دوای كارەساتەكەی موسڵ هۆشداری بە خاوەن بەلەمەکانی هەرێم دەدرێت

هەواڵ / کوردستان :: 24/03/2019‌ :: 418‌ جار بینراوە

تاگ :: كوردستانى

دواڕۆژ، سامان قوبادی


(ئەمڕۆ یەكشەممە 24ی ئازار)، هەردوو قایمقامی دوكان و دەربەندیخان كۆبونەوەیان بە خاوەنی بەلەمەكان كرد، هاوكات چەند رێنماییەکیشیان ئاراستەی پۆلیسی بەرگری و فریاكەوتنی سلێمانی كردووە.

ناسیح مەلا حەسەن، قایمقامی دەربەندیخان بە دواڕۆژی راگەیاند: ئەمڕۆ كۆبوونەوە بە خاوەنی 25 بەلەم لە دەریاچەی دەربەندیخان كراوە، وەكو لێكۆڵینەوەی ساڵانە لیژنەیەكمان بۆ سەرپەرشتی بەلەمەكان پێكهێناوە كە پێكدێن لە پۆلیسی دارستان و گەشتوگوزار و پۆلیسی فریاكەوتن و بەرگری شارستانی و ئاسایش لەگەڵ قایمقامیەتی دەربەندیخان، هەر ئەمڕۆ كۆبوونەوە بە نوێنەرانی خاوەنی بەلەمەكان كراوە بۆ ئەوەی كارەكانیان بۆ رێكبخەین، هاوكات رێگری بكەین لەو كەسانەی كە لەدەرەوەی رێنماییەكان كاردەكەن.

قایمقامی دەربەندیخان وتیشی: "كارەساتەكەی موسڵ هاندەر بوو و وایكرد زیاتر جددیتر بین و لێكۆڵینەوە بكەین بۆ ئەوەی رووداوێكی نەخوازراوی لەوشێوەیە دووبارە نەبێتەوە، بۆیە پەلەمان لەم كارەكرد و بڕیارماندا خاوەنی بەلەمەكان بنێرین بۆ پۆلیسی فریاكەوتن و بەرگری شارستانی سلێمانی كە بەرپرسن لە دیاریكردنی توندوتۆڵی و سەلامەتی بەلەمەكان، ئەوانیش بەڵێنی دادوەریان لێ وەردەگرن كە پابەند بن بە رێنماییەكانەوە، لیژنەیەكی  پۆلیسی بەرگری شارستانی دێنە دەربەندیخان، پشكنین بۆ بەلەمەكان دەكەن، ئەوانەی كە مەرجی توندوتۆڵییان تێدا نییە رێگەیان پێنادرێت كار بكەن، هەروەها  داوا لە قایمقامی سەید سادق دەكەین رێكاری یاسایی بگرنەبەر بەرامبەر خاوەن بەلەمەكانی ئەو سنورە، ئەگەر هەر بەلەمێك لەو ناوچەیەوە داخڵی دەربەندیخان بێت و مەرجەكانی تێدا نەبێت، دەستی بەسەردا دەگرین.

 

هەر ئەمڕۆ لە قایمقامیەتی قەزای دوكان كۆبونەوە بە خاوەنی بەلەمەكانی ئەو سنورە كراوە، رێكاری پێویستیان بەرامبەر گیراوەتەبەر، شاهۆ عوسمان قایمقامی قەزای دوكان بە دواڕۆژی راگەیاند: هەموو ساڵێك كۆبوونەوە لەگەڵ خاوەنی بەلەمەكان دەكەین، هەر ئەمڕۆ لەگەڵ خاوەنی بەلەمەكان كۆبووینەوە لیژنەیەك بۆ نوێكردنەوەی مۆڵەت و پشكنینی بەلەمەكان پێكهێنراوە، تائێستا خۆشبەختانە هیچ حاڵەتێكی نقوومبوون یان وەرگەڕانی بەلەم لە دوكان رووینەداوە.

 

قایمقامی دوكان باسی لەوەشكرد: لە سبەینێوە دەست بە پشكنینی بەلەمەكان دەكەین و بەڵێننامە بە خاوەنەكانیان پڕدەكەینەوە، مەرجی سەلامەتیان پێ دابیندەكەین، ئەوانەشی پابەند نابن لە پێناو سەلامەتی گەشتیاران رێگەیان پێ نادەین كاربكەن.

 

ئەوەشی وت: "پێش نەورۆز پلانمان بۆ ئەم كارە هەبووە بۆ ئەوەی مەرجەكانی سەلامەتییان پێ دابین بكەین، هاوكات پارێزگاری سلێمانی بەلەمێكی بۆ بەشی پۆلیسی دوكان دابینكرد، بۆ چاودێریكردنی زێی دوكان، لەئێستادا سەرقاڵی جەردین بۆ بەلەمەكان و لە رۆژانی داهاتوودا  ئەنجامەكەی رادەگەیەنین".

پ: ک. س



created by Avesta Group and powered by Microsoft Azure