه‌ى نەخۆشخانەی شار دەستگیرنەکراوە، له‌كاتێكدا پێشتر یه‌كێك له‌ ده‌ستگیركراوه‌كان وه‌ك سه‌رۆك باند ناوى هاتبوو.

وتیشى: "شەش کەس کە دووانیان بران بە تۆمەتی ئەنجامدانی دزییەکە دەستگیرکراون، یه‌كێكى دیكه‌ش لەو شەش کەسە کە ژنە ئەندامی یەکێک لە لیژنەکانی مووچەی نەخۆشخانەی شار بووە و سه‌رجه‌میشیان دانیان به‌ تاوانه‌كه‌دا ناوه‌".

نیوه‌ڕۆى رۆژى سێشه‌ممه‌ 12ى ئازارى 2019 ژماره‌یه‌ك چه‌كدارى نه‌ناسراو هه‌ڵیانكوتایه‌سه‌ر ئۆتۆمبێلێكى نه‌خۆشخانه‌ى شار له‌ سلێمانى و بڕى زیاتر له‌ ملیارێك و 200 ملیۆن دینارى مووچه‌ى فه‌رمانبه‌رانیان برد، و شه‌وى دواتریش شه‌ش كه‌س له‌سه‌ر ئه‌و تاوانه‌ ده‌ستگیركران و پاره‌كه‌ش گه‌ڕێندرایه‌وه‌.

نه‌قیب سه‌ركه‌وت ئاماژەی بەوەشکرد: سەرۆکی باندەکە کە کەسی حەوتەمە و لەناو پاتڕۆڵەکەدا بووە ئەزموونی هەیە و پێشتر زیندانی بووەو  ئازادکراوە دوای دزییەکەش لە ئێستاشدا هەڵهاتووە و لە هەوڵی دەستگیرکردنیداین.

ئه‌وه‌شى خسته‌ڕوو: تائێستا ده‌ستگیركراوان نەبراون بۆ دادگا و تەنیا لێکۆڵینەوەیان لەگەڵ دەکەین رەنگە ئەگەر کەسی حەوتەم دەستگیربکەین کەسی دیکەش تێوەبگلێت.

سەرکەوت ئەحمەد وتیشی: ئەگەر تا دوو مانگی تر نەمانتووانی کەسی حەوتەم دەستگیربکەین ئەوا ئەو شەش کەسە دادگایی دەکرێن و سزای خۆیان وەردەگرن و وەکو شایەتیش لەسەر کەسی حەوتەم هەژماردەکرێن.

بەپێی وتەی بەڕێوەبەری راگەیاندنی پۆلیسی سلێمانی چونکە بەشێکی ئەو کەسانە پێشینەی تاوانیان هەیە ماددەکەیان 442 دەبێت کە زیندانی هەتاهەتایی یان لەسێداردەدان دەبێت و دوابڕیاریش لای دادوەرە.



created by Avesta Group and powered by Microsoft Azure

بەپەلە