هەدەپە: لەم هەڵبژاردنەدا 120 شارەوانی دەبەینەوە

هەواڵ / کوردستان :: 24/03/2019‌ :: 257‌ جار بینراوە
"لەم هەڵبژاردنەدا دەنگی هەدەپە زیاد دەكات"

تاگ :: تورکیا

دواڕۆژ، ئاكۆ حەمەد رابی 

بەرپرسێكی پارتی دیموكراتی گەلان (هەدەپە) رایدەگەیەنێت: لەم هەڵبژاردنەدا دەنگەكانیان زیاد دەكات و چاوەڕوان دەكەن 120 شارەوانی بەدەستبێنن. 


عابد ئیكە، نوێنەری هەدەپە لە هەرێمی كوردستان (ئەمڕۆ یەكشەممە 24ی ئازاری 2019) بە دواڕۆژی وت: "لە هەڵبژاردنی پێشتری شارەوانییەكانی توركیا و باكوری كوردستاندا دەنگێكی باشمان بەدەستهێنا، چاوەڕواندەكەین لەم هەڵبژاردنەدا دەنگەكانمان هەڵبكشێن و شارەوانی زیاتر بەدەستبێنین". 

ئاماژەی بەوەشدا: لە هەڵبژاردنی رابردوودا 102 شارەوانیمان بردەوە، چاوەڕێ دەكەین لەم هەڵبژاردنەدا 120 شارەوانی بەدەستبێنین، ئەگەر ئەو ژمارەیەش بەدەستنەهێنین و هەر شارەوانیەكانی پێشتر بەدەستمان بوون ببەینەوە، بۆ ئێمە بە بردنەوە و دەسكەوت و سەركەوتن هەژماردەكرێت. 

بڕیاره‌ رۆژی یه‌كشه‌ممه‌ى داهاتوو 31ی ئازاری ئەمساڵ هەڵبژاردنی شارەوانییەكان لە توركیا و باكوری كوردستان بەڕێوەبچێت. 

عابد ئیكە،  وتیشی: "بەبێ هیچ گومانێك كانديدى هەدەپە لە ئامەدی باكوری كوردستان بە دەنگێكی زۆر پێش كاندیدی لایەنەكانی دیكە دەكەوێت و دەرچوونی كاندیدی ئێمە لە ئامەد مسۆگەرە و ئەوە یەكلایی بۆتەوە". 

باسی لەوەشكرد: بەپێی سەرجەم لێكۆڵینەوە و راپرسییەكان و لەم هەڵبژاردنەدا دەنگی هەدەپە زیاد دەكات. 

لەئێستادا بەهۆی نزیكبوونەوە لە رۆژەكانی كۆتایی بانگەشەی هەڵبژاردنەكە، ململانێی نێوان حزبە ركابەرەكان چۆتە قۆناغێكی نوێوە. 

پێداچوونەوە: ئارام غەفور 



created by Avesta Group and powered by Microsoft Azure