چەند نهێنییەك لەسەر بەرزاییەكانی جۆلان

هەواڵ / جیهان :: 23/03/2019‌ :: 175‌ جار بینراوە

دواڕۆژ

رۆژنامەی (هائارتس)ی ئیسرائیلی جەختیكردەوە كە لە چەند ساڵی رابردوودا گۆڕانكاری ریشەیی بەسەر سیاسەتی ئیسرائیلدا هاتووە بەرامبەر بە بەرزاییەكانی جۆلان، كە پێشتر تەلئەبیب بە نهێنی گفتوگۆی لەسەر دەكرد لەگەڵ دیمەشقدا، بەڵام دواتر كەوتە هەوڵدان بۆ بەدەستهێنانی پشتگیریی نێودەوڵەتی بۆ خاوەندارێتیكردنی ئەو ناوچەیە. 


دوێنێ‌ پاش ئەوەی كە سەرۆكی ئەمریكا دانی نا بە سەروەری ئیسرائیل بەسەر جۆلاندا، رۆژنامەی (هائارتس) لە راپۆرتێكی درێژدا ئاشكرایكرد كە لە ماوەی 20 ساڵی رابردوودا زۆربەی هەرە زۆری حكومەتەكانی ئیسرائیل بە نهێنی وتووێژیان كردووە لەگەڵ حكومەتی سووریادا بۆ گەیشتن بە رێكەوتنێكی ئاشتی كە مەسەلەی جۆلانیش بگرێتەوە، بەڵام ساڵی 2011 كە قەیرانەكەی سووریا دەستیپێكرد، دوایین گەڕی وتووێژەكان كۆتایی هات. تەنانەت لەسەردەمی سەرۆك وەزیرانی ئێستای ئیسرائیلیشدا وتووێژی چڕوپڕ ئەنجام دراوە و چەندین نەخشە و نموونەی ئەلیكترۆنی ئامادە كراون وەك ئامادەكارییەك بۆ كشانەوەی ئیسرائیل لەو ناوچەیە. 

بەڵام دوای 2011 تەلئەبیب سیاسەتی خۆی گۆڕی و كەوتە هەوڵدان بۆ بەدەستهێنانی پشتگیری نێودەوڵەتی سەبارەت بەوەی كە ئەو ناوچەیە بە رەسمی بخاتە ژێر ركێفی خۆی. 

ئەم هەوڵانە سەرەتا بە نهێنی بوون، بەڵام تویتەكەی دوێنێی ترامپ مەسەلەكەی ئاشكرا كرد كە رۆژنامەكە ناوی ناوە دیارییەك بۆ ناتانیاهۆ.

لە هەڵبژاردنە چاوەڕوانكراوەكەی مانگی نیسانی داهاتوودا مەسەلەی دەستبەسەرداگرتنی جۆلان خاڵێكی گرنگی بەرنامەی هەموو كاندیدەكان دەبێت. 

سەرەتای گفتوگۆكان ساڵی 1992 دەستیپێكرد لەسەردەمی (ئیسحاق رابین)دا پاش ئەوەی كە وەزیری دەرەوەی ئەوكاتەی ئەمریكا پێیراگەیاند: سەرۆكی سووریاش وەكو سەرۆكی میسر ئامادەیە رێكەوتنێكی ئاشتی لەگەڵ ئیسرائیلدا ئیمزابكات. 

ئیسرائیلیش رایگەیاند: كە ئامادەیە پاشەكشە بكات بۆ سنوورەكانی ساڵی 1967 لە ماوەی 5 ساڵدا ئەگەر دیمەشق ئامادەبێت پەیوەندییەكانی لەگەڵدا ئاسایی بكاتەوە.

چاودێرە سیاسییەكان دەڵێن: دانپیانانی نێودەوڵەتی بە سەروەری ئیسرائیل بەسەر بەرزاییەكانی جۆلاندا لە بەرژەوەندی سووریادا دەبێت، چونكە ئیتر ئەو مەسەلەیە دەبێت بە مەسەلەیەكی نێوان عەرەب و ئیسرائیل.

پێداچوونەوە: ئارام غەفور 



created by Avesta Group and powered by Microsoft Azure

بەپەلە